Lipisaromu; rushumo paligharuro lyantembeli. Lipisaromu lyaDaviti. ¹ Ame ngani kuyerurave, Hompa, ove wandera nikure ngoli kapi wapulidira vanankore vande vakushamberere kwande. ² Hompa Karunga wande, ame nalilire kukoye mukushana mbatero, ano ngoli ghaghumvherura. ³ Hompa, ove watundita monyo wande kuvaSheyoli; mbyo wampungura nikare muyumi mukudira kuyenda mulivhu. ⁴ Mutangaghukenu Karunga nantjumo, anwe vapongoki vendi! Tapenu mpandu pakuvhurukanga ghupongoki wendi. ⁵ Ngoli ghuye ghugara wendi wapakarugho tupu; ano ngoli ghukenkenda wakukarererapo liparu nalintje. Shiliro kuya nkwandi matiku, ano ngoli ruhafo kuya pangurangura. ⁶ Nankondo naghambame, ''Ame kapi ngava nkankamita.'' ⁷ Hompa Karunga, mughufenkenda ghoye wanturame nikare yira ndundu yankondo; ano ngoli opo wahorekanga shipara shoye, ame vahomonine. ⁸ Ghanilili koye, Hompa, ghanishana ghufenkenda kwaKarunga wande! ⁹ Ghuwa munke wakaropo mfa dande, nangeshi vantware kuntoko? Ndi walye mbundu ngayi kutanganga? Ngayivhura kungambipara lihuguvaro lyoye lyalinene ndi? ¹⁰ Ndjuve, Hompa, nka mfere nkenda kwande! Hompa, kara mupopeli wande. ¹¹ Watjindja shiliro sharuguvo rwande mukudana; Ove wangupa mumundema mbyo mfukilira naruhafo. ¹² Ngoli paweno ghuntungi wande ngaghu yimba litangango koye nka kapi nganimwena; Hompa Karunga wande, ame ngani tapa mpandu koye nanaruntje!