¹ Lihudi unene ku kwenu vapanguli va varunde na ufeke anwe mwa ruwanitango veta mwa mudona. ² Vavo kwato ku feranga nkenda vahepwe, ntani vavo kushakana vahepwe limona lyavo, vavo kapi vafumadeka untu wa muntu ku vahepwe, vavo kuvaka limona lyava fita va vyavavo, ntani na kuhepeka vantiwe. ³ Ame nganu tuma vantu vaku tunda kughure ngavaye ku kwenu ngava mu hanaurepo? Kware ngamu dukira ngamu kashane mbatero na uvando waku mupopera, ntani are nga vhuro kupopera limona lyenu na untungi wenu? ⁴ Kwato ovo ngava hupopo, kuni ngamu vhura kudukira, anwe ngamu punduka ngamu wera pa livhu, ngava mukwata kumwe naku mudipaya. Opo ngavi shoroka vya weno, ghugara wa Hompa kapi ngaghu shaya; Ghuye shimpe nga tapa matengeko ku kwenu kumwe naku mutoghona. ⁵ Lihudi lya linene kwa Siriya, ame na kara na ghugara wa unene, mbyo na tuma vakavita vavo va nkondo ngava hanaurepo dino dimuhoko mukondashi ame kwa kara na ugara ku dimuhoko davo! ⁶ Ame kwa tuma muhoko wa Siriya ghuhomokere naku tengeka dimuhoko daku pira kulimburuka ku kwande odo dayito ghugara na lishandu ku kwande. Ame kwa tuma muhoko wa Siriya ngaghu djonaure virongo vyavo, naku dipaya vantu, naku shakana limona lyavo ntani naku lyatanga marutu gha vantu vakufa yira momu va lyatanga litata. ⁷ Ano ngoli Hompa wa Siriya kapi ana yiva ashi vinke ana kuruwana, ntani ghuye kuna kara tupu yira ghuta ghuna karo mulighoko lyande. Ghuye kuna kughayara tupu ashi kuna kudipaya vantu vavayingi ntani nga hanaurepo dimuhoko dadiyingi. ⁸ Ghuye kwa ghamba ashi, "Vampititi vande va vakavita ntantani ngava kare vaHompa vadino dimuhoko na funda! ⁹ Atwe kwa djonaura na kuhanaura shitata sha Kalino yira momu twa djonaura shitata sha Kakemushi? Ntani Atwe kwa djonaura shitata sha Hamati yira momu twa djonaura shitata sha Arupadi? Ntani atwe kwa djonaura shitata sha Samariya yira momu twa djonaura shitata sha Damascus. ¹⁰ Lighoko lyande lya nkondo kwa djonaurapo naku hanaurapo ma untungi ghavo na mafano ghava Karunga vavo ogho vashonga na vitondo na maghoko ghavo ashi ngagha kare na nkondo daku pitakana vaKarunga vamu Jerusalemu namu Samariya, ¹¹ atwe ngatu hanaurapo shitata sha Jerusalemu yira momu twa djonaurapo vaKarunga vamo, ntani kwa hanaurapo shitata sha Samariya yira momu twa hanaurapo mafano ghava Karunga vamo. ¹² Hompa Karunga nga ruwana ku twara muma tokoro ghendi; ghuye nga tuma muhoko wa Asiriya ngava homokere shitata sha Jerusalemu ntani na Ndundu Ya Siyoni, kunyima ntani nga tengeka Hompa wa Asiriya kumwe na muhoko wendi na ghuntje, mukonda shi kwaku tumba unene naku kunenepita ntani kwaku yenrura unene. ¹³ Hompa Karunga kuna ku tanta ashi, "Ame kuna ruwana vya weno mukonda shi kwa kara nkondo dadinene ntani na ndunge na ukonentu unene. Ame kwa kara na ukonentu, mbyo naghupapo dimurudi da virongo vyenu. Ame nganu muhomokera nganu ghupe limona lyamu shirongo shenu, ntani vakavita vande ngava kara na nkondo unene yira ntwedu makura ngava hanaurepo vantu navantje vamu shirongo. ¹⁴ Ame kwa funda udjuni naghuntje, ovino ghureru ku kwande yira waku damuna shitunguru shamaghuta, nughupe mo maghuta ogho ana karo mo, atwe kwa shakana limona lya vantu vamu udjuni mbyo lya kara lyetu, mukonda shi vantu kwato nkondo, kwa kara tupu yira vidira vya pongeko maghuta, ano ngoli kwato nkondo daku popera maghuta kuva na nkore. Kwato mavava na nkondo daku popera maghuta ndi limona lyavo kuva na nkore." ¹⁵ Ame Hompa Karunga, kuna kutanta weno: likuva lyaku teta vitondo kapi lya kara mfumwa yaku pitakana ogho ali ruwano ntani kapi lya kara na nkondo daku pitakana muntu waku liruwanita? Shitjaha shaku teta vitondo ngoli shili ku pitakana muntu waku shiruwanita ndi? Ngoli shili ngundi ya shitondo kuvhura kudamuna muntu waku yikwaterera ndi? Ndi kuvhura kudamuna muntu waku yiteta ndi? Hompa wa Asiriya kapi shi ghuku pande ashi kuna ruwana vya weno mundunge namu nkondo doye. ¹⁶ Weno Hompa Karunga wa nkondo mupangeli wava Engeli nga tuma lighamba ngali dipaye vakavita voye va nkondo na mapenda ghoye; Hompa