¹ Va pangeli vava Mowabu ava ghamba ashi, "Atwe va pangeli va shitata sha Sela tughupenu limona na ushwi wa ndjwi-ghona tutape kuva Juda ngava pire ku tuma va kavita vatu homokere, tapenu limona mu tume vantu va tware vavo ngava pite mu mburundu va tware limona kwa Hompa ku Ndundu Ya Siyoni. ² Vakadi vava Mowabu ovo ngava vindakano mukuro wa Arunoni ngava kara vadike ngava kara pentjavo, yira vidira vyaku renda-renda vyaku pira uturo ovi vana tjida vitunde mu vitunguru. ³ Va twali mbudi vava Mowabu ngava lira kumwe naku ghamba ashi, "Tupoperenu, twenyenu tupu ovyo tumu ruwanena; tupenu ghuvando tuvande ku shite sha liyuva lya ghupyu; atwe kuna kuduka tutjire vana nkore vetu, kapi shi mutu tape muma ghoko ghava na nkore vetu. ⁴ Poperenu muhoko wetu wava Mowabu ovo vana ku tjwayuko vaduke va shane ghuvando ku kwenu; va poperenu kuva na nkore vavo ovo vana ku shano kuva dipaya vava manepo." Mposhi runyando na rukisho na ghupyakadi ngavi shayepo, na lidjonauko ngali shayepo ntani vana nkore ngava tundemo mu shirongo. ⁵ Hompa Karunga nga turapo liku kwata kano nga toghorora Hompa mu lira lya David nga kare mupangeli wa uhunga; ghuye nga pangera mu uhunga na nkenda namu ushili. Ghuye nga pangura mu uhunga namu ndjira ya yiwa namu ushili. ⁶ Atwe muhoko wava Juda kwa yuvha muhoko wava Muwabu omo wa yuvika naku ku nenepita, naku ku tumba, mbyo vakara na lishandu ntani na nyanya. Ano ngoli nkango davo odo vagha mbanga kwato ushili. ⁷ Vantu va muhoko wava Mowabu ngava ku lira vene-na-vene - ngava kara muma lira-nkali! Vavo ngava lira unene mukonda shi vikuki vyamu shitata ngavi djonaukapo, ntani ngava lira mukonda ya vikuki vyaku djonauka mu shitata sha Kiri-Hareseti, ntani ngava lira unene mukonda ya vantu vamu shitata ovo ngava dipaya. ⁸ Nyango yamu lifuva lya Hashibona ngayi kukuta ntani vitondo vya mandjembere navyo ngavi kukuta mu shipata sha Sibuma. Vana nkore na vakavita na vapangeli ngava djonaurapo muhoko wava Muwabu, vavo ngava fana yira shipata sha mandjembere sha vitondo vyaku yima unene kutunda ku ruha rwa mukuro wa Jaseri, shiyende ku ruha rwa ghupumeyuva wa mburundu. Vitondo kwa mena dimutavi mbyo vya kura naku sharava viyende dogoro ku ruha rwa utokero, wa lifuta lyaku fa. ⁹ Name na Jaseri ngatu lira kumwe shipata sha mandjembere sha Sibuma. Atwe ngatu lira ngatu tekera muruntjodi ghetu, mu shipata sha Heshibona na shipata sha Eleyali. Mu shipata kapi ngamu mena naku yima nyango na muyangu pa ruvede rwa kurombo ntani kapi ngava kara mu ruviya mu shirongo. ¹⁰ Vantu kapi ngava kara mu ruviya na ruhafo rwaku nyanga nyango; kapi ngava yimba ntjumo, kapi ngava kara na ruhafo pa ruvede rwa lipemba. Kapi ngava ruwana marovhu ku mandjembere, ntani kapi ngava kara na lipemba na ruviya na ruhafo. ¹¹ Ame kuna ku kora naku lira munda ya mutjima wande yira kuna kuyimba ntjumo damu litamu, ntani ame kuna kara na liguvo unene ku vantu vamu doropa ya Kiri-Haresati. ¹² Vantu vava Muwabu ngava ronda pa wiru ngava ngene mu ntembeli yavo ngava raperere, ano ngoli kapi ngava wana mbatero ntani kapi ngava tundamo mu udito namu ghupyakadi. ¹³ Hompa Karunga kwa tapa kare yino mbudi shirugho shaka pito ku muhoko wa Muwabu. ¹⁴ Hompa Karunga kuna ku ghamba nka vyaku meho ashi, "Mu mwaka ntatu tupu daku meho, untungi wava Muwabu ngaghu dongonokapo na ghuntje; ntani shivaro shavo sha mbunga yayinene yava Muwabu ngava sheshupa unene; ngava huparapo tupu vava sheshu ntani kapi nka ngava kara nkondo na mfumwa."