¹ Vahungami ngavafa, ngoli kundereko avikwamino, vantu valikukwatakano lyakukuhuguvara ngavakuhangura ko, kundereko ghavikwatiro lighano ashi ghuhungami unavahangura vatunde kuudona. ² Angene mumpora; avapwiyumuka mumaghuro ghavo, ovo vayendiro muviyendera vyavho. ³ Ene ngoli yiyenu kuno, anwe vana vavakakushondera na mukamali akughulitiro naumwendi. ⁴ Are munakuhafera? Are munakuyashukira nakuneya naruraka? Anwe kapishi vana vavanankore, navana vakukukonga? ⁵ Munakuyenyeke naumwenu mukururara kumwe kuntji yashitondo, anwe mwadipaghiro vana venu kumarukenkera ghamukuro, kuntji yamawe vamanga. ⁶ Mukatji kavininke vyaushenete vyamumadamenena ghamukuro ovyo vamupa. Ngavikara vikwata vyamukareli wenu. Vateterenu vinwa vyenu vyandjambo nakuyerura ndjambo yarukokotwa. Muviruwana vyaweyo mo nganiwana ruhafo. ⁷ Mwawapikire mbete yenu pawiru yandundu; amuyendi shimpe nka nakatapa ndjambo. ⁸ Kuruku rwa livero nakungundi dalivero nko ngamutura shiyivito; munantundu nakuntjuva shintjentja, nakuyenda mukanduke; nakanenepeka mbete denu. amukaturapo likukwatakano navo; nakuhora mbete davo; mwakengire maruha horamo ghavo. ⁹ Aghuyendi kushidjambero namaghadi; mwayingipitire lidumba lyaliwa. Aghutjida vakareli voye vakare ure; aghurumuka kushirongo shavafe. ¹⁰ Warorokire kuruyendo rwarure, ene ngoli kapi waghambire shi, ''Mwato lihuguvaro.'' Aghuwana liparu mulighoko lyoye; ano mpo ngoli dapilire kukutunda nkondo. ¹¹ Are una kukupakera shinka? Are unakutjira unene vinakukurenkito ghukuyuve undjoni, unene vyakurenkitiro udire kumvhuruka nakungayara? Mukonda namwena shirugho shashire, narumweshi unakuntjira me. ¹² Ngani kayuvhita limoneko lya ghuhungami nakuyuvita navintje mwaruwanine, ngoli kundereko ngakuvatero. ¹³ Ruvede rwakulira, renka lipongayiko lya vintjantjo vikupopere. Kumeho ko likundungu ngaliyavighupapo navintje vitundepo, lishetero ngalivighupapo navintje. Ogho aghupo navintje. Ogho aghupo kwakutjwayukira ngapinge shirongo nakupinga ndundu yakupongoka. ¹⁴ Ngaghamba, 'Dika, dika! Kenita ndjira! Ghupamo vitiki navintje vyagharo ndjira yantu vande!''' ¹⁵ Mbyevishi mumayeruko ghano mo vayerulire shighamba shimwe, maparu ghovo vakaro munda, ogho akaro namadina lyakupongoka, ''Nakara palivango lyakupongoka, naye nakutjutjupita nalikudidimikira kumpepo, kurambwita dimutjima da vanandjo. ¹⁶ Kapi nganirundira mwanaruntje, ndipo nigarape mwanaruntje, ano mpepo yavantu ngayifera kumeho yande, kumaparu ogho navapa. ¹⁷ Mukonda yandjo odo varuwana, ame kwagarapire, ano anivapa kashitiko; ani horoke shipara shande nka waro nagarapire, ene ngoli akutura murupe akaranga rwa mutjima wendi. ¹⁸ Nakenge ndjira yendi, ene ngoli kunimuverura. Nganimupititira na kumushengawida kovo ngavakaro nashiliro kukwendi, ¹⁹ nakuyititapo nyango da ngegho. Mpora, mpora, kovo vanakaro ure navo vakaro pepi- anakughamba Hompa- nganivaverura. ²⁰ Ano ngoli vavadona kunakara yira omo lyafuranga lifuta, lyakudira kupwiyumuka, mema ghalyo kuyenda nalitata. ²¹ Kapi panakara mpora pavanandjo- anakughamba Karunga.''