¹ Lihudi lyande! Nakara yira liyara lyavimenwa pakurombo, yira vitondo vyamandjembere vyakukukuta; kapi vinakara nka na nyango, kundereko nyango oyo ghuhafera mutjima wande. ² Vantu valihuguvaro vatundamo mushirongo; mwato nka wakuhungama mukatji kavo. Navantje vavipempa vakutaterera kudipagha; kehe uno kuna kushana ghunyendi naliwe. ³ Maghoko ghavo kwayura udona: vapanguli vana kuwapayikiri kuruwana ufuki, vakankondo kuna kukutantera ovyo vanashana kughupa. Vanakuyuvhu kumwe. ⁴ Vavawa mumwavo vaghufuki. Shingi shavahungami vanavipilili yira ndungu ya migha. Liyuva olyo ngavatimwitira vakungi, liyuva lyoye lyamatengekero. Runo ruvede roye rwamapiyagano, nganimumona kuna kumpopera kundjo. ⁵ Nakuteghererashi kuvamaparambo; washatura lihuguvaro muvaholi. Takamita vighamba vyoye nda nampiri kumukamali ogho anatatero pamaghoko ghoye. ⁶ Mbyevishi vana vavakafumu kapi ngavafumadeka vashavo. Ano vavakamali ngavadivyuka vanyokwavo. Vangumweya ngavakuvyuka na vangumweyi. Mukankore yoye ngakara murangekwa wamumundi ghoye. ⁷ Ngoli kwande ko me, nganihuguvara Hompa. Nganitaterera Karunga waliyoghoko lyande; Karunga wande ngandjuva. ⁸ Washakupandera pande, mukankore yande. Mukondashi naghu, nganirambuka. Ntjeneshi mumundema nashungiri, Hompa ngakara ghukenu wande. ⁹ Mbyevishi nadjona kwa Karunga, ame kunitambura matengekero ghendi, dogoro ngamvhuruke. Ngampangwire undjoni wande, ngandjite kughukenu. ¹⁰ Ano vanankore ngavavikenga, ano ntjoni ngadivakundurukida navantje ovo vaghambo kwande ashi, ''Kuninko Hompa Karunga ghoye?'' Mantjo ghande ngaghamukenga; ngavavalyatera yira lirova lyamundjira. ¹¹ Ruvede rwakudikurura makuma ngaruya; muliyuva olyo dimurudi ngavadirundwira kwaghure ngudu. ¹² Muliyuva lyo vantu voye ngavaya koye, kutundilira kuAsiya na munkurumbara da Egipute, kutundilira muEgipute dogoro kumukuro, mafuta na mafuta, kumandundu na mandundu. ¹³ Ngoli livhu ngalikara mburundu mukonda yaviyimwa vyaviruwana dona vyavo. ¹⁴ Kara mushitata shavantu voye, shighunda osho wapinga. Vavo kwatunga pentjavo murugwa, pakatji kashirongo sharukukutu. ¹⁵ Yira moomo vyashorokire mumayuva ghenu ghakutunda muEgipute, mo nka ngoweyo nganimunegheda vyakumutetukita. ¹⁶ Dimuhoko ngadivikenga vavo ngavakara nantjoni daghunankondo wavo. Vavo ngavakukwata nkumatere nakutitika matwi ghavo. ¹⁷ Vavo ngavakuvira mbundu yira liyoka, yira vishitwa vyakuradava mulivhu. Ngavarupuka muhotepopero davo naghoma; nagavamuyera naghutjirwe, Karunga ndje Hompa wetu, ngavakara naghutjirwe mukonda yenu. ¹⁸ Kundereko Hompa wakukushetakanita- wakuvhura kughupapo ndjo da vantu, ogho akaro na nkenda yakumanenena? kapi agarapanga, mbyevishi ruhafo roye rwanaruntje. ¹⁹ Ove ngaghutufera nka nkenda; ngaghulyatanga ndjo detu navilyato vyoye. Ngaghuvhukuma ndjo detu nadintje kuntji yalifuta. ²⁰ Ove ngaghunegheda ushiri kwaJakopu na likukwatakano lyamapuliro kwaAbrahamu, yira moomo wavitwenyidilire vakurona vetu kukakuru.