¹ Mukonda ya Zion kapi nakamwena, nka mukonda yaJerusalem kapi nakamwena. Dogoro ghuhungami ngaghuyererere paghukenu, ntani liyoghoko yira ramba yakutwera. ² Dimuhoko nadintje ngadikenga ghuhungami ghoye, ntani yaHompa navantje namfumwa. Ngavamuyitita madina ghamape ngatovorora Hompa. ³ Ngavakutungika ghuye mulighoko lyaHompa, ntani mudwato ghoye wakumutwe pa shihompa mulighoko lyaKarunga ghoye. ⁴ Kapi ngavaghamba nka koye ''Kushwilira''' ndipo shirongo shoye nka vashighambe, ''Ruguvo'' ushiri, ngavakuyita ''Ruhafo rwande mwendi,'' ntani shirongo shoye ''Nkwara,'' daHompa ruhafo mumoye, ntani shirongo shoye ngava shikwara. ⁵ Ushiri, yira mumati ghona anakwaro mukadona, mpo ngoli shi vana vavamati ngava kukware, ntani yira mukwali ana kushamberero mufuko wendi, Karunga ghoye ngahafa. ⁶ Natura mukengeli kulikuma lyoye, Jerusalem; kapi vanamwena mwi ndi matiku. Ove wavhurukitango Hompa, washa mwena. ⁷ Washa mupulitira arare dogoro akatungurure Jerusalem nakuliruwana lishamberero pantunda yalivhu. ⁸ Hompa ana ghana nalighoko lyendi lyarulyo ntani nalighoko lyandi lyankondo, kapi ngani tapa nka rukokotwa yira ndya kuva nankore voye. Vantundavirongo kapi ngavanwa vinyu yoye yayipe, oyo waruwanena. ⁹ Ovyo ngava yangura rukokotwa nga valya nakupandura Hompa, ntani ovyo ngava doghora mandjembere ngava nwa vinyu munkinda dampepo ¹⁰ Yenu mo, yenu mo mupitire kuheka! Wapa yikenu ndjira davantu venu! Ditungenu, tungenu dadire! pongayikenu mawe! Yerurenu shiviyito shalirembe sha dimuhoko! ¹¹ Kenga, Hompa kuna kupukurura dogoro kughuhura wa udjuni, ''Ghamba kwa monakadi waZion: kenga, muyogholi ghoye kuna kuya! Kenga, mfuto nayo anakara, ntani vifutwa vyendi kuna kumukwama.'' ¹² Kuvakuyita, ''Vantu vakupongoka; vayoghorwa vaHompa,'' nka ngavamuyita, ''Ovyo wayangura; mushitata vashuvilira.''