¹ Ame ghuno ogho atundo kuEdom, mumudwato waugeha, kutunda muBozrah? Aregho mumudwato waghuHompa, kuyenda namukumo mukonda nkondo dendi dadinene? Ame ne me, nakughamba ghuhungami nankondo nkondo dakuvhura kuyoghora. ² Vinke unagehere mudwato wenu, ntani vinke una kumonekera yira kwa kendjanga mandjembere gha vhinyu. ³ Nayendaura muvhinyu yamandjembere mpentjande, ntani kwato umwe wamumuhoko akupakiliro name. Nava yendilire naugara kuvalyandangera mu ugara wande. Honde yavo vana yitetere pamudwato wande ntani kudivika mudwato wande naghuntje. ⁴ Mpo nakengire kumeho kuliyuva lya kuvyuta rughoko, namwaka walipopero lyande unatiki. ⁵ Ani kenge, ntani kwato umwe wakuvatera. Anidimburura ashi kwato wakuvatera, mora lighoko lyanaumwande alindjitili lifundo, naugara wande wankondo aghu ntwara. ⁶ Nalyatilire vantu muugara wande nakuvatura vakorwe mu ugara wande, ntani anitere honde yavo muudjuni. ⁷ Ngani tanta viruwana vya Karunga mukukwatitako lipuliro, kupira kupitira viruwana vya Karunga. Ngani tanta navintje evi aturuwanena Karunga, na unene wauwa wendi kundjugho yava Israeli. Eli likano lya uwa atu negheda mukondankenda yendi, ntani naviruwana vyavingi vyakukwatitako lipuliro. ⁸ Mpo aghamba ashi, ''Pakashirugho vano vantu vande, vanuke vakupira ghuHompa.'' Anakara mupopeli wavo. ⁹ Mumahepeko ghavo naghantje, ahepire naye, ntaniva engeli mulikaromo lyendi vamuyogholire. Mushihoro shendi na nkenda ava popilire, ntani ava yerura na kuvashimba muvirugho navintje vyakare. ¹⁰ Ano ngoli avashapukita na ruguvo mpepo yendi yakupongoka. Makura akara munankore wavo na kurwana avavyuke. ¹¹ Vantu vendi vaghayalire kuhamena shiruwo shakare sha Moses. Ava ghamba shi kuni karunga, ogho avatunditire mulifuta navakareli ya ndjwi? Kuni Karunga, ogho atulire mpepo yakupongoka yendi pavo? ¹² Kuni Karunga, ogho a ruwanino nkondo dendi dikuwe nalighoko lyarulyo lyaMosesa, nakugaununa mema kumeho yavo, mukutura lidina lyendi likarerepo? ¹³ Kuni Karunga, ogho avapititiro mumema ghaudami? Yira nkambe yinakuduko palivhu lyakushetakana, kapi vapundukire. ¹⁴ Yira ngombe dakughurumuka mulidamenena, mpepo yaKarunga avapire lipwiyumuko. Ano aghupititiri vantu voye, kutura lidina lyoye valitangauke. ¹⁵ Kenga palivhu kutunda kuliwiru nakughupa likoneko kughupongoki ghoye na nkalito yaghupongoki kuni nkondo doye na unankondo waviruwana vyoye? Nkenda yoye nakuyuvira nkenda viruwana vyoye watulika kukwetu. ¹⁶ Koye ove shetu, nampili Abrahamu kapi atuyivire atwe, ntani Israeli kapi atudimburura, ove Karunga, shetu. 'Muyogholi wetu' lyakara lidina lyoye kutundilira kushikuru. ¹⁷ Karunga, vinke watugaunwina mundjira yoye nakuditopeka dimutjima detu, ano tudire kukukwama? Vyuka mukonda yavakareli voye, muhoko waupingwa ghoye. ¹⁸ Vantu voye vakaliro nalivango lyakupongoka shirugho shashifupi ene ngoli vanankore vetu vavilyatengelire. ¹⁹ Tunakara yira ovanya wadira kupangera rumwe kuyita palidina lyoye.''