¹ Hawe, ntjene ghugaununa kugharura mawiru nakughurumuka! Ndundu ndi dakunyungire kughuto ghoye, ² yira moomo wadira nkenda mundira kuvishwa, ndi mundiro omo wavilitanga mema. Hawe, mposhi lidina lyoye ngavaliyive vanankore voye, dimuhoko ngadikankama kughuto ghoye. ³ Ruvede pita, apa waruwanine vininke vyaviwa evitwadilire kutaterera, wadumpukire, ndundu dakankamine kumeho yoye. ⁴ Kutunda kuruvede rwa vakuru varuvaro kwato nka ogho ayuvho ndi adimbururo, kwato lintjo lyamono Karunga kughupako ve, ogho kamuruwanenango po vininke oghu kamutatererango. ⁵ Waya mukuvatera ava vashamberero mukuruwana vya viwa, ovo va yitango muku kwama ndjira doye mukulimburukwa. Wagarapire apa wadjonine. Mundjira yoye naruntje ngatuyoghokera. ⁶ Mposhi natuvantje tuna kara yira vanya vakupira kukena, naviruwana dona vyetu navintje kuna kara yira shikeshe shakumwedi. Natuvantje tuna tukuka yira mahako; ndjo detu, yira mpepo, yina tupepumuno. ⁷ Kwato ava va yitango po lidina lyoye, ava vakukuturamo mukutwikira poye. Watuhorekera shipara shoye naku turenka tupire nkondo mumaghoko gha ndjo detu. ⁸ Shimpe, Karunga, ove shetu; atwe lirova. Ove muhungi wetu; navintje viruwan vyamaghoko ghoye. ⁹ Washa garapa unene, Karunga, kapi waturukitanga kehepano ndjo detu. Tunakanderere tukenge natuvantje, vantu voye. ¹⁰ Nkurumbara doye dakupongoka dina kara mburundu; Zion yina kara mburundu, Jerusalem muporongwa. ¹¹ Ngereka detu dadiwa dakupongoka, omu kavakukareranga vashetu, vana didjonaura ku mundiro, ntani navintje kwavyo twaholire vina djonauka. ¹² Weni mo shimpeukwaterera kunyima, Karunga? Weni mo umwenena nakutwikira kutu shwaura?