¹ Dimutavi ngadi shoka naku mena pa lidi lya shitondo, muruvharo rwa Jesi mu lira lya Hompa Dafiti mo nga ka kwama Hompa wa mupe. ² Mpepo ya Hompa Karunga ngayi kara papendi, ngayi tapa ukonentu ku kwendi, ngayi tape maghano ngayive vininke vyavi yingi, ngaruwane uhunga, nga kara nkondo, nga kare na ndunge ntani nga kare na ghoma kumwe naku fumadeka Hompa Karunga. ³ Ghuye nga kara na ruhafo muku limburuka naku tikitamo nkango da Hompa Karunga; ghuye kapi nga rundira muntu ashi muhungami ndi mundjoni ku twara omo ana kumoneka, ntani Ghuye kapi nga tokora muku twara mu vighamba vya vantu. ⁴ Nane ngoli, Ghuye nga pangura vahepwe mu uhungami ntani naku vafera nkenda. Ghuye nga toghona vantu vavarunde na mburo ku twara muviruwana vyavo, Ghuye nga djonaurapo vantu vavarunde mukonda ya viruwana vyavo vya vidona. ⁵ Ghuye nga ruwana uhungami yira momu adwatanga Hompa rughodi rwa pa nturo napa mapepe, Ghuye nga kara na lipangero lyaku ruwana ushili yira momu aku manganga Hompa ruvya rwa nkondo rwamu mbunda. ⁶ Opo nga kara Ghuye mupangeli wamu shirongo, mambungu na vindjwighona ngavi tunga kumwe mu mpora, mashumbu ngagha dana kumwe na vimpendjeghona; vitana nava nyime ntani na ngombe daku neta nga dirara kumwe muhambo, vanuke mbo vaku dikunga naku dipakera mbili. ⁷ Ngombe dadikadi na mambungu ngadi lya kumwe, ntani vakembe na mambungughona ngavi rara kumwe tupu muhambo. Va nyime ngava lya mushoni yira ngombe. ⁸ Vanuke ngava danena kuma kwina ghamayoka ghaghu shungu ano ngoli kwato kuva shuma, ntani vanuke ngava kwata mayoka mu marupako ano ngoli kapi ngava remana ku mayoka ghaghu shungu. ⁹ Kwato vishitwa vyaku remeka naku kudipaya ovyo ngavi karomo Mundundu Ya Siyoni yaku pongoka; ntani mu udjuni ngamu yura vantu va vakonentu va Hompa Karunga, yira momu lya yura lifuta mema. ¹⁰ Opo ngali tikamo lino liyuva, ghumwe wamu ruvharo rwa Hompa Dafit nga yerura lirembe ngayite vantu navantje ngavaya ponge ku kwendi. Makura vantu vaku dimuhoko daku ku shuva-shuva ngavaya ku kwendi ngava shane ndunge na ukonentu, makura shirongo shendi ngashi kara na mfumwa yayinene ntani na ghuyerere. ¹¹ Opo ngali tikamo lino liyuva, Hompa Karunga nga honyonona lighoko lyendi nga pongeke vantu vendi ovo ngava huparopo ovo vatjwayukiro ku virongo navintje, ngava kavyuka ku shirongo shavo vatunde ku shirongo sha Asiriya, ku Egipite, ku Paturosi, ku Etopiya, ku Elamu, ku Babiloniya, ku Hamati, ntani navo vatjwayukiro ku virongo vya lifuta napa virudi vya lifuta. ¹² Hompa Karunga ngayerura lirembe ku vantu navantje mposhi dimuhoko dava Israeli ovo vatjwayuko kare ngava kavyuke ngava ya ponge kumwe mu shirongo shavo, ntani na muhoko wava Juda ovo vatjwayukiro ku maruha mane mu udjuni navo ngava ka vyuka. ¹³ Makura muhoko wa Israeli kapi nka ngava kara ghunkore na muhoko wa Efrayimu, ntani kapi ngapa kara maku nyengo ghaku kutetera dimurudi. Ntani muhoko wa Efrayimu ngapi ngava kunyenga na muhoko wa Juda, ntani kapi ngapa kara maku hepeko pa katji ka muhoko wa Juda na Efrayimu. ¹⁴ Makura vakavita vavo ngava kupakerera kumwe ngava homokere va Filistine ku ruha rwa utokero, ntani ngava homokera nka dimuhoko daku ruha rwa upumeyuva ovo va shakano limona lyavo. Ntani vavo ngava homokera va ghupe shirongo sha Edomu na Mowabi, ntani ngava pangera vantu va muhoko wa Amoni. ¹⁵ Hompa Karunga nga djonaura naku kukutita lifuta lya ligeha lya Gulufu lya pepi na Egipite nga likare shitaura. Ghuye nga tuma mpepo ya yinene ya ghupyu yitunde ku lighoko lyendi yiyende ku mukuro wa Eufrati makura ngaghu gaunuke di kare dimukuro ntano-na-mbiri dadi-didi, mu kare tupu mema ghama sheshu, vantu kuvhura ku lyatamo na mpadi va vindakane. ¹⁶ Mukonda shi Hompa Karunga nga yupura ndjira yayinene ya vantu vendi ovo vana hupopo vana karo mu shirongo sha Asiriya ngava vuyke ku shirongo shavo, yira momu aruwanine pa kare muku kukutita lifuta lya mema mposhi muhoko wendi wava Israeli vatunde mo mu shirongo sha Egipite.