¹ Hompa Karunga nga fera nkenda muhoko wava israeli; Ghuye nga toghorora muhoko wa Israeli vakare vantu vendi makura ngava vyuke ku shirongo shavo. Vantu va dimuhoko dapeke navo ngava ku pakerera kumwe ngava kwama mbunga yava Israeli navo ngava kare va Israeli. ² Vantunda-virongo ngava tapa mbatero ku muhoko wava Israeli ngava vyuke ku shirongo shavo. Vantu vantunda-virongo ngava kara varuwani vavo ngava ruwanene muhoko wava Israeli. Vantu va muhoko ovo vatuliro muhoko wa va Israeli mu upika navo ngava kara vapika va mulipangero lya va Israeli ngava ruwanene muhoko wava Israeli. ³ Liyuva pepi lina kara Hompa Karunga nga tapa lipwiyumuko ku kwenu va Israeli, anwe ngamu tunda muruhepo namu runyando rwa weno, ⁴ Hompa Karunga ngamu ghupa mo mu ghupika ntani anwe kapi nka ngamu kara na ghoma kehe ghuno, opo ngavi shoroka vya weno anwe ngamu mu shepa Hompa wa Babiloniya kumwe naku yimba ntjumo da weno ashi, "Ove muntu wamu kenya, viruwana vyoye vya vidona weno vina shayapo, ntani ove kwa shwaura va Israeli mbyo wa va tura mu ghupika namu runyando namu upyakadi, ano ngoli weno nyanya yoye yina shayapo! ⁵ Hompa Karunga nga tjora mburo dava pangeli va varunde, vavo kapi nka ngava pangera naku hepeka dimuhoko da vantu, ⁶ vavo ku homokera naku toghona naku hepeka kumwe naku tura vantu mu runyando rwaku pira kupwa, vavo kupangera dimuhoko na nyanya na rukisho na ugara, ntani vavo kwa tura vantu murunyando namu ruhepo shirugho sha shire shaku pira ku shaya. ⁷ Weno, mu shirugho shashi fupi tupu pa ntunda ya livhu mu udjuni ngamu kara mpora na mbili; vantu ngava tameka kuyimba ntjumo ngava dane. ⁸ Vitondo vya nyango vyamu wiya na vitondo vya uparara vyamu mburundu ngavi yimba ntjumo da ruhafo ku kwenu; Vitondo ngavi ghamba ashi, 'Kutunda tupu opo mwa tjwayuka mo muno mu shirongo, kwato ogho kayango mo mu wiya atete vitondo vyetu.' ⁹ Mayendo nama kwina mu virongo vya va fe kuna yashama kuna paturuka anwe vana ku taterera ngamu ka ngene mo. Mpepo dava fe kuna kumu taterera, va Hompa va kare navo kuna kumu taterera, na vantu va kare navo kuna kumu taterera, ngamu yende wangu muka ngene mo. ¹⁰ Vavo ngava ghamba kukoye ashi, 'Nove kwato nkondo weno. Ghuna ku fana natwe vaku pira nkondo. ¹¹ Ove kwa kalire na nkondo kwa wapire kwa nenepa mbyo wa yuvika naku ntje, weno ghuna fu mbyo ghuna yendi mu shirongo shava fe sha runyando na ruhepo kumwe na ntjumo doye uHompa. Rutu roye kuna rara kuna kara litjaro, ntani mavinyo kuna kara pa rutu roye yira ngugho yaku fika pa rutu.' ¹² Ove Lucifa, mbungururu yaku tema naku payima unene ku ngura-ngura muruvindwira yaku moneka kehe kuno! Ove kwa djonaura dimuhoko dadiyingi, weno nove wa karumuka wa tunda ko kuwiru mbyo wa wera pa livhu! ¹³ Ove kwa ghamba mu mutjima ghoye ashi, 'Ame nganu ronda ku liwiru, nganu ka ture lipuna lyande lya uHompa pa wiru-wiru ya mbungururu ya Karunga, makura nganu ka shungire pa wiru ya ndundu ya kuponga oko va ponga vapongoki, ame nganu ka kara ku ruha rwa ku mukuro wa ndundu. ¹⁴ Ame nganu ronda kuwiru-wiru nganu ka kare pa wiru ya maremo; name nganu ka kare yira Karunga wa munene.' ¹⁵ Weno nove ghuna ya tiki ku shirongo sha va fe, mu likwina lya lire lyaku pira uhura. ¹⁶ Vantu vamu shirongo sha va fe vana tetuka paku kumona omo ghuna fana, vavo kuku pura ashi vinke vya shoroko ku koye ghufane weno. Vavo kuna tetuka naku ghamba ashi, 'Vya ushili oghuno ndje muntu ogho ahepeko naku djonaura dimuhoko na virongo ndi, ¹⁷ ndje murume ogho adjonauro udjuni ghukare yira mburundu, kwa homokera naku djonaura vitata ntani kwa kwata vantu vamo ava ture mu mango ngava pire kuvyuka ku virongo vyavo?' ¹⁸ Va Hompa vakare vamu virongo, ovo