Mupititi wangovera. Lipisaromu lyaDaviti. ¹ Mumoye, Hompa Karunga, ame kuvanda moye; narumweshi wankengerera me vantjwaghukite. Mpopereme mughupongoki ghoye. ² Ndjuveme; mpopereme wangu; kara ngoli liwe lyande lyaghuvando, naghunankondo wakumpoperame. ³ Ove Hompa liwe lyande naghuyeyameno wande; mpongolishi mulidina lyoye, pititira ntani nakunkungame. ⁴ Ngupemome mulikwe olyo mvhandekame, ove ghaghuhuru ghuvando wande. ⁵ Ame mumaghoko ghoye natura mpepo yande; ove ngaghundjoghorame, Hompa Karunga, Karunga wamughushiri-shiri. ⁶ Ame munyengi wavo vakarerango vintjwantjwo vakudira mulyo, anongoli ame moye tupu nahuguvara. ⁷ Ame ngani kara muruhafo nakushamberera mulikukwatakano lyamughushiri-shiri, ove warukengire runyando rwande; ove wayivire ruguvo rwa monyo wande. ⁸ Ove narumweshi wantapa mumaghoko ghavanankore vande. Ove wawapeka maghuru ghande mulivango lyalinene lyamuporongwa. ⁹ Kara naghufenkenda pande, Hompa Karunga wande, ano ngoli me naguvu; mantjo ghande anakuru muruguvo namonyo wande narutu rwande. ¹⁰ Ngoli liparu lyande lyakura ghunene muruguvo ntani mwaka dande dakura nakukwenaghuka nkondo dande damvhura mukonda yandjo yande, ntani muvifupa vyande kunakurupiramo. ¹¹ Mukonda yavankore vande navantje, vantu kuntjaraghura; nampindi vamaparambo vande kunkengerera ntani nampindi vamaparambo vande kunkengerera ntani nampindi ove vandjivo vakara naghoma. Vantu pakunkenga mundjira kundukame. ¹² Ame vamvhurama yira muntu wakufa wakudira kupakera mbili. Ame nakara yira poto yakutavaghuka. ¹³ Ame nayuvha rushopo rwavantu vavangi, mbudi dakuyita ghoma kumaruha naruntje vavovanteya kumwe ghunkore name. Vavovanteya nashitambo yakughupapo liparu lyande. ¹⁴ Ano ngoli ame nahuguvara mumoye, Hompa Karunga; Ame naghamba, ''Ove Karunga wande.'' ¹⁵ Ruvede rwande mulighoko lyoye. Mpopereme mumaghoko ghavanankore vande ovo vankwame nkwamome. ¹⁶ Renka ngoli shipara shoye shimoneke kuvakareli voye; nkungeme mulikukwatakano lyoye lyaghushiri-shiri. ¹⁷ Washa nkengerera vantjwaghukite, Hompa Karunga; mbyo ngoli nakukuyita ove! Mposhi varughanadona vashwaghuke! Renka ngoli ghuvamwenikide vamuSheyoli. ¹⁸ Mwenikida nkehe vighamba vyavipempa vakughamba ghunkore navapongoki vakukarera vighamba mughunene. ¹⁹ Ghuwa ghoye ghunene-ghunene ogho wapungura kwavo vakaroghunkore, mposhi ghumoneke kwavo vaghupo ghuvando mumoye kwakehe mwanuke wamurwana! ²⁰ Muntanda yalimoneko lyoye, ove kuvavandeka kunteyo davakafumu. Ove kuvandeka muntanda yivadire kuvawana nyanya yavighamba. ²¹ Wapongoka Hompa Karunga, ghuye ghanegheda vitetu vyalikukwatakano lyaghushiri-shiri opo nakalire munkurumbara yaviponga. ²² Nampindi ngoli ame naghambire munkwangu ''Ame wantetako kulintjo lyoye ,'' Ngoli wandjuvire omo narombire lipopero opo nalilire kukoye. ²³ Oh, Karunga washihoro, kwanavantje vakwami vamughushiri. Karunga popera ovo vakukarerango mughushiri, ano ngoli futita vakupaki mughunene ngudu. ²⁴ Kara ghunakoro namukumo, namuvantje mwahuguvaro mwaHompa Karunga ghamuvhatere.