Mupititili wayambimbi; turako ''rushumo rwavikorama.'' Lipisaromu lyaDaviti. ¹ Hompa wande, Karunga wande, vinke vyo wantjuvilirame? Vinke ghunakarere ghure nakumpopera me ghure nankango dande dalitakumo? ² Karunga wande, ame kulira koye muruvede rwamwi, anongoli kwato kundimburura, ano ngoli pamatiku ame nakumwenashi! ³ Ngoli ove wapongoka; ove washungira yira hompa pangeli wanakutanganga vaIsraeli. ⁴ Vakurona vetu vahuguvalire moye; vakuhuguvalire ve, ove mpowavapopelire. ⁵ Vavo kwalilire kukoye mpowavapopilire. Vavo vahuguvalire moye ntani kapi wavakengilire. ⁶ Ano ngolime livinyo kapishi muntu, lishwaghu kughuntu vakughupako kuvantu. ⁷ Navantje ovo vankengangome kuntjepa; vavo kuntjadaghura; vavo kupunga dimutwe davo kwande. ⁸ Vavo kughamba, ''Ghuye kwahuguvara Hompa; mushuvenu Hompa Karunga ghamupopere. Ghamupopere ndje, mukondashi ghahafera mwendi.'' ⁹ Ngolive wandjito kutundilira mushira; ove wanturame nihuguvare moye kutamekera kulishwe lyavanane. ¹⁰ Ame kwavhukumina koye kutunda tupu natundilira mushira; ove Hompa Karunga wande kutundilira mushira shavanane! ¹¹ Washa nkarera ghure name, shiponga pepi shinankarere; kundereko wakumvhura kumvhatera. ¹² Ntwedu dingi dinankundurukido; ntwendu damuBashani dinankundurukida. ¹³ Vavo kuyashameka tunwa twavo ghunkore name yira nyime ghanakunungo ana kuyoghororo vanankore vendi. ¹⁴ Ame kwampimpanga yira mema vanakutera, navifupa vyande kwadiruka. Mutjima wande yira shera; kuyengumukira munda mwene mwene. ¹⁵ Nkondo dande dampwere yira ghufefere wapoto walirova; ruraka rwande rwakakatera kuwiru yakanwa. Ove wandangeka mumbundu yamfa. ¹⁶ Mbwa dankundurukidame; nkwami davantudona vandingilika; vavo vatomaghura maghoko namaghuru ghande. ¹⁷ Ame kuvhura kuvhara vifupa vyande. vavo kukenga nakuntetuka. ¹⁸ Vavo vakuhangwira marwakani ghande mukatji kavo, vavo kurumbanita navyuma vyande. ¹⁹ Washa nkarera ghure, Hompa; nakanderere kwangurako ghumpopere, nkondo dande! ²⁰ Popera monyo wande kwarufuro, liparu lyande tupu ghalihuru kwa makaha wambwa damuwiya. ²¹ Mpopereme kutunwa twavanyime; mvhatereme kumbinga davanyashi. ²² Ame ngamingambipara lidina lyoye kuvakurona vande; mukatji kalipongero ame ngani kutangaghuka. ²³ Anwe mwatjiro Hompa Karunga, mutangaghukenu! Namuvantje nwe varuvharo rwaYakobu, mufumadekenu! Karenu munatjira mwendi, namuvantje nwe varuvharo rwavaIsraeli! ²⁴ Ngoli ghuye kapi ghashuvilira ovo vanakuhepo mulirenkereromo; Hompa kapi ghahoreka shishwi shendi kwendi; muhepekwa opo ghalilire kwendi, ghuye ghamuyuvu. ²⁵ Litangango lyande ngalikara mukonda yoye mulipongero lyoye lyalinene; Ame ngani tikitamo dimughano dande kumeho kwavo vamutjiro. ²⁶ Vahepekwa ngava lya nakukuta; ovo vashanango Hompa Karunga ngava mutanganga. Mposhi ndi mutjima ghoye ngaghuparuke nanaruntje. ²⁷ Vantu navantje pantunda yalivhu ngava kuvhuruka nakupirukira kwaHompa; Vakalikoro navantje vadimuhoko ngadi kunyongamena kukoye. ²⁸ Ngoli ghuntungine Hompa Karunga; ghuye ndje mupangeli wadimuhoko. ²⁹ Navantu navantje ovo vaweko pantunda yalivhu ngavakushamberera nakumuyimbira; navantje ovo ngavayendo mumbundu ngavanyongamena kwendi, navo ngava diro kukunga maparu ghavo. ³⁰ Ruvharo ghoro ngaruyoko ngavamukarera; vavo ngava tantera ruvharo rwakukwamako rwaKarunga. ³¹ Vavo ngavaya ntani nakuya tanta ghupongoki wendi; vavo ngava tantera vantu nampiri ovo ngavadira kuyita shimpe!