¹ Ame Yesaya mona Amos, Hompa Karunga kwa tapire mbudi ku kwande yaku hamena kwa Babiloniya ashi: ² Ronda pawiru ya ndundu ghuka ture naku shintja lirembe pa ndundu, makura ngaghu yiyire na liywi lyaku dameka ashi vakavita kuna kuya vahomokere shitata sha Babiloniya, makura ngaghu yerura maghoko muwiru ngaghu tape shiyivito ashi vakavita kuna kulya ukuruta vangene mu shitata omo vatunga vapangeli vama kuto vaku kunenepita. ³ Hompa Karunga kuna ghamba ashi, "Ame kuna tapa muragho kwava na toghorora va ruwane viruwana vyande; Ame kuna tantere mapenda ghava kavita vankondo vatape matengeko ku vantu vamu Babiloniya mukonda Ghuye kwa kara na ugara navo - vano vakavita ngava kara na ruhafo rwa runene muku ruwana vatikitemo viruwana vyavo. ⁴ Tererenu muyoyo wa unene ghuna kutundo ku ndundu, muyoyo wa mbunga ya vakavita va va yingi vana kulyato ghukuruta! Vakavita va nkondo vaku tunda ku dimuhoko daku ku shuva-shuva kuna ku ku pakerera kumwe tupu! Hompa Karunga mupangeli wa va Engeli kuna kuyita vakavita va nkondo vaku pakerere naku ku wapayikira kuyenda kuvita. ⁵ Vano vakavita kwa tunda mu virongo navintje, ovyo vya karo udjuni. Vavo kuna kara yira mbo vikwata na virwita ovyo nga ruwanita Hompa Karunga mukonda shi ghuye kuna kara na ugara wa unene mbyo ana kutapa matengeko kwa vano vantu, kumwe naku djonaurapo shirongo sha Babiloniya na shintje. ⁶ Anwe vantu vamu Babiloniya, liyuva lya Hompa Karunga pepi lina kara; Hompa Karunga wa nkondo nadintje nga djonaurapo shitata shenu. ⁷ Anwe ngamu kara na ghoma wa unene, ntani kapi ngamu kara na nkondo murutu daku vhura ku yerura maghoko ghenu muwiru. ⁸ Anwe ngamu kara na ghoma wa unene; ntani ngamu yuvha kukora unene yira mukadi waku shana ku shampuruka mukeke, ku kara kwato nkondo murutu. Anwe ngamu piruka muku kenge vipara na vipara kwato waku vhura ku vatera ghunyendi; vipara vyenu ngavi kutjindja ngavi moneke liguvo na ghoma ntani yira kuna pi ku mundiro. ⁹ Terernu, liyuva lya Hompa Karunga pepi lina kara; Hompa kwa toghorora lino liyuva nga neyede nyanya na ugara na lishandu ku vantu vamu Babiloniya, Ghuye nga djonaurapo shirongo shenu ntani nga djonaurapo vantu va ndjo navantje vamu shirongo. ¹⁰ Opo ngavi shoroka vya weno ku liwiru naku ntje ngaku shovagana. Mbungururu ngadi dima, ka kwedi ngaka shovagana, ntani liyuva ngali puma ano ngoli ngaku kara mundema. ¹¹ Hompa Karunga kuna ku ghamba ashi, "Ame nganu tapa matengeko ku vantu vamu udjuni mukonda ya ndjo davo, na urunde wavo, naghu kukutu dimutjima ntani na ulingi-lingi. Ame nganu shayekitapo ku ku nenepita kwavo, nganu shayekitapo nyanya yavo ntani nganu shayekitapo ulingi-lingi wavo. ¹² Amen nganu dipaya vantu vava yingi ngava hupepo tupu vava sheshu, makura ovo ngava hupopo udito unene kuva wana yira momu vya ditopa kuwana ngorodo yene-yene mu livhango lya Ofiri lyamu Arabiya. ¹³ Makura ame nganu renka liwiru na lintje liku nyunga-nyunge, ntani udjuni na livhu na lyo ngali ku nyunga-nyunga ngali tunda pa livhango opo lina kara ngali yende pa livhanga lya peke, ovino ngavi shoroka weno opo nga neyeda Hompa Karunga mupangeli wava Engeli ugara na lishandu lyendi ku vantu vava runde. ¹⁴ Vantunda-virongo ovo vatungo mu Babiloniya ngava duka yira vahorongo ova ana kutjida mukongo, ntani ngava fana yira ndjwi daku pira mushita, vantu navantje ngava duka vatjire ngava vyuka ku virongo vyavo oku vatunda. ¹⁵ Kehe ghuno ngava wana mo mu Babiloniya, ntani vantu ovo ngava kwata vana nkore ngava va dipaya na rufuro. Vakeke na vana vavo vavadidi ngava vadjama na mawe vava dipaye kumeho yava kurona vavo kuna kuvi kenga na mantjo. ¹⁶ Vana nkore vavo ngava shakana limona lyavo na lintje ntani vakadi vavo ngava va kwatera ku nkondo ngava rare navo. ¹⁷ Kengenu, Ame nganu tuma vantu vamu Midiya ngava homokere mu Babiloniya, na mpili weni nganu tapa Siliveli na ngorodo yayi yingi ku kwavo, shimpe ngava mu homokera. ¹⁸ Vakavita vava Midiya ngava dipaya vamati vamu Babiloniya na ngumba; vavo kapi ngava fera nkenda vakeke na vanuke vavadidi. ¹⁹ Shitata sha Babiloniya, kwa shitunga mbyo sha wapa unene ntani kwa karamo limona lya liyingi, vantu vamo kwa viyara mbyo vaku nenepita naku kuyerura unene mukonda ya shitata shavo; ano ngoli Hompa Karunga nga djonaurapo shitata sha Babiloniya yira momu adjonaulirepo shitata sha Sodomu na Gomora. ²⁰ Kwato ogho nga vhuro kutungamo muno mu shitata sha Babiloniya mwaka na mwaka. Na mpili vantu vava Arab kapi ngava vhura kudika mandi ghavo va tungemo, na mpili va weki ndjwi kapi ngava yitamo limona lyavo ku malyero. ²¹ Vikorama vyamu mburundu mbyo ngavi tungomo. Mundjugho davo ngavi tungamo vidira-vaka kuru; ntani vidira va mpo nava menye vamu wiya navo ngava tunga momo mu marunda. ²² Vikashama vyamu wiya vya ma mbungu ngavi dika mararo momo, ntani va mbwawa navo ngava tima makwina ghavo momo mu mbara yaku djonauka. Shirugho pepi shina kara makura shitata sha Babiloniya nga shi djonaukepo, kapi nga shi karapo.