¹ Kububuka, kumoneka; mughukenu wenu unaya, ntani uyerere waHompa ana mumonekere ² Mpili ngoli mundema ngaufika livhu, ntani ngaukwata mundema mushirono; shimpe Hompa ngamoneka kwenu, ntani uyerere wendi ngaghumoneka kwenu. ³ Muhoko ngauya mughukenu ghoye, ntani Hompa mukumoneka liyuva olyo ngalitwero. ⁴ Kengurura nakuntje ukenge. Navantje avakupongeke naumwavo pamwe nakuya koye. Monoye wamukafumu ngatunda kuure, ntani wamukamali ngaumushimbira mumaghoko. ⁵ Ntani ngaukenga naruhafo, ntani dimutjima ngadi hafa ntani ngauyenderera, mukonda yakuyura kwalifuta ngavitetamo koye, ungawo waudjuni ngaumoneka. ⁶ Ndjugho yangamero ngayikufika, ngamero yaMidiyani na Epha; navantje ngavaya kutunda kusheba; ngavayita ngorodo nalidumba lyaliwa, ntani ngayimba nakushamberera Hompa. ⁷ Shighunda nashintje sha Kedari ngaviponga pamwe koye, ndjwi dadirume da Neboioth kwakuwa ovyo washana; ngavavitambura vitapa kushidjambero; ntani ngani pongora ndjugho yande nauyerere. ⁸ Vare vano ngavatuko kumwe yira maremo, ntani yira maputukuwa mundjugho? ⁹ Livango lyalifuta ngalintjana, ntani vikepa vya Tarshish ngavipititira, mukuyita vana vavakafumu kutunda ure, shiliveli na ngorodo davo, mulidina lya Hompa Karunga wenu, ntani namupongoki ghumwe waIsraeli, mukonda amupongora. ¹⁰ Vana vavatjwayuki ngavadikurura likuma lyoye, ntani hompa wavo ngavahora; mpili muugara wande namutengikire, shimpe nka mushihoro shande nganimufera nkenda. ¹¹ Heka denu ngadikara kugharuka-gharuka; kapi ngavadighar mwi ndi matiku, mbyevishi ungagho washirongo ngavashiyita, ngapititira hompa wenu. ¹² Weno nka, virongona dimuhoko ovyo ngavadira kuhora ngavidongonoka; odo dimuhoko ngavadidjonaurapo kupitakanena. ¹³ Ghuyerere waLebanoni ngauya koye, vitondo vyaufughuli, na vitondo vyamumapakote kumwe, mukuviwapeka mayendo; ntani nganivayererepeka mulivango lyamapadi ghande. ¹⁴ Ngavaya koye ngavayakunyongamene, vana vavakafumu ovo vakunongopa; ngavakunyongamena kumpadi doye; ngavakuyita mushitata sha Hompa, Zioni wakupongoka ghumwe waIsraeli. ¹⁵ Mulivango lyakukara shi lyakukushuvilira nakukunyenga, mukupira ghumwe wakupita koye, nganikutura shininke sharuhafo naruntje, ruhafo rwarunene kutunda muhoko yenda muhoko. ¹⁶ Ngaunwa mashini gha udjuni, ntani mupangi kumashwe ghavahompa; ngauyiva ashi ame, Hompa, ame mupopeli ntani muyogholi, umwe wamunene waJakopo. ¹⁷ Mulivango lyangoporo nganiyita ngorodo, mulivango lyashikugho shakuvembera nganiyita shiliveli; mulivango lyavikuni, ngoporo, ntani mulivango lyamawe, vikugho. Nganitulitapo mpora muvanguuru venu, na mpora vapangeli. ¹⁸ Marwanambo kapi ngaghakarako mushirongo shenu, ndi lidjonauko ndipo ruhepo mukatji kadimurudi; ene ngoli ngamuyita liyoghoko, ntani ngamushamberera kuheka. ¹⁹ Liyuva kapi ngalikara shite sha mwi, ndi ngalitape shite kukakwedi ngakatwere; ene ngoli Hompa ngakara naruntje shite, ntani nka Hompa wenu wauyerere. ²⁰ Liyuva lyenu kapi ngalitwera, ndi shi kakwedi ngakatundemo ndi kudongonoka; kwa Hompa ngakara naruntje shite, ntani liyuva lyakulira ngalishaya. ²¹ Vantu voye navantje ngavahungama; ngava upa viweka vya mushirongo muruvede narunje dimutavi davimenwa , viruwana vyamaghoko ghande, ovyo ngani yererepeka. ²² Twatusheshu ngavikara liyovi, ntani twatudidi munkondo da shirongo; Ame Hompa, nganitikitamo vininke vino opo nga ruya ruvede.