¹ Lihudi unene ku kwenu anwe vantu vamu shirongo sha Ethopiya, anwe mwa tungo kuntere ya mukuro wa Nale omo akara mawato ghama yingi unene; ² va mpititi venu kwa tuma vantu vavayingi vayende mu lifuta, na mawato ghaku shonga na vitondo. Tanterenu, vantumi venu va kwangure kuyenda, vatware mbudi ku vantu vamu Ethopiya vadi mukurutika vaku shovagana, naku dimuhoko na dintje dapepi nadi daku ghure, da nkondo odo da fundo naku hanaurapo dimuhoko nadintje, makura mukoro mbyo wa taura shirongo shavo mukatji shikare maruha maviri. ³ Anwe vatwali mbudi tanterenu vantu na vantje ovo vatungo mu udjuni pano pa ntunda ya livhu, opo ngava mona vakavita vana shintji lirembe pa wiru ya ndundu, muna hepa kuvangara naku terera nawa opo ngava shiva rumbendo rwa ruvinga rwa Horongo, karenu muna kotoka kutanta ashi shiyivito vita kuna kutameka. ⁴ Hompa Karunga atapa mbudi ku kwande ya weno ashi, "Ame nganu shungira mu liwiru ku lipuna lyande lya uHompa nganu mwena teyete, makura nganu kenga tupu na mantjo na vintje ovyo ngavi shoroko, ntani mantjo ghande ngagha pahuka naku kenga yira liyuva lyaku tweda unene shite shaku yita ghupyu pa ruvede rwaku rombo, ntani ame nganu kara yira liremo lya nkondo lyaku viva pa shite sha liyuva lyaku tema unene pa ruvede rwa lipemba. ⁵ Kumeho yaku pya muyangu, muntu waku lima lifuva ku mona muyangu wendi wa mandjembere omo ayima naku temuna naku pateka mu shipata nomu ana kupya, ntani ghuye ayiva ashi weno ruvede rwaku yangura akona kuteta ko dimu tavi da mantjembere ghaku pya, mposhi dishokereko dimu tavi dadipe, Hompa Karunga mo ana ku tanta weno ashi ghuye kwa yiva shirugho osho nga tuma vakavita vendi ngava homokera di muhoko dava na nkore vendi. ⁶ Ghuye nga dipaya vana nkore vendi mposhi vidira navi kashama vyamu wiya ngavi lye nyama. Vidira vyamu wiya navi vyaku ndundu ngavi lya nyama ya vimpu vyama rutu ghavo pa ruvede rwaku rombo ntani pa ruvede rwa kufu vikashama vyamu wiya navyo ngavi lyapo vifupa na vintje ovyo ngavi hupopo." ⁷ Opo nga litika mo lino liyuva vantu na vantje va nkondo vamu Ethopiya vadi mutundutika va vashovagani vantu ovo vatungo mu shirongo omo wa taura mukuro mukatji, vapa pepi ntani nava vaku ghure, ngava kara na ghoma navo ngava tongamena naku tapa vitapa kwa Hompa Karunga wa nkondo mupangeli wava Engeli, waku Ndundu ya Siyoni.