¹ Ano ngoli mumayuva anakuyo pandundu opo ngayikarera ndjugho ya hompa ngayikara ndundu yayire unene kupita ndundu nadintje. Makura vantu ngavaya homokera kwayo. ² Dimuhoko dadiyingi ngadi yenda nakughamba ashi, ''Tuyendenu, kundundu yaHompa, kundjugho kutembeli ya Karunga wambunga, mbunga ya Isiraeli. Ghuye ngatushonga kuhamena ovyo anatushanene kurughana makura ngatukwame mundjira yendi atutowerera.'' Mashongero gha Hompa kwatundira mu Jerusalema. ³ Makura Hompa ngaghambita vantu vaSiyoni, ghuye ngatangura dimuhoko davantu pakatji kavakankondo vavanene vapapepi navakaghure. Vamarufuro vavo ngava renka ghakare yira vipururo ano maghanga ghakare yira matemo. Dimuhoko kapi ngadi homokera dimuhoko ghunyado. Kapi ngakukara nka vita. ⁴ Kehe uno ngakara mumbara nakushungira mushipata shamadjembere namumundulye washitondo shaUkuyu. Kwato ogho ngamutjilito nka, Hompa munankondo nadintje ndje avitwenyidiro. ⁵ Nkehe muhoko ngautongamena nakukwama Karunga wavo, ene ngoli atwe ngatutongamena Hompa Karunga wetu kunaruntje nakunaruntje. ⁶ '' Ruvede runatiki mo.'' Ana kughamba Hompa opo ngapongayika vantu vakare pamwe tupu. Ghuye ngatengeka navatje ovo vakahepero muupika. ⁷ Vavo kunaremana mbyo vanakarere ghure namundi, ano avahupuko opo nganitulitapo livareko lyalipe, ngavakare muhoko ghumwe wankondo. Makura ame Hompa nganivarenka ngavapangere ndundu yaSiyoni mayuva naghantje kunaruntje. ⁸ Ano kukoyeko ove, Jerusalemu, omo akara Karunga yira mushiti ano kukengero ndjwi dendi, ngakuya mbara yalipangero kushirongo osho shakaro shoye. ⁹ Paweno, vininke una kuyighira unene? Yira kundereko hompa mukatji kenu? Yira mukareli wenu kwafa? Yino tjutju kunakara tupu yira mukamali anakushampuruko? ¹⁰ Mbunga yaJerusalema anwe, kumuyuva kukora yira mukamali ana kushampuruko, paweno munahepa kushuva mbara yino, makura mukatunge pamushandja washirongo, ano munahepa kuyenda kushirongo sha Babiloni. Oko nko ngakamuvatera Karunga mulighoko lya vanankore venu. ¹¹ Dimuhoko dadingi kuna kuponga mukurwanita ove; ngavaghamba ashi, 'Muhoko waJerusalema tughuhanaurepo; mbara yino ngatuyirenke yikare mutitu.' ¹² Vavo kapi vanayiva maghayaro gha Hompa, ndi mukukwata lighano, ndi po malirongikido ghendi, mo ngoli ngavapongayika ghuye yira momo vapongayikanga ndambo ya vilya vavishwaye parupare. ¹³ Hompa aghamba ashi: ''Mbunga ove ya Jerusalema, shapuka nakuyenda ukatengeke vanankore voye. Ame nganikupa nkondo yira mbinga da ntwedu dashikuvo, ntani makondo ghoye ngaghakara ghapama yira ngoporo. Ove ngaumyonita mbunga da vantu nakuvaghupa ugara ogho vashakanine nakuyita kwande ame, Hompa waundjoni nauntje.''