¹ Ndapero yaDaviti. Tegherera wangu kwande kwakupira ghufuki, Hompa; teyerera nawa kunkugho yande yambatero! tapa litwi lyoye kundapero dande dakutundilira pangegho dakupira ghuhungami. ² Renka litwenyidiro lyande litundilire koye weno; renka mantjo ghoye ghamone ashi vinimbyo vyaghushiri! ³ Nange ghusheteke mutjima wande, nkene ghaghuya kwande mumatiku,ove kunkushura me ntani kapi ngani wana keheghano maghayadaro ghamadona; kanwa kande kapi ngakapitakanitilira. ⁴ Mukutwara ngoli muvirughana paghuntu, kukara ngoli munkango dapangegho doye ashi ame kwakutura naghumwande mundjira dakupira vate. ⁵ Ame mpadi kwakwama mughushiri mumpadi doye; mpadi dande me kapi dasheneta. ⁶ Ngani kugha koye, ove ngaghu ndimburura me, Karunga; pirwira litwilyoye kwande makura ghutegherere opo nighamba. ⁷ Neyeda litwenyidiro lyoye lyalihuguvaro mundjira yayiwa, ove wakupopera nalighoko lyoye lyarulyo ovo vakughupa mumoye kutundilira kuvanankore voye! ⁸ Mpopere yira momo wahuguvara; mvhandekeme munda yamundulye wamavava ghoye. ⁹ Kutundilira kulikaropo lyavavavadona ove vangwanangome, vanankore vande ovo vankudurukidome. ¹⁰ Kapi vakara nankenda kwakeheghuno; tunwa twavo kughamba nalikunenepeko. ¹¹ Vana kundurukida mpadi dande. Ntani kutura mantjo ghankandwire me palivhu. ¹² Vavo kuna kara yira nyime wakufuka palirambo, yira nyimeghona ghanakutakumo mulivango lyakuvanda. ¹³ Shapuka, Hompa! ghuvahomone! vavukumenu vawenavipana vyavo! Popera liparu lyande kuvadjonaghuli narufuro roye! ¹⁴ Mpopereme kuvantu nalighoko lyoye, Hompa, kutundilira kuvantu vamughudjuni ghuno vyatompoka muliparu lyapamundinda! Ngaghuyuda mapumba ghavakulimona lyoye naghungagho ghoye; kavakara navana vavangi ngavashuva mamona ghavo kuvanavavo. ¹⁵ Kutwara ngoli kwande, ngani kamona shipara shoye mughuhungami; ame ngani kumwa, opo nganirambuka, nganimone shipara shoye.