¹ Hompa Karunga kwa tapire yino mbudi kwa Jesaya yaku hamena ku Damaskus. ² Shitata sha Aramu ngashi djonaukapo. Shino shitata ngashi hanaukapo ngashi kara mulyero na mararo gha vikorama, ntani kwato ogho nga vhuro kuvi tjidamo ngavi tundemo. ³ Shitata sha Efraimu ngashi dongonokapo, likuma lyaku kundurukita shitata ngali bomoka liwe pa livhu, ntani untungi na nkondo da shitata sha Damaskus ngadi shayapo, ntani vantu vava sheshu ovo ngava hupomo mu shitata sha Aramu - ngava shwauka yira momu va shwaukire va Israeli - Hompa Karunga mupangeli wava Engeli mo ana kutanta weno. ⁴ Opo ngashi tikamo shino shirugho untungi wa Jakopu ngaghu sheshupa, ntani vantu vaku neta ngava tongama ngava kara vifupa-fupa. ⁵ Shirongo shavo ngashi fana yira lifuva lya mahangu va kesha mbuto ya mahangu mbyo va shuva mo virwenge, ntani kwato vya mulyo ovyo vya hupomo. Shirongo shavo ngashi fana yira muramba wa Refayimu waku kena yira liyana na lifuva lyaku kena. ⁶ Vantu vava sheshu tupu ngava hupomo va muhoko wava Israeli, yira momu tupu da hupangako ndjwe dadi sheshu ku shitondo paku mana ku nyunga shitondo diwe ko ndjwe da kupya: kehe kuno kumu tavi ku hupako tupu nyango da ndjwe mbiri ndi ntatu tupu, ntani kumu tavi wa peke wapa wiru nako ku hupako tupu ndjwe ne ndi ntano tupu makura - yino ndjo mbudi ana ku ghamba Hompa Karunga, wa Israeli. ⁷ Opo ngashi tikamo shirugho anwe va Israeli ngamu huguvara mwa Hompa Karunga mu shiti wenu, ntani ngamu ka nkuka mukenge kwamu shiti wenu wa kupongoka wa Israeli. ⁸ Vavo kapi nka ngava djamba ndjambo ku vaKarunga vavi ntjwantjo, ovo va ruwana na maghoko ghavo, kapi nka ngava tongamena ku ngundi da utara, ntani kapi ngava tongamena ku vaKarunga va mafano, na vishwi ovyo vashonga na maghoko va tutumukite muti. ⁹ Opo ngashi tikamo shirugho vitata vya vinene vyamu Israeli ngavi kara muporongwa, yira momu sha kalire virongo vya Hiva na shirongo sha Amora opo vashi homokilire va Israeli makura vantu ava tjwayuka vatundemo mwaka dina kapito makura shirongo ashi kara muporongwa na mpuku. ¹⁰ Ovino kwa shoroka mukonda mwa shuva Karunga muyogholi wenu, liwe lya monyo lya nkondo mupopeli wenu. Anwe mbyo mwa tapeka vitondo vya mandjembere ovyo mwa wana ku virongo peke ovyo mwa pira kuyiva, ano ngoli na mpili ngavi shoke dimu tavi naku yungira dimu cuko naku yima nyango, ¹¹ ano ngoli kapi ngamu wana mo muyangu. Vitondo na nyango ngadi kura wangu naku temuna unene, ano ngoli kapi ngamu wanamo muyangu wa ma ndjembere, ano ngoli anwe ngamu wana mo tupu liguvo na ruhepo na upyakadi. ¹² Lihudi lyanu! Anwe vakavita vamu virongo vyava na nkore yetu, anwe nkondo unene yira lifuta lya mema gha ugara, anwe ngamu duka unene yira mema ghamu lifuta lyama nkumpi gha nkondo na ugara! ¹³ Na mpili weni ngamu kara na vakavita va nkondo unene yira lifuta lya mema ghama yingi gha ugara, opo nga haruka Hompa Karunga, navantje ngava duka ngava tjwayuka ngava kuhanauke, vavo ngava duka yira mpepo yaku yunga unene yina kuyendo ku ndundu, ntani vavo ngava ya mbuka kuwiru-wiru yira mushoni waku kukuta ghuna yambuko kuka kundu-kundu na likundungu. ¹⁴ Ku ruvede rwa ngurova, anwe va Israeli ngamu kara na ghoma unene! Ano ngoli ngura-ngura opo ngali ka puma liyuva vana nkore venu navantje ngava hanaukapo naku dongonokapo! Ovino mbyo ngavi shoroko kwavo ngava homokero shirongo sha Israeli ngava shakane upingwa na limona lyavo.