¹ Kenga, lighoko lyaKarunga kapishi lifupi mukuyoghora; ndipo shi matwi afa, ashi adire kuyuvha. ² Viruwana dona vyenu, mbyo vyamutundito ko kwaKarunga, ntani ndjo denu darenkita Karunga amutungwire mughongo nakudira kumuyuvha. ³ Anwe mwanyata kuhonde ntani ndjo damakudipagho. ⁴ Naumweshi akaro nauhungami, ntani akondjere uhungami. Vavo kwahuguvara munkango davo, na kutongonona vipempa; kuyita udito nakudjona tupu. ⁵ Anwe kukonkora maghuta ghaliyoka lyaushungu ntani kughuvira kaghuvi. Kehe uno wakulya maghuta gho ngafa, ntani ntjene lighuta linatauka, mwamo kutunda mo liyoka lyaushungu. ⁶ Wanda wakaghuvi nakughuruwanita shi mukuhondja vyuma, ndipo vakuvive kuviruwana vyavo. Viruwana vyavo, viruwana vyandjo, ntani kapi ngavapara muviruwana vyavo vyamahepeko. ⁷ Vavo kudukira vyavidona, ntani kuhepekeramo vahepwe. Vavo kughayara vyandjo tupu, mahepeko nalidjonauro ndjira davo. ⁸ Ndjira dakutulitapo mpora kapi vadiyiva, mwavo mwato uhungami muviruwana vyavo; kehe uno wakuyenda mwavo kwato wakuparuka mo mumpora. ⁹ Mpo ngoli uhungami kapi wakara mumwetu, ndipo turuwane vyauhungami. Atwe kutaterera ukenu, ngoli kumona mundema; atwe kututwedera ukenu, ngoli kuyenda mumundema. ¹⁰ Anwe kumoneka yira vitwiku, atwe kukombanita ukenu tukenge yira mundema; munkondo detu atwe kwakara yira muntu wakufa . ¹¹ Anwe kumoneka yira ghoma ntani kukunyongamena yira liputukuwa; atwe kutaterera uhungami, ngoli kwato, kulipopero, ngoli ure natwe. ¹² Atwe viruwana vyetu vingi kuuto ghoye, ntani ndjo detu kutupiruka naumwetu, ntani twayiva ovyo twadjona. ¹³ Atwe twadjona; twashwenine Karunga ntani atumukomberere nakudira kumukwama Karunga wetu, twaghamba vyavidona ntani nakumushivanena kudimutjima nankango damarundiro. ¹⁴ Twatjira uhungami, ntani ukanguki watukarera ure; atwe kutukondera mukudira uhungami mukatji ketu, ntani ushiri kapi tuhomona. ¹⁵ Lihuguvaro lyakutunda, ntani kehe uno wakuruwana uwa ndje mudona po. Karunga mo anakughamba ntani kapi vinamuhafita. ¹⁶ Hompa akenge ashi kwato umwe, ntani kunakukupura ashi weni kupira umwe anakupopero. Mpo ngoli ashi ngaruwanita nkondo dendi, ngani yite liyoghoko, ntani uhungami wendi ngavaumupandera. ¹⁷ Ghuye ngadwata uhungami parutu ntani nkondo daliyoghoko lyendi yira shidwata shakumutwe wendi. Ghuye ngakudwateka vyuma vyakunuyeda uhungami, nakuvyuta rughoko kuvantu varuwano udona. ¹⁸ Ghuye ngafutita kutwara kuviruwana vyavo, ugara ngaunegheda, nakuvyuta rughoko kuvanankore, novo vakaro pashirudi ngavatengeka yikare ndjapo yavo. ¹⁹ Mpo ngoli ngavatjira lidina lya Karunga kundilira kuutokero, ntani namapangero ghendi, ghuye ngamoneka yira mankumpi ghamumukuro, oku yira likundungu lyankondo. ²⁰ ''Ame muyogholi nganiya muZioni na kuyamuyoghora kundjo denu muruvede rwa Jakopo- vino mbyo anapanga Karunga. ²¹ Kwande ngoli, lino ndyo likukwatakano lyande kwavo- Karunga anakughambo- mpepo yande ngayikara penu, ntani nkango dande natura mukanwa kenu, kapi ngaditunda mo, ndipo ngadikapire mutunwa twa vana venu, ndipo ngadikapire mutunwa twa vana vavateru venu- mbyo anaghamba Karunga- kutunda pano dogoro kunaruntje.