¹ Pongenu mulivango lyamarwero, anwe vanakadi vavakavita; vakavita vanakutovayiki shitata mudima, na mburo davo vanadivyuka mupanguli waIsraeli. ² Ano ngoli ove, Beterehemu Efurata, mpiri momo ashi ove mudidipo mukatji kavitata vya Juda, mumoye mo ngatunda ogho ngapangero muIsraeli, ghuye ndje wamulira lyatundo kukakuru, lyakarereropo. ³ Mpo ngoli shi Karunga ngavatapa, dogoror paruvede rwa kushumita mukamali ngawane mwanuke, ano kunavantje vakuru vendi ngavakavyuka kuvantu vamuIsraeli. ⁴ Opo ngaya nakulita ndjwi dendi nankondo dakutunda kwa Hompa. Vavo ngavaparuka, mbyovishi ghuye ngakara mupangeli wanaruntje palivhu. Ngatupa mpora. ⁵ Opo ngavahomona vaAsiliya muvirongo vyetu, vayende mumarungavero, ngashapwita vayenditi ntambiri na vampititi ntantatu vakavarwite. ⁶ Vavo ngavafunda shirongo sha Asiria navirwita, kumwe namumarungavero gha mushirongo sha Nimuroti.Ghuye ngatupopera mumaghoko gha vaAsiria, opo ngavatuhomokera, nopo ngavakundurukida dimurudi detu. ⁷ Mbunga ya Jakopo oyo yahupomo ngayikara mukatji kavantu, yira ndaghu yakutunda kwa Hompa, yira lime lyakumushoni, lyapirango kutaterera muntu, ndi kukengera muruvharo rwa muntu. ⁸ Rudi rwa Jakopu ngaruparukara mukatji kadimuhoko davantu, yira nyime mukatji kavikorama vyamumutitu, yira nyime ghona mukatji kaghutanga wa ndjwi. Pakuvayendera, ngavalyatangere na kuvatetaura ugcene-ugcene, kwato ogho ngavhuro kuvavatera. ⁹ Maghoko ghoye ngavaghayerwira vanankore voye, mposhi ngaghavafunde. ¹⁰ ''Mumayuva ngogho mo ngavishoroka''- mo anakutanta Hompa- ''Ame nganihanaura tukambe twenu nka nganidjonaura turukara twenu. ¹¹ Nganidjonaura nkurumbara damuvirongo vyenu nakuvhukumanga virwita vyenu vya nkondo. ¹² Nganihanaurapo ghupure wamumaghoko ghenu, ntani ngamukara mwahana vadimu. ¹³ Nganihanaurapo vintjwantje na mawe ghaghupure mukatji kenu kapi nka ngamukarera vintjwanje vyakushonga na maghoko ghenu. ¹⁴ Nganidura mo ngundi dalikarero lyenu hompa Ashera, nka nganiyungurura vitata vyenu. ¹⁵ Muugara wande ngani vyuta rughoko nakutengeka dimuhoko odo dapirango kuntegherera.