Mupititi wangovera. Lipisaromu lyaDaviti. ¹ Ghuye hompa kukushamberera munkondo doye, Hompa Karunga! Ghuwawashiri ghuye kukushemberera muliyoghoko gholyo watapa! ² Ove wamupire mutjima wendi mbyovyo ghahafilire ano ngoli kapi ghavyutire ovyo dapulire ngevo dendi. Selahi ³ Ngoli ove mbyo wamuyitira ghungavo wamatungiko; mbyo wamutura pamutwe nkata yakutendita kungorodo. ⁴ Ghuye kwapulire koye monyo; ngoli mbyo wavimupire kwendi; ove ghaghupanka mayuva ghamangi kunaruntje dogoro naruntje. ⁵ Ghuntungi wendi ghunene mukonda yalifundo lyoye; mbyonka wamukengerera ghafunde vankore vendi. ⁶ Ngoli mbyo wamupa litungiko lyakukarererapo; wamurenka ghahafe nakushepaghana mulimoneko lyoye. ⁷ Ngoli hompa ghuye lihuguvaro lyendi mwaKarunga; kupitita mulikukwatakano lyendi lyamughushiri-shiri kundaghandagha ghuye narumweshi kumushenyita. ⁸ Lighoko lyoye ngali shayikitapo vanankore voye; lighoko lyoye lyakalyo ngali shayikita ovo vakunyengo. ⁹ Muruvede rwaghugara ghoye, ove ngaghuva shorapo navantje yira mumundiro wampire. Hompa Karunga ngava djonaghurapo vavo mughugara wendi, ano mundiro ngaghuva djonaghurapo navantje. ¹⁰ Ove ngaghudjanaghura vanavavo mughudjuni nalira lyavo muvantu navantje. ¹¹ Ngoli vavo vakughayalire ghunkore waghudona koye; vavo vateya-teya viraha ngoli kapi ngaviva tompoka! ¹² Mpongolishi ngaghu vivyavyutira; ngaghuva shakana maghuta ghavo ghankandja kumeho yavo. ¹³ Atwe kukuyerura, Hompa Karunga, munkondo doye; atwe ngatuyimba nakukunganga nkondo doye.