¹ Ku vantu vamu Juda ovo vana karo muruhepo na murunyando weno vavo kapi nka ngava kara muruhepo na runyando. Virugho, vina kapito livhango lya Zebulani na Nafutali mu Galileya kwa linyengire unene, ano ngoli kumeho ya shirugho ngava kali fumadeka unene, kumwe na mavhango ghaku ntere ya lifuta, kutamekera ku Jorodani na virongo navintje ovyo vantunga va Hedana dogoro ku Galileya. ² Vantu vaku yenda mu mundema ngava mona shite sha ukenu wa unene; vantu ovo vatungo mu mundema wa mfa, navo ngava mona naku wana shite sha ukenu papavo. Matjangwa ghamwe kwatanta ashi, "Mundulye wa mfa," ntani ghamwe ashi, "Mundema wa unene." ³ Hompa Karunga nga vhukita unene shivaro sha muhoko wetu; ntani ghuye ngayita ruhafo rwarunene mu muhoko wetu. Atwe ngatu kara na ruhafo rwa runene yira ruhafo vantu vaku yangura lipemba, ntani atwe ngatu kara naruhafo unene yira momu vahafanga vakavita nkene vana kafunda vana kashakana limona lyava na nkore vavo muvita. ⁴ Ove ngaghu ghupa djoko pamapepe ghutu yitundepo, ntani ngaghu ghupa mudigho wapa mapepe ghetu ghutundepo, ove ngaghu djonaurapo nkondo dava nkwati na vakavita ovo vatu turo mughupika, yira momu wa djonaulirepo naku hanaurapo vakavita vava Midiyani. ⁵ Nkaku da vakavita da mabutusi, daku dwata muvita ngadi kalyata muhonde ntani na vidwata vya vakavita ngavi kara honde-honde, opo ngaghuya mundiro yino honde ngayi kara yira maholi makura ngaghu vevekepo vakavita na vantje. ⁶ Atwe tuna kara na ruhafo mukondashi mwanuke vana mushampuruka mukatji ketu, ntani mumati vana mutapa; ghuye ndje ngakaro mupangeli wetu ghuye ngaku manga rughodi pamapepe ghendi; lidina lyendi ngava mutwenya ashi Mukonentu Mutapi Maghano, Karunga wa Nkondo, Shetu waku Karererapo, Mona Hompa waku yita Mpora. ⁷ Lipangero lyendi lya mpora nga linenepa ntani mpora yendi kapi ngayi kara naghuhura, ghuye ngapangera mughuhunga kutwara muveta yira momu kapangeranga Hompa Dafiti, ntani mu untungi wendi ngaghu kara pa veta na uhungami na upongoki paku tanga dogoro naruntje na naruntje. Oshino ntjo shitambo sha Hompa Karunga wa nkondo mupangeli wava Engeli ndje ngavi ruwano ngavi tikiliremo. ⁸ Hompa kwa tapa marondoro naku tuma rufuro ku ruvharo rwa Jakopu, mbyo ava atantera ashi nga tapa matengeko ku muhoko wa Israeli. ⁹ Vantu navantje ngava viyiva, kumwe na vantu vamuhoko wa Efreyimu nava vatungo muSamariya, vavo kwa kunenepita unene mbyo vakara na lishandu na ndino na urunde, ¹⁰ vavo kwa ghamba ashi, "Makuma gha shitata shetu kwa bomoka mbyo awa palivhu, ano ngoli vavo ava ghamba ashi ngatu ruwana munoko wa ndopi da nkondo ngatu dike tuwapeke makuma ngagha wape ngagha kore; Shitondo sha ukuyu kwa shitetapo vana nkore, ano ngoli vavo kwa ghamba ashi ngava tapekapo shitondo shapeke." ¹¹ Mpo ngoli ashi Hompa Karunga nga tura unkore pakatji ka vakavita vava Siriya, ngava kare vana nkore va Hompa Resina wamu Aramu, ngava ku kwata kane na dimuhoko dadiyingi ngava homokere muhoko wa Israeli, ¹² vakavita vava Aramu ngava tunda ku upumeyuva, ntani vakavita vava Filistine ngava tunda ku utokero. Vavo ngava veveka naku djonaura muhoko wa Israeli yira momu shapapauranga shika shama lirambo. Nampili ngavi shoroke vya weno, Hompa Karunga shimpe nga kara na ugara ku kwavo; shimpe nka, Ghuye nga twikira naku toghona lighoko lyendi papavo shimpe. ¹³ Nampili Hompa Karunga nga tape matengeko ku vantu vendi gha weno, vavo shimpe kapi ngava ku shighura vavyuke ngava tongamene va shane mbatero kwa Hompa Karunga wa nkondo mupangeli wava Engeli. ¹⁴ Makura Hompa Karunga nga tetako vantu vava Israeli ovo vakaro kumutwe ntani navo vakaro ku mushira ngava tundeko, ntani nga papaurako dimutavi daku wiru-wiri ya vitondo ntani na vitondo vyavi fupi navyo ngavi tundako, liyuva limwe tupu. ¹⁵ Va mpititi vava Israeli kutanta ashi, ngo mutwe; ntani va porofete va kuronga vimpempa vavo mbo mushira. ¹⁶ Vampititi ovo va pititirango vano vantu kuva twara muliyome, makura vantu kuyenda vakombane. ¹⁷ Mukonda ndjoyino, Hompa Karunga kapi nga kara na ruhafo na vadinkantu va vamati va muhoko wa Israeli ntani kapi nga kara na nkenda na vafita vavyavo ntani nava ntiwe, mukondashi vavo kuruwana ghurunde, kapi va limburuka naku fumadeka Hompa, ntani vavo kughamba tupu nkango da kushwaura. Hompa Karunga nga ruwana vya weno, ano ngoli ghugara wendi kapishi mpo ngaghu shayera; Ghuye, shimpe nga twikira kutapa matengeko ku kwavo naku vatoghona. ¹⁸ Vantu vaku ruwana urunde kwa fana yira mundiro waku twera wa kuveveka wangu; mundiro wa weno kuveveka vishwa vya miya na mutitu; ntani kuveveka wiya na shirongo, ntani kuyita mundiro waku twera unene ghuyite muti waku kara maremo. ¹⁹ Shirongo na shintje nga shifana yira wiya wa kupya ngashikara yira makara ghamatipu mukonda ya ghugara wa Hompa Karunga wa nkondo mupangeli wava Engeli, muhoko wa Israeli ngaghu kara yira maholi ghaku tura pa mundiro utwere unene. Kwato waku vhura kupopera ghunyendi. ²⁰ Muhoko wava Israeli ngava yenda vaka shakane ndya mu mandi gha vantu ano ngoli ndjara kapi ngayipwa mu mandi ghavo; vavo ngava dipaya vantu ngava lye nyama ya vantu ovo vatungo ku mandi ghaku rumontjo rwavo, ano ngoli ngava lya kapi ngava kuta. Matjangwa ghamwe kwa tanta ashi, "Ngava lya vana vavo, ano ngoli kapi ngava kuta." ²¹ Muhoko wa Manase ngaghu lya muhoko wa Efremu, ntani muhoko wa Efremu, na muhoko wa Manase ngava kupakerera ngava homokere muhoko wa Juda. Ano ngoli nampili ngavi shoroke vya weno, ghugara wa Hompa Karunga kapi ngaghu shaya; shimpe, ngatwikira kutapa matengeko ku vantu.