va kaliro na mfumwa unene, kehe ghuno kwa kara na liyendo lyendi. ¹⁹ Ano ngoli ove kwato ogho nga vhumbiko rutu roye opo ngaghu fa ngaru rara pa livhu yira mutavi wa shitondo shaku tjoka. Ove ngaghu kara ghumwe wa vantu va vayingi ovo ngava dipaya na lighonga mu vita, makura ngava yende mu virongo vya va fe ku ntji mu makwina gha mawe. ²⁰ Rutu roye kapi ngava ruvhumbika mu mayendo ghava Hompa, mukonda shi ove kwa djonaura shirongo shenu ntani kwa dipaya vantu va vayingi vamu shirongo shoye. Ove muntu wamu runde ntani ruvharo rwa vantu vava runde ndo tupu ku dongonokapo." ²¹ Vantu ngava ghamba ashi, "Dipayenu vana vendi na vantje, mukonda ya ndjo da vakurona vavo, mposhi kapi shi ngava dike naku tunga vitata ngava kare vapangeli mu virongo ngava pire kuvhuka mu udjuni. ²² Hompa Karunga wa nkondo mupangeli wava Engeli kuna tanta weno: - "Ame nganu homokera nganu funde shirongo sha Babiloniya." Hompa Karunga kuna ghamba ashi, - "Ame nganu djonaurapo muhoko wa Babiloniya kumwe na vantu ovo vatungomo." ²³ Hompa Karunga wa nkondo mupangeli wava Engeli kuna tanta nka ashi, "Ame nganu tjidamo vantu mu shitata ngamu kare muporongwa, ndjugho ngadi kare mararo gha vidira vyava kakuru, ntani ndama da mema ngadi kara vidiva vya mema ghaku nwa vikorama na vidira, Ame nganu djonaurapo shitata kumwe na limona lyamo na lintje olyo lya karomo." ²⁴ Hompa Karunga mupangeli wava Engeli kwa turapo mughano wa weno ashi, "Navintje ovyo na turapo na nkango dande, vya kona ku shoroka, ngavi tikiliremo, yira momu na ghambire: ²⁵ Ame nganu djonaurapo vakavita vamu Asiriya ovo vakaro mu shirongo sha Israeli, ntani nganu valyatanga na vantje ovo ngava karo mu ntembeli yande yaku ndundu. Hompa Karunga nga ghupa djoko ditunde pa ntingo ya vantu vendi ntani nga ghupa mudigho ghutunde pa mapepe gha vantu vendi." Vantu va Hompa Karunga kapi nka ngava kara vapika ntani kapi ngava damuna mudigho wa udito pa mapepe ghavo. ²⁶ Hompa Karunga kwa yiva na vintje ovyo nga ruwana mu udjuni vyaku kumeho, ntani Ghuye nga neyeda lishandu lyendi nga tapa matengeko kudi muhoko na dintje damu udjuni. ²⁷ Hompa Karunga wa nkondo mupangeli wava Engeli mo ngoli ana ku ghamba weno; kwato waku vhura kutjindja naku rundurura maghano ghendi? Nkene kuna kutoghona muntu na lighoko lyendi, kwato waku vhura kumu kava? ²⁸ Mu mwaka waku fa Hompa Ahasi, Hompa Karunga kwa tapire mbudi ku kwande ya weno ashi: ²⁹ Kapi shi mukare na ruhafo, anwe va Filistine, mukonda vana nkore venu ovo vamu homokero na Hompa wavo weno vana fu. Ghuno Hompa kwa kalire na nyanya na urunde yira liyoka lya shipili lya ushungu, ano ngoli Hompa ogho nga kwamo ko nga kara na nyanya na urunde unene kupitakana liyoka lya shipili lya ushungu, ghuye nga fana yira liyoka lya shidjava lya ugara lyaku fuda naku tipa ushungu. ³⁰ Ano ngoli vantu vande vava nkundi ngava weka limona lyavo lya vindjwi mu shipata shande, ntani vavo ngava wana ghuvando mwa Hompa Karunga. Ame nganu dipaya muhoko wava Filistine ovo ngava hupopo na vantje ngava fa ku ndjara. ³¹ Anwe, va Filistine, lirenu naku kema, mu yimane mu mavero gha vitata vyenu. Karenu na ghoma mukonda shi vakavita va nkondo vava yingi ngava tunda ku ruha rwa mukuro ngava fana yira maremo gha matipu, ntani nkambe davo daku duka unene daku koka tukaru-kara na matemba ngadi fana yira maremo gha mbundu vavo ngava ku wapayikira kurwa vita. ³² Va Filistine ngava tuma vantu vatware mbudi ku va Israeli, ano ngoli va Israeli ngava limburura ashi, "Hompa Karunga ndje aturopo muhoko wa Siyoni mbyo ava toghorora vakare vantu vendi, ntani vantu vendi ovo vana karo murunyando namu upika ngava wana ghuvando mwa Hompa Karunga wavo."