Lipisaromu lyaDaviti. ¹ Hompa Karunga ramba yande naliyoghoko lyande; ghare kuvhura kutjirame? Hompa Karunga ndje liparulyande lyaruvando? ² Opo vantjanantjananga varughanidona ashi ndi vadjaghaghure nyama yande yaparutu, vakwami navanankore vande kupunduka nakuwerapalivhu. ³ Nampiri vakwayita kumvhandera ghunkore name, mutjima wande kapingaghutjira; nampindi vita vishakara ghunkore name, ame shimpe nganikara namukumo. ⁴ Shininke tupu shimwe namupura Hompa, ntani ame ngani shishana: mposhi nganivhure kutunga mundjugho yaHompa mumayuva naghantjeya ghamuliparu lyande, ngani kenge ghuwa waHompa ntani nakuteda muntembeliyendi. ⁵ Ngoli muruvede rwamaghudito ghuye ngahoreka mundjughu yendi; murufiko rwantanda yendi ghuye ngamfukirira. Ghuye ngandjerura muwiru yaliwe! ⁶ Makura mutwe wande ngaghuyeruka kuwiru yavanankore vande vankundurukido, ngoli ame ngani djamba ndjambo yaruhafo muntanda yendi! Ame ngani yimba nakutota marushumo kwaHompa! ⁷ Ndjuve, Hompa, liywi lyande nalili kudameka! Kara naghufenkenda pande, nka ghundimburure! ⁸ Mutjima wande kughamba vyakoye, ''Shana shishwi shendi!'' Ame ngani shana shishwi shoye, Hompa! ⁹ Washa vandeka shishwi shoye kwande; washa tungwira mukareli mughugara! Ove wakaranga mupopeli wande; washa nkengerera ndipo ghuntjuvilire, Karunga waliyoghoko lyande! ¹⁰ Nampindi vavava navanane vankengerere, ngoli Hompa ghuye ngangupame. ¹¹ Ntjongeme ndjira yoye, Hompa! mpititire mundjira yakuvyukilira mukonda yavanankore vande. ¹² Washa kutapa pande vankore vavombyo vashananga, marundiro mangi vantwenyidirame, vavo kushetera kwavo nyanya pentjayo! ¹³ Vinke pamwe vyamvhuro kuntjorokera ndi kapi napulire ashi ame kuvhura nganikenge maghuwa kwaKarunga mushirongo shavayumi? ¹⁴ Kutaterera Karunga; kara ghukoro, nkave ghukare mutjima ghoye namukumo! Kutaterera Karunga!