¹ Vino mbyo ana kughamba Karunga ashi, ''Nomena vyaviwapo, ruwana vyauhungami. Ame nganiyakupopera, ntani uhungami wande ngaumumonekera. ² Nganikandayika wakuviruwana vino ntani nakuvikwata. Wakunomena liyuva napongora naghana kulidanita, ntani ghuye akuporeko kuviruwana dona kehe vino.'' ³ Muntunda shirongo wakukwama Karunga ovyo anakughamba, ''Karunga kapi ngamugaununa kuvantu vendi.'' Ndipo ngadire kuraperera navo kumwe, ''Kenga, ndi aghambe ashi ame nakuyitashi.'' ⁴ Pavino vino mbyo anakughamba Karunga, ''Kovo vakunomena liyuva napongora nakuruwana ovyo nashana me nakukwaterera matwenyidiro ghande. ⁵ Kovo nganikavhuruka muuntungi ntani namuruvede ghakughayara ashi wakara na vana vavakafumu na vana vavakadona. Ame nganivavhurukanga mumaruvede naghantje nahana kuvashuvako. ⁶ Ovo vakupakerero kwa Karunga- mukumukarera, ntani novo vahoro lidina lyaKarunga, nakumupandera, kehe uno wakuvhuruka liyuva napongora wakudira kuliruwanita mwamudona, ntani ghuye kukwata wangu mapangero ghande- ⁷ ame nganikuyita mundjugho yande ntani nakuvahafita mundjugho yandapero dande; Ndjambo ngavashwakerera ntani vitapa vyavo nganivitambura paharutare yande. Ndjugho yande ngayikara ndjugho yandapero yakehe uno. ⁸ Ovino mbyo anankondopeke Hompa Karunga, wakuyoghora mbunga yaIsraeli mumango- name nganivayoghora mukukambeka kwavo.'' ⁹ Anwe vikashama vyamuwiya, yiyenu nakuyakenga, anwe vikashana namuvantje vyamuwiya! ¹⁰ Vanomeni navantje vitwiku, kwato ovyo vayiva. Vavo kunafana yira mbwa yakupira kuhuda. Vavo vakurota tupu, ntani kwahora tupu kurara. ¹¹ Mbwa damakurulya; dado nakukutashi; dado mpititi dakupira shinka; dado kuruwana vyanaumwado, ntani kukughayara panaumwado. ¹² ''Yiyenu,'' mo dinakughamba, ''Tuwanenu vhinyu nakunwa vinwa vya nkondo unene. Yona nka waro ngakukara yira liyuva lyanamuntji, liyuva ngalitovara kupitakanena.''