¹ Mbudi yina tambo ku muhoko wava Mawabu. Hompa Karunga kwa tapire mbudi kwa Isaya yaku hamena muhoko wava Muwabu ashi, mu shikando shimwe tupu ku matiku vino vitata viviri; Ara na Kira vitata vya vinene vya mulyo navintje ngavi djonauka kumwe naku hanaukapo. ² Vantu va muhoko wava Diboni ngava yenda mu shitata, vaka ngene mu ntembeli yavo vaka lire, ntani vavo ngava ronda ku wiru ya ndundu vaka lire naku kema; vavo ngava lira unene opo ngava yuvha ovyo vya shoroko ku muhoko wa Nebo na Madeba ku virongo vyaku urundu. Vavo ngava kurura huki davo di tunde mo mu mutwe ntani varume ngava kurura ndjwedu davo ditundeko ngava kare mu liguvo lya linene. ³ Vantu ngava dwata ntjako daku djoghoka mu mandi ghavo; ntani vantu ngava ponga mu shitata namu ndjugho namu vitaura ngava lira naku roka maruntjodi ku vipara. ⁴ Vantu vamu shitata sha Hashibona namu doropa ya Eleyala ku ruha rwa mukuro wa shirongo shava Muwabu navo ngava lira unene ngava shana mbatero; vantu vaku doropa da ghure ngava va yuvha omo vana ku lira naku takuma. Mapenda gha vakavita va nkondo vamu shirongo sha Muwabu navo ngava lira naku takuma va shane mbatero; navo ngava kara na ghoma ngava ka nkama naku menga. ⁵ Hompa Karunga kuna ku fera nkenda muhoko wava Muwabu; vavo ngava tjwayuka va yende ku doropa ya Zoyari na Egalati-Shelishiya ku ruha rwa ghurundu wa shirongo. Vamwe ngava lira mu ndjira yavo yaku yenda ku doropa ya Luhita; vamwe ovo ngava yendo ku doropa ya Horonayimu ngava lira unene ngava tanta ku vantu mu ndjira yavo omo ya djonauka doropa yavo. ⁶ Mema ghamu litope lya Nimuremi ngagha pwilira; ntani mushoni ngaghu kukuta; ntani vitondo na ntjitwe yamu wiya ngavi kukuta; ntani kwato vimenwa vyavi teke ngavi hupomo. ⁷ Vantu vava Muwabu ngava damuna limona lyavo lyali yingi ngava tjwayukemo ngava vindakane mukuro. ⁸ Mu shirongo na shintje shava Muwabu vantu ngava lira naku kema; maywi ghavo ngagha ka tika ngagha yuvika ku virongo vyaku ghure, ku Egalayimu ku ghurundu wa shirongo naku Elimu ku mukuro wa shirongo. ⁹ Mema ghamu mukuro wa Dimoni ngagha kutjindja gha kare honde mukonda ya honde ya vantu ovo ngava dipaya; na mpili ngavi kare weno shimpe Hompa Karunga nga wederera runyando na mahepeko na ghupyakadi ku muhoko wava Muwabu. Ghuye nga tumwa va nyime va dipaye na vantje ovo ngava tjwayuko vatunde mu shirongo ntani kumwe navo ngava huparo mo mu shirongo.