¹ Ame nakuwapiyikilire mukukushorora ku vantu ovo vapiliro kumpura; ame nakuwapayikilire mukungwana ovo vapiliro kuntjana-ntjana. Ame anighamba ashi, 'Ame uno! Ame uno! Kumuhoko wapiro kuyita lidina lyande. ² Ame nayandjumuna maghoko ghande liyuva nalintje kuvantu vakatino, ovo vayendndango nandjira yakupira kuhungama, ovo vakwamango maghano na vighayadara vyanaumwavo! ³ Vavo mbo vantu ovo vanakutwikiro kutjutjupita kumutjima, vavo kudjamba ndjambo muvipata, nakushwakerera vinukito vyalidumba pavilyatero vyavo vyaufughuli. ⁴ Vavo kushungira mukatji kambira nakuyavarera matiku mudima, nakulya nyama yashinguru kumwe nakupoma nyama yakunyata pavisha vyavo. ⁵ Avaghamba ashi, 'Kuporenu ko, mwasha ntjwenena pepi name; ame napongoka kupitakana anwe.' Ovyo vininke muti mumayuru ghande, mundiro wakutwera liyuva mudima. ⁶ Kengenu, vavitjanga kumeho yande me: kapi nimwena, nganivafuta nivavyutire; nganivafutanivavyutire kutwara muvirugho vyavo, ⁷ mukondashi ndjo davo nandjo davanyakulya-vanyakulya vavo kumwe,'' mo anakughamba Yehova. ''Ame ngani vafutita mukonda yakushwakerera vitutumukita dumba pandundu ghona mukuntjwaura, ame ngani meta nakurupwita viruwana vyavo vyapakare mumaghoko ghavo.'' ⁸ Vino mbyo anakughamba Yehova, ''Yira moomo tupu vawananga vinwa varuwanita kumandjembere mushishimbiro sha mandjembere, opo aghamba ghumwe ashi, 'Mwasha vidjonaura, mukondashi uwa unakaro mo,' vino mbyo nganiruwana mukonda yavakareli vande: ame kapi nganivadjonaura navantje. ⁹ Nganikayita ruvharo kutundilira kwaJakopo, nakutundilira kuvamwe va vaJuda ovo ngavapingo ndundu dande. Vahoroghorwa vande ngavapinga livhu, ntani vakareli vande mbo ngavatungo mo. ¹⁰ Sharon ngakara ghulitiro wavighunda, ntani na liyana lyaAchor ngalikara livango lyakupwiyumukira vighunda vyavimuna, mukonda yavantu ovo vantjanango. ¹¹ Ngoli anwe mwatjwayuko mushuve Yehova, anwe mwavhuramo ndundu yande yakupongoka, vawapayiki ntishe dalimona, nakuyuda nkinda da vhinyu dakuvonga-vonga vhinyu odo ngavaruwanita kumeho. ¹² Ame nganimuhorowera rufuro, ntani ngamutongamena kukatomeno, mukondashi opo namuyitire, anwe kapi mwapulire; opo naghambire, kapi mwateghelilire. Ngoli anwe amuruwana udona muvikenga mantjo ghande ntani nakuhoroghora kuruwana vyakupira kuhafita ame.'' ¹³ Vino mbyo anakughamba Hompa Karunga, ''Kenga, mukareli wande ngalya, ngoli ove ngaufa ndjara; kenga, mukareli wande nganwa, ngoli ove ngaufa linota; kenga , mukareli wande ngahafa, ngoli ove ngavakufita ntjoni. ¹⁴ Kenga, mukareli wande ngayighira mukonda yaruhafo rwa mutjima, ngoli ove ngaulira mukonda yatjutju yakumutjima, ntani ngaukunungilira mukonda yalidjonauko lyampere yoye. ¹⁵ Ove ngaushuva kuruku lidina lyalidona ashi muntu ogho vafinga mposhi ovo vahoroghora ngavalitwenyaurange vakushoreko, ame, Hompa Karunga, ngani kudipagha; ame ngani yitita mukareli wande lidina lyapeke. ¹⁶ Kehe uno ngayuvhito matungiko pantunda yalivhu ame nganimutungika, ame Karunga waushiri. Kehe uno ngaghano mughano pantunda yalivhu ngaghano kukwande, ame Karunga waushiri, mukondashi ovyo kaviyititangopo udona pakare ngamuvivhurama, vyavyo ngavihorama kughuto washipara shande. ¹⁷ Kenga shi, ame kuna kushana niruwane liwiru lyalipe na livhu lyalipe; vininke vyakare kapi ngamuvivhuruka ndi viye mumaghano ghenu. ¹⁸ Ngoli anwe ngamuhafa nakupembura kunaruntje kwavyo nakushana kuruwana. Kenga, ame nashana kuruwanaJerusalemu akare ruhafo, ntani vantu vendi vakare vakuyititapo ruhafo. ¹⁹ Ame nganihafa kuhama Jerusalemu nakupembura kuhama kuvantu vande; malirankali na mukatu wakushana mbatero kapi ngamuviyuvha nka mukatji kenu. ²⁰ Narumweshi nka ngavaparuka vanuke shirugho shashifupi; ndi ashi mukurupe afe kumeho yakutikamo ruvede rwendi. Ogho ngadohoroko ghuye anakara namwaka lifere ngavamuvarura shi shimpe mwanuke. Kehe uno ngapiro kutika kumwaka lifere limwe ngavamukenga shi kwamufinga. ²¹ Vavo ngavadika ndjugho nakutunga mo, ntani ngavatapeka vipata vya mandjembere nakulya nyango damo. ²² Kapi nka ngavadika ndjugho ashi vapeke vatungemo; kapi ngavatapeka, ngavavilye vapeke; yira moomo ghakura mayuva ghavitondo mo ngaghakara mayuva ghavitondo mo ngaghakara mayuva gha vantu vande. Ogho natoghorora ngaparuka kupitakana viruwana vya maghoko ghendi. ²³ Nkondo davo kapi ngadikuhepera maghoko-ghoko, nakushampuruka shi kwavi vyakutetukita. Mbyovyoshi vavo vana vavo atungika Yehova, naruvharo rwavo naro. ²⁴ Kumeho vandjite, ame nganivalimburura; ntani vavo shimpe kuna kughamba, ame nganiviyuvha. ²⁵ Mambungu na vindjwi ghona ngavilya kumwe mushoni, vanyime ngavalya mushoni yira hove; ngoli mbundu ngayikara ndya daliyoka. Ghagho kapi nka ngaghashuma ndi ghadjonaure pa ndundu dande dakupongoka,'' mo anakughamba Yehova.