¹ Teghererenu omo anakughamba Hompa, ''Shapuka ghuyite vinka vyoye pano pandundu; ndundu ghona diyuvhe liywi lyoye. ² Teghererenu kumpanguro yaHompa, anwe ndundu, nove wantateko yalivhu. Hompa anakara na mpanguro kuvantu vendi, nka ghuye kuna kurwita ve Israeli mumpanguro. ³ Anwe vantu vande, vinke ovyo namudjona? Yira weni omo nakara muremenena kwenu? Ntanterenu! ⁴ Mbyevishi ame kwamutundita mushirongo sha Egipute ntani mbyo namupopera kughupika. Anitumu Mosesa, Aroni na Miriam kwenu. ⁵ Vantu vande nwe, vhurukenu ovyo amuruwanine hompa Balaki wa Mowabu, nomo amulimbulire Balamu mona Bore. Muruyendo rwenu rwakutunda kuShittimu muyende kuGiliga, mpo ngoli mudimburura ghuhunga ogho amuruwanena Hompa.'' ⁶ Nke nganimutwarera Hompa, opo ngani kamutongamena Karunga wakundaghandagha? Nganimutwarere ndjambo dakushwakerera ndi? Ntani nangombe yamwaka ghumwe? ⁷ Ngavikamuhafita Hompa vyakumupa vindjwi liyovi ndi, ndi mayovi dimurongo dadimukuro dakupupa maghadi? Ndi nganitwareko mbeli yande kumaundjoni ghande, muyangu wamurutu rwande kundjo yande? ⁸ Ghuye atutantera atwe, vantu, ashi vinke vyaviwa po, novyo ashana Hompa koye: kuruwana uhunga, shihoro na nkenda, kuyenda mundjira dalikudidipito na Karunga. ⁹ Liywi lya Hompa kuna kuyuvhika mushitata- dogoro mpopa vakamaghano kuna kupanda lidina lyoye: ''Kwatalighano kumpangera dendi, na kogho adituropo. ¹⁰ Mumandi ghava heyuvhu munayura limona olyo vawana mwamudona na muhana ushili, na viviha ovyo vashweneka. ¹¹ Nimuvarure ngoli kuvahungami muntu waviviha vyakuwederera, ano ndyato davo dinayura vyawidi? ¹² Vangagho kwavhuka ghukorokotji varangweka kwaghamba vipempa, mutunwa twavo mwayura ghumbudi. ¹³ Mpo ngoli shi nganiharaganitapo nalihanauko lyalinene, nganimurenka mukuhangure konda yandjo denu. ¹⁴ Ngamulya ene ngoli nakukutashi ngamukara mundjara yakukarerera po. Ngamuyangura ngoli kapi ngamuvipungura, kwakehe ovyo ngamupongayika nganivihanaurapo narufuro. ¹⁵ Ngamukuna ene ngoli kwato muyangu; ngamunyanga mandjembere ngoli kapi ngamunwako vhinyu. ¹⁶ Veta odo atulitapo Omiri vadipungura, kumwe naviruwana dona vyamulipata lya Ahabu. Ngamukwama mpangera davo. Ame nganimurenka mukare shitata shakudjonauka, ano varangekwa venu mayara ghakuvhukumina, anwee ngamushimba mashentjo gha vantu vande.''