¹ Yino ndjo nkango yaHompa oyo yayiro kwaMika waMoresheth mumayuva ghaJotham, Ahaz, na Hezekiah, hompa waJuda, ogho akaliro nashinka kuSamaria na Jerusalem. ² Teghererenu, anwe vantu namuvantje. Teghererenu, livhu, na navintje vyakaropo. Renka Hompa Karunga akare ndje mbangi ogho ngamuvyuko anwe, ghuye kuna kughamba muntembeli yendi yakupongoka. ³ Kenga, Hompa ngatunda mulivango lyendi lyakupongoka; ngasheumuka ntani ngayayenda kundundu yakuyeruka yapantunda yalivhu. ⁴ Makura ndundu ngadigcuhuruka kuntji yendi; dimuramba ngadigaunuka, yira maghadi pamundiro, ngadi nkonkomokera mumuramba yira momo andandumukanga mema kundundu. ⁵ Navintje vino ngavishorokera mukonda yandjo yambunga yavana vaJakop, namukonda yandjo yandjugho yaIsraeli. Are avapo undjoni vana vaIsraeli? Nani kapishi vankurumbara yaSamaria? Undjoni wakukarera Karunga wavipempa muYuda ndi? Nani ndi kapishi Jerusalemu? ⁶ Makura Hompa aghamba ashi, ''Samaria kuniyitura yikare ndambo yavihando pamushandja, aliraka livango lyakutapeka mandjembere makura ame nganivhukumina mbara mumuramba ntani ame kapi nganifuka ntjima-ntjima yambara yino. ⁷ Vakarunga vavo vavawa ngavashwaununa po nu, ntani navintje vyo vatambura kupitira muntembeli avavishwakererepo namundiro, ame mwande nganihanaurapo matano ghavintjantje navintje. Navintje vawana kupitira murushonda, ngavikakara ndjambo yavakarushonda vaunyavo.'' ⁸ Makura Mika aghamba ashi: ''Mukonda yavino nganilira okuno ame kunakukema, mukulira kwande ngoweyo ame ngani yendaura mpadi-mpadi na rutu-rutu; ngani kugha yira mbwawa ntani ngani guva yira kakuru. ⁹ Vironda vyaSamaria nakuvhurashi kuveruka, nakuyudamo ngoli anakara omo anakuhepa. Lihanuko lino ngalikatika kumangeneno gha vantu vande kuJerusalema omo vakara vantu vambunga yande. ¹⁰ Nakutanterashi vakankore venu vamuGata; nakulirako shi kuno. Anwe vaBeta-Reyatare kuvhundagedenu naumwenu mumbundu mukunegheda mukunegheda likombanito lyenu. ¹¹ Vantu vaSafire avayendi, rutu-rutu na ntjoni davo kuupika. Ava vakaro muSanani kapi varupukire mo mumbara yavo. VamuBete-Esheli avaguvu nakulira, kwavo kapi kwakalire lipopero mukonda valighupire lipopero lyavo. ¹² Vantu vamuMaroto kunakutaterera naghoma kumbudi yayiwa yaliyoghoro, mukonda Hompa anayita lihanauko pepi naJerusalemu. ¹³ Kutirenu tukambe na matemba ghavakavita anwe mwakaro muRakishi. Ove, Rakishi, mbarekero yandjo yamona waIsirayeli, ndjo yaIsraeli kwayiwana mumoye ve Rakishi. ¹⁴ Weno anwe ngamutapa vitapa kumbara yaMoresheti-Gata, mbara yaAkishiku ngayishwaukita hompa waIsraeli. ¹⁵ Hoompa ngatapa vanankore kukwenu, anwe vambara yaMaresha; vayenditi vaIsraeli ngavavagandera mulidamenena lyaAduramu. ¹⁶ Kururenu dimutwe denu ntani tetenu huki denu mukonda yavana venu ovo mwahora. Kukururenu umwenu mukare mudimutwe yira makuvi, mukonda vana venu ngavavaghupa kwenu nakuvatwara kulivango peke.