¹ ''Anwe! Namuvantje munakaro nalinota, yiyenu kumema, nanwe munapiro maliva, yiyenu, ghurenu nakulya! Yiyenu, ghurenu vhinyu na mashina mwahana maliva ntani kapi panakara ndando yamukusho. ² Vinke ghuupira shiliveli yayo kapishi mboroto, nke ghuruwanena viruwana vyakudira kuwana mulyo? Teghererenu nawa nawa kwande nakulya ovyo vinamuwapero, mposhi ghukuhafite naghumoye kumakuta. ³ Pirurenu mantjo ghenu nakuya kukwande! Teghererenu, mposhi mupare! Nganiturapo likukwatakano lyakukarererapo nanwe- lihuguvaro lyande, shihoro shakukarererapo osho nahuguvalire Daviti. ⁴ Kengenu, namutura akare mumbangi wavirongo, mukukara mpita meho na mukondi wa vantu. ⁵ Kenga, ngavakuyita mushirongo eshi wapira kuyiva; shirongo shadiro kukuyiva ngashikudukira mukonda yaHompa Karunga, vapongoki vaIsraeli, ovo vakufumadeko.'' ⁶ Shana Karunga shirugho ntjeshi ghuvura kumuwana; mukughe pashirugho shino anakara papepi. ⁷ Shuva vavadona vashuve ndjira yendi, na varwana vadjone mumaghano ghendi. Murenke avyuke kwaHompa, ano ghuye kamufera nkenda, kwa Karunga wetu, ogho atughupiropo mwanunene. ⁸ ''Mbyevishi maghayaro ghande kapishi maghayaro ghoye, ndipo ndjira yoye ndjira yande- ⁹ uno ngo ghumbangi waHompa- liwiru lire kupitakana udjuni, ano ndjira dande dire kupitakana ndjira doye, ntani vighayara vyande kupitakana vighayara vyoye. ¹⁰ Yira moomo yakara mvhura na lime omo vyakushukumukanga kuwiru ano kapi vyavyukiranga muwiru nkwandi ngavaworeke udjuni ntani nakuvalita nakumenita nakutapa ntanga kwa munandima gho akunango na mboroto kwavakulya, ¹¹ ano ngoli nkango dande dinakutundo mukanwa kande- kapi ngadikavyuka muporongwa, mukondashi ngadikayangura mo muyangu ogho naditumu. ¹² Makura ngamutunda muruhafo ngamukare na mpora; ndundu na madamenena ngadibamaghuka kumaywi gharuhafo kumeho yenu, vitondo navintje vyamumafuva ghenu ngavikanda mahako ghavyo. ¹³ Mulivango lyavitondo vyamigha, mantatanga ghamenamo; mulivango lya vishwa, vihorowa ngavikaramo, ngavikara vyaHompa, mulidina lyendi, shineghedito sha undjoni wakukarererapo kwato ngaughupopo.