¹ Vino mbyo aghambire Hompa, ''Liwiru ndyo shipuna shande, ntani livhu shilyatero shampadi dande. Kuninko ndjugho oyo ngundikira me? Kuninko kulivege oko nganivhura kupwiyumukira? ² Maghoko ghande ngo ghaviruwano vino navintje; ngoli mo vyayire vininke viyakare- uno ngo umbangi waHompa. Uno ndje murwana napulitire me, kwayadjonawirepo likuyuvho na mpepo, ntani ogho ngalimburuko kunkango dande. ³ Ogho ngadipagho ntwedu ghuye ana dipagha muntu ogho ngadipagho ndjwi ghuye ngateta ntingo yambwa; ogho ngadjambo ndjambo yambuto ghuye ngadjamba honde yashinguru; ogho ngadjambo ndjambo yakututumikida vyalidumba lyaliwa nevi nka vyalidumba lyalidona. Vavo kwaghupire kutwara muvavene, ntani vavo kwavihafera. ⁴ Murupe ndoro nka ame nganivapa kashitiko; nganivayitira pavo mbyevi vatjira, mbyevishi apa nakughire, naumweshi alimbuliro; opo naghambire, naumweshi ateghereliro. Vavo kwarughanine vyavidona mushikenga mantjo ghande, ntani avatoghorora kuruwana evi vyangarapitango me.'' ⁵ Yuvhenu nkango da Hompa, anwe ngamukankamo kunkango dendi, ''Vakuru venu ava vanyengo ntani kughupako ve mulidina lyande nakughamba, 'Hompa ndi akutungike, mposhi ngatumone ruhafo roye,' ene ngoli vavo ngavavatura mulishwaghu. ⁶ Mushagharo wa vita kwatundire munkurumbara, mushagharo wamuntembeli, mushagharo wa Hompa mukuvavyutira vanankore. ⁷ Kumeho yakuyenda kulishampuruko, ghuye ngashampuruka, kumeho tjutju yikare pendi, ashampuruka mona wamumati. ⁸ Are ayuvho vyakuhamena kovyo? Are amono vya weno? Kuvhura udjuni kushishita muliyuva limwe? kuvhura shirongo kushishita pashirugho shashifupi? Waro mushirugho Ziyoni ayenda mushishamurukiro, ghuye kwashampuruka vana vendi. ⁹ Kuvhura ame niyete mukeke kuligharuro lyalishampuruko ntani nakudira kupulitira mwanuke mukumushampuruka ndi?- mo anakupura Hompa. Ndi po ame kuyita mwanuke kushirugho shalitikiliremo ntani nakumuvikwata waro?- mo anakupura Karunga.'' ¹⁰ Shambererenu kuJerusalemu ntani nakuyihafera, anwe mwayihoro; yishambererenu, anwe mwayinyongamenango! ¹¹ Anwe ngamuyikwata nakuyigwaneka; namashwe ghayo ngavamushengawida; mbyevishi ngamuyinwa nange kukuta nakuharefa uyerere wayo. ¹² Vino mbyo aghambire Hompa, ''Ame nganimuyitira ungawo ukure yira mukuro, ntani ngamukara muhoko waungawo yira moomu wapupanga muramba. Anwe ngamupangera papantjendi, ngamukwaterera mumaghoko ghendi, ntani nakumusheva nakumukwataura muntingo. ¹³ Shika moomu nyokwa ashengawidanga vana, mo nganimushengawida nanwe, ntani ngavamushengawida muJerusalemu.'' ¹⁴ Ngamuvimona vino, ano dimutjima denu ngadishamberera, ntani vifupa vyenu ngaviporoka yira mushani wauteke, ene ngoli nganegheda kugara kuvanankore vendi. ¹⁵ Mpo ngoli shi kengenu, Hompa kuna kuya namundiro, ntani tukarukara ngatuya yira shipupiro shamukerekeshe mukuyita upyu waugara wendi ntani nalivyuto lyamundiro muruku. ¹⁶ Mpo ngoli Hompa ngadipagha nakupangura paghuntu namundiro ntani narufuro rwendi. Ovo ngadipagha Hompa ngavakara vayingi. ¹⁷ Vavo vavikupa panaumwavo ntani vakuturashi vavyukilira, makura vavo ngavakangene mushikunino, mukukwama umwe akaro pakatji kambovo valyango nyama yashinguru ntani vininke vyapiro mulyo yira vampuku. ''Vavo ngavaya kughuhura- ghuno ngo umbangi waHompa. ¹⁸ Mbevishi ame nayiva viruwana vyavo na maghayaro ghavo. Ruvede kuna kuya opo nganipongeka virongo navintje na maraka naghantje. Ngavaya nakumona uyerere wande. ¹⁹ Ngatura shiyivito mukatji kavo. Makura nganituma vaparuki mukatji kavo kuvirongo: kuTarshish, vaLybiani ntani Lydiani, vaponyi vangumba, kwa Tubal, Greece, ntani kumavango ghaure kuntere yalifuta ovo vapiro kuyuva mbudi kuhamena kwande ndi po vamone uyerere wande. Vavo ngavakayuvita uyerere wande mukatji kavirongo. ²⁰ Vavo ngavakavyuta vakuru venu navantje mudimuhoko, ngavakare ndjambo kwaHompa. Ngavakaya patukambe, ntani natukarukara, pa matemba, parupadi, ntani na pangamero, ku ndundu yande yakupongoka Jerusalemu- anakughamba Hompa. Vantu vaIsraeli ngavayita ndjambo yambuto yamunkinda yakukena mundjugho yaHompa. ²¹ Vamwe ko ame nganivatoghorora vakare vapilisteli ntani vaLeviti- anakughamba Hompa. ²² Mbyevishi yira mawiru tupu ghamape na ntunda yalivhu yayipe oyo nganitura yikare kumeho yande- ghuno ngo umbangi waHompa- makura anwe ruvharo rwenu kurukara. ²³ Kutunda mwedi yenda mwedi, ntani kutunda Sabata yenda Sabata, vantu navantje ngavaya vayantongamene- mo anakughamba Hompa. ²⁴ Vavo ngavayenda nakukenga marutu gha vantu ovo vakuvyukiro name, ano mavinyo avalyo kapi ngaghafa, ntani mundiro vavashoro kapi ngaudima; ntani vino ngavikara vineghedito kuvantu navantje.''