Lipisaromu lyaDaviti. ¹ Ntundayalivhune Karunga, ntani naghunene wagho, ghudjuni navo navantje vatungomo. ² Ngolighuye kwatotirepo mafuta nakughatura ghakarere kudimukuro. ³ Ghare ngakanduko ndundu yaHompa? Ghare ngayimano mulivango lyendi lyaghupongoki? ⁴ Ghuye kwakara namaghoko ghakukena namutjima wakukena; mbyonka ghadjongononapo vintimwe-ntimwe, kumwe nakudira kughana mughano mposhi ghakonge. ⁵ Ghuye ngatambura matungiko ghakutundilira kwaHompa ntani ghupongoki wakutundilira kwaKarunga naliyoghoko lyendi. ⁶ Ghoruno ngarukara ruvharo ghoro ngarumushano, ovo ngava shano shishwi shaKarunga waYakobu. ⁷ Yerurenu dimutwe denu, anwe heka; kuyerurenu, mavero ghakukarererapo, mposhi Hompa waghuntungi ngavhure kungenamo! ⁸ Ghare nani ghuno Hompa waghuntungi? Hompa Karunga, wankondo naghunene; Hompa wamunene mundwa. ⁹ Yerurenu dimutwe denu, anwe heka; kuyerurenu, mavero ghakukarererapo, mposhi Hompa waghuntungi ngangenemo! ¹⁰ Ghare nani ghuno Hompa waghuntungi? Hompa Karunga waviturapo, ghuye ndje Hompa waghuntungi.