Lipisaromu lyaDaviti. ¹ Koyeve, Hompa, ame nayerura liparu lyande! ² Karunga wande, ame moye nahuguvara. Washa nkengerera nishwaghuke; Washa kengerera vanankore vande vakushamberere naruhafo-hafo kwandeme. ³ Ngoli ndinkehe ghuno wakuhuguvara moye ghadire kushwaghuka; renka ngoli ovo varughanango vyakukutindaghura vavashwaghukite! ⁴ Renka ngoli niyive ndjira doye, Hompa; ndonge name ndjira doye. ⁵ Mpititireme mughushiri ntani nakuntjonga, ovene Hompa waliyoghoko lyande; ame moye nahuguvara liyuva nalintje. ⁶ Mvhurukite, Hompa, virughana vyoye vyashihoro nalikukwatakano lyaghushiri-shiri; vyavyo nkehe pano vyakarapo kare. ⁷ Washa ghayara ndjo dande dapawanuke ndipo ghukorokoshi wande; mvhurukiteme nalikukwatakano lyaghushiri-shiri mukonda yaghuwa ghoye, Hompa! ⁸ Hompa Karunga muwa nka ghahungama; anongoli ghuye kushonga vanandjo ndjira. ⁹ Ghuye kupititira vaghomoki mundjira yakuwapera nakuvashonga ndjira yendi. ¹⁰ Ndjira nadintje daHompa Karunga dakarererapo kushihoro naghushiri-shiri kwavo vakwamango likukwatakano lyendi namarawiro ghendi. ¹¹ Ngoli ghuye mbushoye, Hompa ngupirepo ndjo yande, yavo yinene. ¹² Ghare murwana ghatjiro Hompa Karunga? Hompa ngaku rondora mundjira yongaghuvhura kutoghorora. ¹³ Liparu lyendi kwakuyendanga naghuwawendi; ruvharo rwendi ngarupinga livhu. ¹⁴ Likukwatakano lyaKarunga kwavo vamufumadeko ghuye, ntani ghuye kwayivitanga likukwatakano lyendi kwavo. ¹⁵ Mantjo ghande nkehe pano kwaHompa Karunga, ngoli ghuye ngamangurura mpadi dande mulikwe. ¹⁶ Pirukira kwande me kumwe nakumfera nkenda; amene mpantjande narunyando rwande. ¹⁷ Maghudito ghamutjima wande ghanakuwederere; ntunditemo muruguvo rwande! ¹⁸ Kenga runyando rwande naruhepo; ngupirepo ndjo dande nadintje. ¹⁹ Kenga vankore vande, vavo vanakara vavangi; vavo kwanyenga nanyanya. ²⁰ Kunga liparu lyande nakumpoperame; washa ntjuvilirame nishwaghuke, ame ghuvando wande moye! ²¹ Mpongolishi ghunadunge naghuhungami ghumpopereme, ame moye nahuguvara. ²² Popera vaIsraeli, Hompa, kuviponga navintjeya!