Karunga nga djonaurapo untungi ghoye yira momu waveve kanga mundiro waku twera unene. ¹⁷ Hompa Karunga kwa kara shite shaku tapa ukenu ku muhoko wa Israeli; Ghuye Mupongoki na mupangeli wa Israeli waku fana yira mundiro waku twera unene, vakavita vava Asiriya kuna fana yira vitondo vya miya vyaku kukuta vina kupyo naku veva kumundiro mu liyuva limwe tupu. ¹⁸ Shirongo sha Asiriya kuna kara na limona na nyango na livhu lya kuyima mbuto, ano ngoli Hompa ngavi djonaurapo navintje, yira momu adjonaurangapo rutu na monyo; rutu rwa muntu ku vera naku fa rudjonaukepo. ¹⁹ Makura muwiya kuhupamo tupu vitondo vyavi sheshu, na mpili vanuke vadidi kuvhura kuvi varura. ²⁰ Opo ngashi tikamo shino shirugho, vantu vava sheshu tupu ngava hupopo va mulira lyava Israeli, mu ruvharo rwa Jakopu ovo ngava paruko, vavo kapi ngava huguvara nka mwa Hompa wa Asiriya ogho ava kwato mbyo ava tura mu ghupika, nane ngoli paruvede runo vavo ngava kara na lipuro nali huguvara mwa Hompa Karunga wavo, waku pongoka mupangeli wa Israeli. ²¹ Ruvharo rwa Jacopu ovo ngava hupopo vavo ngava kushighura ngava vyuke kwa Karunga wa nkondo nadintje. ²² Weno shivaro sha muhoko, wava Israeli, shina vhuka unene yira musheke wamu lifuta, ano ngoli vava sheshu tupu ngava huparopo ovo ngava kavyuko mo ngava katunde mu ghupika. Hompa Karunga kuna tokora muku djonaurapo muhoko wava Israeli, ghuye kuna hepa kuruwana vya weno mukonda shi ghuye kwa pongoka ntani kwa hungama. ²³ Weno, Hompa Karunga wa nkondo, mupangeli wava Engeli, kuna tokora muku djonaurapo muhoko wava Israeli mushirongo na shintje. ²⁴ Weno Hompa Karunga wa nkondo mupangeli wava Engeli kuna ku ghamba ashi, "Anwe vantu vande mwa tungo mu Siyoni, kapi shi mukare na ghoma ku vakavita vava Asiriya. Vavo ngava mutoghona na muramu ntani na mburo makura ngava mutware mu ghupika, yira momu varuwanine vakurona venu mu Egipite mwaka dina kapito. ²⁵ Kapi shi mukare na ghoma, mushirugho shashi fupi tupu makura ugara wande na lishandu lyande ngali shayapo, makura ame nganu garapa na vantu va muhoko wa Asiriya makura nganu vadjonaurepo." ²⁶ Makura Hompa Karunga wa nkondo mupangeli wava Engeli ngava shepura na ngora, yira momu aruwanine opo afundire vakavita vava Midiyani kundundu ya mawe ya Orebu. Ghuye ngava toghona na mburo yira momu aruwanine vakavita vamu Egipite opo agaununine mema mulifuta. ²⁷ Opo nga shitikamo shino shirugho, Hompa Karunga nga ghupa mudigho ghutunde po pa mapepe napa ntingo denu, vakavita vava Asiriya kapi nka ngava vhura kumu hepeka naku mutura mu ghupika, lipangero lyendi ngali djonaurapo Hompa Karunga. ²⁸ Opo ngali tikamo lino liyuva, vana nkore vavo va vakavita ngava ngenena ku ruha rwa mukuro wa shirongo sha Juda pepi na doropa ya Ayita ngava vindakane mukatji ka livhango lya Miguroni; makura ngava kature kamba yavo pa livhango lya Mishamashi mu Jerusalemu. Vavo ngava vindakana mu muramba makura ngava karare pa livhango lya Geba. ²⁹ Vantu ovo vatungo mudoropa ya Rama ngava kara na ghoma wa unene ntani vantu vamu doropa ya Gibeya mudoropa ya Saulu navo ngava duka ngava tjayukemo mu doropa yavo. ³⁰ Anwe vantu mwa tungo mu Galimu lirenu mushane mbatero! Tapenu marondoro, ku vantu vamu shitata sha Layisha! Anwe vantu mwa tungo mu doropa ya Anototi ngamu kara muruhepo rwa runene! ³¹ Vantu vamu shitata sha Madamena ngava tjayuka ngava tunda mo, ntani vantu ovo vatungo mu shitata sha Gebimu navo ngava tjwayuka ngava kashane ghuvando kwa peke. ³² Mu liyuva ndyolyo vakavita ngava rara mushitata sha Nopu pandje ya Jerusalemu makura ngava homokere naku tapa matjilito ku vantu ovo vatungo ku Ndundu ya Siyoni, mu Jerusalemu. ³³ Tererenu, Hompa Karunga wa nkondo mupangeli wava Engeli kwa kara na nkondo dadinene, Ghuye nga djonaurapo vakavita va nkondo vamu Asiriya; vavo ngava fana yira shitondo shashire unene vana kuteta kumwe naku pangurako dimutavi. ³⁴ Ghuye nga djonaurapo vano vakavita yira momu vatetanga vitondo vya vinene vyamu wiya na likuva lya linene muku djonaurapo ghuno wiya wa unene wamu Labanoni.