¹ Lihudi shiri ngudu, kuvantu ovo vararango shindaundau nakughayara vyavidona. Mushite shangurangura vaviruwananga mukondashi vavo vanakara nampangera. ² Ntjene mafuva vanashana vavo kughupa; ntjene mandi vanashana kughupa. Vavo kwashwa kushakana vantu mandi ghavo,nakupinga viweka vyavantu. ³ Ngoli Hompa kunakughamba shi, ''Kengenushi, ame kuna muwapayikire udona kovyo munakuruwana, ogho ngamupira kupweyuka mpiri ndi muntingo denu. Kapi nka ngamuyeda nalikutumbo, mbyovyoshi ngarukara ruvede rwarudona ngudu. ⁴ Mumayuva ogho vantu ngavayimba ntjumo dakuhamena kwenu, nakutapa ghumbangi wavishorokwa navintje ovyo. Ngavayayimba, 'Atwe vaIsraeli tunahanaukapo; Hompa anatushakana mavango ghetu. Mukonda munke Hompa anaghatughupire? Ghughatape kuvanankore vetu!'''' ⁵ Mpo ngoli shi, kundereko vanandunge ovo ngavashuvira mavango opo ngaghaupa mwene Hompa. ⁶ ''Washa tupumbwa,'' mo ngoweyo vanakughamba. ''Mwasha pumba vyakufana ngoweyo; maudona ndi ngaghashaya.'' ⁷ Vino shiri ngavishoroka yira moomo vanakuvighamba, kuhamena mandi gha vana vaJakopo, ''Mpepo yaHompa ne ushiri yinagarapa ndi? Ovyo ushiri mbyo ngaruwana ndi?'' Nani nkango dande me nakuruwanashi vyaviwa kovo varuwanango vyaviwa? ⁸ Vantu vande kwakuhomokera yira vanankore. Ove kundembaura marughodi, murwakani, ghavarupwita ayendo ntjuvilira, yira momu vakavita vakavyukanga kuvita oko vaghayara ashi nko kunakaro likeverero. ⁹ Kwatjida vakamali mumandi ovo vatambura naruhafo; waro nka mbyo wavaka matungiko ghande muvana vavo. ¹⁰ Shapuka nakuyenda, lino kapishi livango lyakutunga ve, mukonda yakunyata koye; kunavihanaurapo nu. ¹¹ Ntjene apaya umwe wampepo da umbudi na vimpempa aghambe ashi, ''Ame kuna kupumba kuhamena vhinyu na vinwa vyankondo,'' ghuye ngavamutambura ashi muporofete wavo. ¹² Ngoli me nganimupongeka pamwe, mbunga yaJakopo. Ushiri nganipongayika varudi rwaIsraeli. Nganimupongeka pamwe yira ndjwi damushighuda, yira momo shayuranga shighunda kumalyero. Ngapakara muyoyo wavantu mukondashi ngavavhuka ngudu. ¹³ Kogho apanunango ndjira ngapita kumeho yavo. Ngavapwayera mavero varupukemo; Hompa wavo ndje ngavapititiro kumeho. Karunga ngakara kumeho yavo.