¹ Makura Hompa aghamba ku kwande ashi, "Ghupa shitafura shaku tjanga ghutjangepo na ndanda dadinene ashi, 'MAHER-SHALAL-BAZ' Kutanta ashi, 'Kwangurenu damunenu muvhake limona nalintje'." ² Ame nganu shungida Uriya wamu Pristeli na Jeberekiya mona Sakariya, ngava kare vambangi vande, ngava karepo ngava kenge na mantjo kwavi nganu ruwana. ³ Makura ame anu yendi anu karara na mukamali wande, makura akara na marutu maviri ntani ashampuruka mwanuke wa mumati. Makura Hompa Karunga aghamba ku kwande ashi, "Nganimuruke lidina ashi, kwangura damuna ghuvake lino limona nalintje. ⁴ Tupu nga kura ghuno mwanuke ngatameke kughamba ashi, 'Vava,' ntani, Nana,' Hompa wa Siriya ngaya na vakavita vendi nga shimbe nga tware limona lya mushirongo na lintje ku shirongo shendi sha Siriya ." ⁵ Hompa Karunga shimpe aghamba nka ku kwande ashi, ⁶ "Ame kwamu tekura naku mupakera mbili anwe vantu ano ngoli anwe mbyo mwa shwena muteku waku tunda ku kwande, mbyo mwa shentja mbatero yande ashi yisheshu unene kwa fana yira mulihu wa udidi waku twara mema kundama yayinene mu Jerusalemu, anwe mbyo mwa kara na ruhafo na mbatero ya Hompa Resina mona Ramaliya, ⁷ weno Hompa Karunga nga tuma Hompa wa Siriya na vakavita vendi va nkondo unene yira mema ghamu mukuro gharu handjo, ghankondo ghama yingi unene mu shirongo sha Juda ngagha djonaure shirongo na shintje. Vakavita ngava vhuka yira mema gharuhandjo rwarunene ghaku yenda kumavhango na ghantje. ⁸ Vakavita ngava homokera shirongo sha Juda yira mukuro waku handja unene, mema gha linkundu na mankumbi gha nkondo gharundjo, ghaku yeruka naku djonaura shirongo, dogoro ngagha tike muntingo. Vakavita vankondo ngava kuhanena wangu-wangu mushirongo na shintje yira mema ghaku duka unene ayende mu shirongo na shintje, opo ngavi shoroka vino ame nganu ghambe ashi, IMANUEL, kutanta ashi Karunga natwe ana kara, nga yambeka mavava ghendi nga popere shirongo na shintje." ⁹ Tererenu, anwe vantu mwatungo mu virongo vya maparambo vyaku ghure. Kuwapayikirenu muku homokera na kurwanita muhoko wa Juda ano ngoli ngava mufunda naku mudjonaurapo: kwatenu tupu virwita vyenu vya nkondo ano ngoli vana nkore venu ngava muhanaurapo. ¹⁰ Anwe ngamu hova, kuturapo maghano naku kuwapayikira ashi weni omo ngamu homokera muhoko wa Juda; ano ngoli mughano ghenu kapi ngagha tika mughuta wa kara, mukonda shi IMANUEL, kutanta ashi, Karunga natwe ana kara. ¹¹ Hompa Karunga aghamba ku kwande, kumwe naku tapa marondoro ku kwande ashi kapishi kuruwana viruwana vyava Juda ntani naka didishi kuhonena ghukaro wavo. ¹² Kapishi kuruwana ghurunde ogho varuwananga vavo kulipangero lyavo, ntani ove kapishi kukara na ghoma ndi kutjira, ovyo vatjiranga vavo vyaku vayitira ghoma. ¹³ Ame Hompa Karunga wa nkondo mupangeli wava Engeli ame ghuna hepa fumadeka naku tjira mukondashi ame kwa pongoka; karenu na ghoma kwa Hompa, ghuye ngaka mupura naku kamu pangura. ¹⁴ Hompa Karunga ndje nga karo ghuvando wenu; ano ngoli ku vamwe ghuye nga kara yira liwe lyaku punduka naku ganda vantu - vamu hoko wava Isreali, ntani ghuye nga kara yira shiraha shaku teya shaku pandeka vantu vamu Jerusalemu nkene ngava lyatamo. ¹⁵ Vantu vavayingi ngava pundukamo ntani ngava wera pa livhu makura kapi nka ngava vhura kurambuka, ntani vavo ngava kara mu shiponga shashinene mukondashi ngava vakwata vana nkore vavo. ¹⁶ Ame kuna kutapa nkango da umbangi wa mbudi yande ku kwenu, ditjangenu nkango dande dikare pa matjangwa yikare mbudi ku kwenu muyi pungure nawa, ngamu yitape naku ronga vakareli vande. ¹⁷ Ame nganu didimika muku taterera Hompa Karunga dogoro nganu munone, ghuye kwa shwena muhoko wendi wa ruvharo rwa Jakapu; ame nganu huguvara mumwendi. ¹⁸ Kengenu, name na vana vande atwe tuna kara viyivito na vitetu na marondoro kuva Israeli ghaku tunda kwa Hompa Karunga wa nkondo mupangeli wava Engeli, oghu atungo Kundundu Ya Siyoni. ¹⁹ Vamwe ngava kanana naku ghamba ashi, "Tuyendenu ku vanganga ovo vaghambango na vantu vakufa ntani na mpepo davafe," vavo kwayiva navintje vaka tape maghano ku kwetu ashi vinke tuvhura kuruwana. Ano ngoli vantu vahepa ntani kughamba vapure maghano kwa Hompa Karunga wavo? Naku vhurashi vayende vaka ghambe na mpepo da vantu vakufa vaka shane maghano ku vantu vakufa vaka tantere vantu ovo vana kuparuko ashi vinke vavhura kuruwana? ²⁰ Kurongenu muyive veta na nkango na marongo gha Hompa ngamu wane ukonentu, kehe ghuno waku kulimba na marongo gha Hompa ghuye kwa kara mumundema ntani mwato ghukenu mu mwendi. ²¹ Vavo ngava renda-renda mushirongo, ngava hepa ngava kara na liguvo ntani ngava fa ndjara. Opo ngava fa ndja yayinene, vavo ngava kankuka ngava kenge kuwiru makura ngava shwaure Hompa Karunga kumwe naku finga vaHompa vavo. ²² Vavo opo ngava kenga mu udjuni kuna karamo tupu mundema na ma udito, na runyando ntani na ruhepo. Vavo ngava vavhukumina mushirongo shamu mundema unene.