¹ Vakwetu vaku hora, ame kuna kuyimba rushumo rwa Hompa Karunga, rwaku hamena kushipata shendi sha mandjembere. Shino shipata shamandjembere kwa kara pa ndundu pa livhu lya liwa lya ndombe. ² Vakwetu, ghuye kwa purura mo fora, mbyo aghupamo mawe naghantje ghatundemo, ghuye mbyo akuna mo mandjembere ghamawa ghaku yima unene mu shipata. Pakatji kashipata ghuye kwa dikapo litungo lya lire unene, ntani mbyo adikamo nka shaku ruwanita vinyu. Kehe mwaka ghuye kutaterera ndi nga yanguremo mandjembere ghamawa ghaghutovali, ano ngoli ghuye kuyanguramo tupu mandjembere ghamadona ghaghururu. ³ Anwe, vantu vamu Jerusalemu na Juda, Hompa kuna shana ashi, anwe mukare yira shipata shendi sha mandjembere nga mu kare vapanguli ngamu kenge ashi are ana karo mu ghuhunga. ⁴ Vinke walye ovyo na pilire kuruwana, muku wapeka shipata shande sha mandjembere? Ame kwa kuna mo mbuto mposhi nganu yangure mo mandjembere ghamawa ghaghutovali, ano ngoli kwa yangura mo mandjembere gha madona ghaghururu? ⁵ Weno ame kuna kumu tantera ovyo nganu ruwana kushipata shande sha mandjembere: Ame nganu yungururako ngumbu, nganu renke shipata shimene mushoni ngashi kare malyero ghavimuna, ntani nganu bomona likuma olyo lya kundurukido shitata, mposhi vikorama ngavi lyatangeremo mu shipata sha mandjembere. ⁶ Ame nganu tura shipata shikare mpuku, kwato oghu nga pakero mbili livhu na vitondo na mandjembere mushipata. Amen, nganu shuva shipata shimene mushoni na vitondo vya miya. Ntani ame nganu pangera maremo ngagha pire kurokita mhvura. ⁷ Muhoko wa Israeli kwa kara shipata sha mandjembere sha Hompa Karunga wa nkondo mupangeli wa vaEngeli, ntani muhoko wa Juda kwa kara shipata sha shiwa unene shaku yita ruhafo kwa Hompa Karunga; Ghuye kwava tantera valimburuke ku veta dendi; vavo kapi valimburuka ku veta dendi, mbyo va kara varudipayi; ghuye kwava tantera varuwane ghuhunga vakare vahungami, ano ngoli, ghuye kwa yuvha vantu omo vana ku takuma va shane mbatero, mukonda shi kuna ku vahomokera. ⁸ Lihudi unene ku kwenu vaku yenda tunda mundi yenda mundi, naku ngena mulifuva tunda lifuva yenda lifuva, mbyo mwa yuda limona mu ndjugho denu, kwato ovyo mwa shuvirapo vavene anwe mbyo mwa va shakana limona lyavo lyamu shirongo likare lyenu! ⁹ Hompa Karunga wa nkondo mupangeli wa vaEngeli, kuna kutanta ashi liyuva kuna kuya ndjugho denu ngadi kara muporongwa, ntani mandi ghenu ogho mwa dika na limona lya widi mbyo awapa naku fughura, kapi ngamu tungamo. ¹⁰ Mu shirwa shamu shipata osho ngamu purura na hove na joko ntani na vipururo murongo, anwe ngamu yanguramo tupu mandjembere ghaku yuda ndini yimwe tupu ya vinyu ya litera dimurongo mbiri, ntani anwe ngamu kuna mbuto ya matenga ghaku tika ku litera mafere maviri gha mbuto ya mahangu ano ngoli anwe ngamu yanguramo tupu mbuto ya mahereme ghaku tika ku litera dimurongo mbiri ghamu muyangu wa mbuto yenu. ¹¹ Lihudi unene ku kwenu anwe vaku meneka kurambuka ngura-ngura yayinene muyende mukanwe marovhu ghaghururu unene, ntani nanwe vaku tokwera unene munwe marovhu dogoro mukorwe unene. ¹² Anwe kutura vipito vyavinene unene ntani kudunga marovhu ghama yingi ghaghururu unene, ntani pa vipito vyenu anwe ku veta ngoma, naku shiva, naku veta vikitara mudane na kuyimba unene na ku nwa marovhu gha ururu unene, ntani anwe kapi mwa limburuka ku veta da Hompa ntani kapi mwa fumadeka viruwana vyendi vya lishito lyendi. ¹³ Vantu vande ngava yenda mughupika namu mahepeko muvirongo vya peke mukonda shi vavo kwato ghukonentu ntani kapi vayiva Hompa Karunga wavo; vantu va makuto vamu shirongo shavo ngava fa ku ndjara ntani vamwe kava fa ku linota. ¹⁴ Shirongo shava fe sha kuntji kuna kulilira