Kumupititi ntjumo. Lipisaromu lyaDaviti. ¹ Liwiru linangambipara ghuyerere waKarunga, ntani mbando yaliwiru kurughana virughana vyendi vyamaghoko ovyo ghayiva! ² Mayuva namuruku rwaliyuva vitimwitira kurupuka; matiku namuruku rwamatiku kushorora ghuyivi. ³ Kwato vitimwitira ndi nkango dakughamba; maywi ghavo nakughayuvashi. ⁴ Ngoli shimpe nkango davo kurupuka diyende ghudjuni naghuntje, ntani vighamba vyavo kughuhura waghudjuni. ghatura litaratara mukatji kavokuliyuva. ⁵ Liyuva kwakalire yira mukawenga ghanakurupuko mukankotya kendi ntani yira mukafumu wankondo ogho ghanakushango pakuduka marumbatano ghendi. ⁶ Liyuva kupuma kutundilira oko lyashayera liwiru makura livindakane mbando yaliwiru dogoro kushikondo shimweya. kwato vyakushenduka ghupyu walyo. ⁷ Veta daHompa datikiliramo, kuvyutiramo monyo; ghungambi waHompa waghushiri, waghukutapandunge kuvantu vamaghoko-ghoko. ⁸ Mapangero ghaHompa kwahungama, kurughana ovyo ghunapanda mutjima; dimuragho daHompa dakushuka, kuyita shite kumantjo. ⁹ Kutjira Hompa kwakushuka, kupitamo naruntje; ghuhungami waHompa kurawira mughushiri ntani naghuhunga wakumaninikida! ¹⁰ Vatura kumwe mulyo wangorodo, nampindi, vyavingi vyaviwa yira ngorodo; vavo ghutovali yira ghushi wampuka ntani ghushi wampuka wakushonya kuvipeka. ¹¹ Nhii, mumwavo vapika voye vanavarondora; mukuvalimburukwa vavo mfuto yoye ngayi ngwanenapo. ¹² Are wakukumona mwene maghundjoni ghendi? nkushurureme kundjo damukaholya-holya. ¹³ Popera vapika voye kundjo dakutulira wina; varenke ashi vashampangerame. Makura ame nganikara mufundi, ntani ngani pira ndjo kupitakanene. ¹⁴ Nankango damukanwa ntani namaghayaro ghamutjima ghavitambure mumamoneko ghoye, Hompa, liwe lyande ntani muyogholi wande.