Ruvambi 12
1
Opo ngali tikamo lino liyuva vantu vamu Jerusalemu ngava yimba runo rushumo ashi, "Atwe kupandura kukoye Hompa Karunga. Ove kwa garapire natwe, weno ugara ghoye ghuna kutura ghuna shaya, ano ngoli paweno ove kuna kutu shengawida na mbili.
2
Kengenu, Karunga ndje muyogholi wetu; atwe kwa huguvara mu mwendi, mbyo twa pira ku kara na ghoma, mukonda shi tuna kara na Hompa karunga wetu, Hompa Karunga wetu kwa tupa nkondo, mbyo twa yimbanga ntjumo ku kwendi tumu tange. Ghuye kwatu yoghora tutunde munkondo dava na nkore vetu."
3
Atwe vantu vendi ngatu kara na ruhafo rwa runene, mukonda shi atwe ngatu vheta mema ghaku nwa mu litope lya monyo.
4
Opo ngali tikamo lino liyuva atwe ngatu ghamba ashi, "Atwe kupandura kwa Hompa Karunga naku shungida mu lidina lyendi; Atwe ngatu tantera vantu navantje vamu udjuni ku viruwana vyendi vya vinene; mposhi navantje ngava yive lidina lyendi ngava lifumadeke.
5
Atwe ngatu yimba ntjumo daku tanga Hompa Karunga, Ghuye kwa ruwana naku neyeda vitetu vya vinene; tuna hepa kutantera vantu navantje vamu udjuni vamu Yive.
6
Anwe va Siyoni, yimbenu naku dameka, karenu na ruhafo, anwe kuna kara na Mupongoki wava Israeli mukatji kenu."