va Israeli va vayingi ngava yendemo ngava kangenemo ntani shasho kuna yashama unene vangenemo vavayingi; vaka makuto, na vampititi, ntani na mbunga ya vantu ovo vatungomo ngava lira unene vantu vamu Jerusalemu ovo vakaliro muruviya, vavo ngava kangena mu shirongo shava fe mu mundiro wa naruntje. ¹⁵ Hompa Karunga nga didipita navantje, vantu vaku kunene pita; ntani vantu na vantje ngava kara na ntjoni. ¹⁶ Ano ngoli Hompa Karunga wa nkondo mupangeli wa vaEngeli nga popera kehe ghuno wa kuruwana uhunga waku limburuka ku kwendi, ntani Karunga mupongoki nga neyeda nga popera vaku ruwana uhungami. ¹⁷ Vantu vendi ngava fana yira ndjwi na ndjwighona dina kulyo mushoni mu malyero ghado, ntani dado ngadi shuva mushoni waku tjokaghuka waku kukuta ngadi lye wa ghuteke. ¹⁸ Lihudi unene ku kwenu anwe muna kuruwano ghurunde mbyo muna fana yira kuna kukoka karu-kara kakanene na rughodi. ¹⁹ Lihudi unene ku kwenu vaku shwaura Hompa naku ghamba ashi, "Karunga nga kwa ngure kuya, ngaya tikitemo ovyo da tanta nkango dendi, ngatu mone ovyo ngavi shoroko; Ove, mupongoki wa Israeli, kuna shana kuyiva ovyo ghuna kughayara, mukonda shi atwe kuna shana tuviyive." ²⁰ Lihudi unene ku kwenu vaku ghamba ashi udona, ghuwa, ntani ghuwa ngoghu dona; ntani nanwe vaku ghamba ashi mundema ngo ghukenu, ntani ghukenu ngo mundema; ntani nanwe vaku ghamba ashi ghururu ngo ghutovali, ntani ghutavali ngo ghururu! ²¹ Lihudi unene ku kwenu vaku kumona ghukonentu naghu mwenu, ntani nanwe vaku kumona ashi mwa kara na maghano na ndunge unene! ²² Lihudi unene ku kwenu anwe mapenda ghakunwa unene marovhu na vankorwi, ntani nanwe vaku kupanda ashi mwayiva kudunga marovhu ghaghu gara; ²³ nanwe mwa karo ghufeke ku vantu kumu futa vimaliva mposhi mupire kutengeka vantu vavarunde, ano ngoli anwe kunyekereramo naku hepeka unene vahepwe! ²⁴ Weno anwe ngamu yenda mu mundiro waku veveka, anwe nga mupya ngamu veva yira virwenge na mushoni waku kukuta, ndandani denu ngadi ghora, ntani dimucuko denu ngadi kara mutwitwi. Ovino ngavi shoroka ku kwenu mukonda shi anwe mwa shwena marongo gha Hompa Karunga wa nkondo na dintje mupangeli wa vaEngeli, ntani anwe kapi mwa tambura nkango da Hompa mupongoki wa Israeli. ²⁵ Weno Hompa Karunga kuna garapa unene ku vantu vendi. Ghuye kuna yerura lighoko lyendi kuna shana kuva toghona na ku vatengeka. Ndundu kuna kukankama, ntani vimpu vya vantu vaku fa kuvi rara pa livhu yira hando. Nampili vishoroke vya weno, ghugara wa Hompa kapi ghushayapo; shimpe, ghuye kwa yerura lighoko lyendi ava toghone naku vatengeka nka waro. ²⁶ Hompa kwa tapa liywi ku vantu vadimuhoko dapeke na ntjivo ku vakavita vaku ghure vakwangure kuya ngava muhomokere virongo navintje vya pantunda ya livhu. Vavo ngava duka ngava kwangura wangu-wangu. ²⁷ Vavo kapi ngava roroka ntani kapi ngava punduka; vavo kapi ngava pwiyumuka ntani kapi ngava rara. Ntani maruvya ghavo kapi ngava ghashutura ntani nkaku davo da capa kapi ngadi ndembuka. ²⁸ Vavo kwa rora ngumba davo davita ditwepe ntani kwa runda maghuta ghavo gha nkandja ghakore; nkambe da vakavita kwa kara na makondo ghaku gindja ntani kuduka unene paku koka karu-kara kavita, livhu kurwafuka yira vikutji, makosho ghakaru-kara kumbirumuka unene yira mpepo yaka kundu-kundu. ²⁹ Vavo ngava nunga yira vanyime; vavo nkondo unene yira va nyime. Vavo ngava kwata vantu ngava kupapawire ngava tware, kwato waku vhura kuva popera. ³⁰ Opo ngali tikamo lino liyuva vakavita ngava nunga yira lifuta lya mankumpi lina garapo. Kehe ghuno nga kengo mushirongo, ngamu kara mundema na ruhepo; liyuva ngali kara mumundema yira liremo lya linene lya nkondo lina fikoko mbyo kuna kara liku ndema.