¹ Muruvede rwa Hompa Ahasi Mona Jotamu wa Usiya, Hompa wa Juda, na Resini Hompa wa Siriya ntani na Peka mona Remaliya, Hompa wa Israeli, kwa lyatire ghukuruta va yende ku Jerusalemu vahomone vakarwe vita, ano ngoli kapi vaka fundire vita. ² Kumeho vayende ku vita vaka homone vavo ava wana mbudi ya kutunda ku mbara ya Hompa David ashi Hompa Ramu na muhoko wa Efremu wa vaIsraeli vana ku kwata kana kumwe tupu. Makura Hompa Ahasi wa Juda atameke ku kankama, ntani vantu vendi ava kara naghoma unene, yira vitondo vina ku kankamo ku mpepo. ³ Makura Hompa Karunga atantere Jesaya ashi, "Shapuka ghushimbe monoye Shiya-Jashubi muyende kumwe kwa Hompa Ahasi ghuye kumu kamu wana mundjira ku livhango lyaku hondja vyuma kughuhura wa ntopa ya kuyita mema ghatunde mu ndama yaku wiru, ayende kulivhango lyaku yoyera vyuma. ⁴ Kamu tanterenu Hompa ashi, 'Kapishi akare na ghoma, akare ana sheghumuna mutjima pa livhu, kapishi atjire vano vaHompa vaviri, Hompa Resina na Hompa Peka ovo vana karo naghu gara wa unene na shirongo shendi sha Juda, vavo kapi ngava vhura kuveveka muhoko wendi ghukare yira vikuni vya kupya makara. ⁵ Yii, vavo kuna tokora vamuhomokere naku murwanita kumwe naku ruwana urunde ku kwenu; vavo kuna tokora ashi, ⁶ "Kuna kuhomokera muhoko wa Juda kumwe naku udjonaurapo makura ngava ghupe shirongo shenu, ngava turemo Hompa wapeke, mona Tabeyeli ngakare Hompa wa Juda." ⁷ Ano ngoli Hompa Karunga wa nkondo na dintje kuna kughamba ashi, "Kapi ngavi shoroka; kapi ngava ghupa shirongo shenu, ⁹ mukondashi Damaskus ndjo nkuru-mbara ya shirongo sha Siriya ntani Hompa waku pira nkondo waku fana yira Hompa Resina ndje tupu waku pangera shino shirongo. Mu shirugho shaku tika ku mwaka dimurongo hambo-ghumwe shirongo sha Israeli ngashi djonaukapo ntani vantu navantje kapi ngava tungamo. ⁸ Nkuru-mbara ya shirongo sha Israeli ne Samariya, ntani mona Ramaliya ndje mupangeli wa nkuru-mbara ya Samariya, ghuye kwato nkondo. Karenu na lipuro ntani na lihuguvaro mumwande, ano ngoli nkene kapi ngamu kara na lihuguvaro ngava muhomokera ngava mufunda vana nkore venu."' ¹⁰ Kuruku, Hompa Karunga atantere nka Hompa Ahasi ashi, ¹¹ "Shungida ghupure shiyivito kwa Hompa Karunga ghoye akupe shineyedo ashi ngaku kwafa; shungida shiyivito shashire unene shaku wiru-wiru shapa wiru ntani nashi shamunda shaku shinko sha kuntji-kuntji. ¹² Ano ngoli Hompa Ahasi aghamba ashi, "Ame naku vhurashi kushungida ntani naku vhurashi kusheteka Hompa Karunga atu neyede ashi ghuye kuvhura kutu kwafa." ¹³ Jesaya alimburura ashi, "Tererenu, anwe varuvharo rwa Hompa Dafiti. Ame naroroka ngoli ku kudidimikira nanwe? ¹⁴ Ntani Hompa Karunga naye kuna kuroroka ku kudidimikira nanwe? Weno Hompa Karunga mwene nga tapa shiyivito ku kwenu: Tererenu, mwanuke wa mukadona ngawana lira, ngayita mwanuke wa mumati, makura ngava muruka lidina lyandi Imanuel, kutanta ashi Hompa natwe ana kara. ¹⁵ Opo ngakura mwanuke ngatameke kuyamwa na kulya ghushi, ghuye ngakara na ukonentu, nga shwena kuruwana udona, ghuye ngaruwana tupu ushili na uhungami. ¹⁶ Kumeho nga kure mwanuke ghuye nga shwena kuruwana udona ntani ghuye ngaruwana ushili na ghuwa na uhungami, virongo vya vano vaHompa mwatjira ngavi hanaurapo ngavi kare muporongwa. ¹⁷ Hompa Karunga wa nkondo nadintje ngayita papenu, na muhoko wenu, ntani namu shirongo shenu na shintje ngamu kara ma udito na maghupyakadi ghamanene ghaku hova kutunda opo shaku gaghunuka shirongo sha Israeli na shirongo sha Juda - Hompa Karunga nga tuma Hompa wa Siriya ngamu homokere." ¹⁸ Pa shirugho shino Hompa Karunga nga shiva ntjivo ngayite vakavita ngava tunde ku ghutokero ku Egipite, ntani mpuka ngadi tunda kushirongo sha Siriya ngadiye ngadi kundurukide shirongo shenu na shintje. ¹⁹ Vavo ngavaya ngava tunge mushirongo shenu na shintje na mumake, na mumarupako mumawe, na muvishwa vya miya ntani na mumavhango naghantje ghamu mushoni. ²⁰ Pa shirugho ntjosho Hompa Karunga ngafutita - Hompa wa Siriya - ghuye ngaka shimba kavemba ku mukuro wa Eufurati ngaya kurure huki damu mutwe wendi na mumaghuru; ntani ngava mukurure naku teta ndjwedu dendi. ²¹ Opo ngavi shoroka vino, vaweki vimuna ngavi huparapo tupu na ngombe yimwe tupu na vimpendje viviri, ²² ano ngoli vavo ngava wana mo mashini ghama yingi unene, muweki vimuna ngalya maghadi, ntani na vantu ovo ngava huparomo mushirongo navo ngava lya mashini na ushi waku gwanapo. ²³ Pa shirugho ntjosho, ngapa kara vitondo vya mandjembere liyovi limwe ngaku yima mandjembere ghaku tika ku mukosho wa Siliveli liyovi limwe, kutunda weno kwato nka ovi ngavi menomo nkwandi vishwa tupu na miya mbyo ngavi menomo muvipata. ²⁴ Vantu ngava yenda na ngumba davo vaka shane mo vikorama, mukonda shi vipata vyavo ngavi kara wiya na vishwa. ²⁵ Vavo kapi ngava vhura kulima vipata vyavo vya kuyima unene vyapa ndundu na matemo ghavo, mukondashi vipata vyavo vyapa ndundu ngavi kara wiya na mutitu; livhango na lintje ngali kara mutitu na wiya wa malyero gha ngombe na ndjwi na vimpendje.