¹ Mu mwaka ogho afire Hompa Usiya, ame kwa monine limoneko lya Hompa Karunga kuna shungiri ku lipundi; ghuye kuna shungiri kuna yeruka kuna vyukiliri, ntani vyuma vyendi na lirwakani lyendi na ghuyerere wendi kuna yura mu ntembeli. ² Pawiru yendi kwa kalirepo vaEngeli vavaSarafimu; kehe mu Engeli kwa kara na mavava matano na limwe; ntani mavava ghendi maviri kwa fika ku shipara shendi, ntani nka mavava maviri ngo varuwanitanga vatuke muwiru. ³ Vavo kuna kughamba vene na vene ashi, "Hompa Karunga wa nkondo mupangeli wa vaEngeli, kwa pongoka, kwa pongoka, kwa pongokerera! Pantunda ya livhu mudima kwa yura shite sha ghupongoki wendi." ⁴ Va Engeli vava Sarafimu nkene kuna kuyimba unene, vadameke liywi, ngundi odo da kwato ntembeli dado kutameka kukunyunganga ntani muntembeli kuyura unene muti. ⁵ Makura ame anu ghamba ashi, "Ame muntu wa lihudi unene! Mukonda shi kanwa kande na nkando odo na ghambanga kwa nyata, ntani ame kwa tunga mukatji ka vantu vavandjoni, ame weno kuna ku fa ngoli mukonda shi ame kuna mono Hompa, Hompa Karunga wa nkondo mupangeli wa va Engeli!" ⁶ Makura mu Engeli ghumwe wamu Sarafimu atuka aya tembere pa pande; ghuye kuna kwaterere makara gha mundiro mu lighoko, kuna gha yokora atunde mulidiko mu shidjambero kuna ghatura pa shishimbiro. ⁷ Makura a damuna makara agha tura naku guma ku kanwa kande, ghuye aghamba ashi, "Kenga, weno, oghano makara kuna gumu ku kanwa koye; weno ndjo doye dina dongonokapo, ntani ove vana kughupiripo pa ndjo doye." ⁸ Makura ame anu yuvhu Hompa kuna ku ghamba ashi, "Are nganu tuma; are ngayendo ngaka tape mbudi?" Ame anu limburura ashi, "Ame ghuno; ntume ame." ⁹ Ghuye aghamba ashi, "Yenda ghuka tape yino mbudi ku vantu va vaIsraeli ashi, 'Tererenu, dino nkango naku ghamba ano ngoli kapi mudi kwata lighano; vavo ngava kenga, ngoli kapi ngava kwata lighano ovyo ngava kenga.' ¹⁰ Ame nganu pata dimutjima davo ngadi pire kupakera mbili na ku kwata lighano dino nkango, nganu pata matwi ghavo ngagha pire kuyuvha, ntani nganu tura mantjo ghavo ngava kare vatwiku ngava pire kumona. Mposhi vavo kapishi ngava pahuke mantjo va mone, ngava pire kupaturuka matwi vayuvhe ntani ngava pire kupaturuka dimutjima vakwate lighano dino nkango, vavo kapishi ngava kushighure vaye kwa Hompa, ngava pire ku wana liveruko nane ngoli vavo ngava wane matengeko." ¹¹ Makura ame anu pura ashi, "Hompa, dogoro shirugho shaku tika kuni nko?" Hompa alimburura ashi, "Ove twikira ngoli dogoro vitata vyavo ngavi hanaukepo ngavi djonaukepo kuva na nkore vavo, dogoro navantje ngava pwemo, ntani dogoro limona lyavo na mafuva ngavi djonaukepo navintje, ¹² ntani dogoro Hompa Karunga nga tjidemo vantu navantje vatundemo ngava tjayukire kuvirongo vya ghure unene, mposhi shino shirongo shavo nga shikare mu mpuku na mu mburundu. ¹³ Na mpili ngava hupepo va murongo ku shivaro na shintje, vana nkore vavo ngava vadipaya ngava pwepo navantje; yira momu tupu vatetanga vitondo vya ukuyu ndi vya unyandi, kutanta shi dimutavi na ntanga na ndandani mbyo tupu vyaku hupapo makura ngavi tameke kushokera naku mena ngaghu kare nka shimpe muhoko wa Hompa wa kupongoka."