¹ ''Yimba, anwe vangandje, anwe mwadiro kuyita; kara naruhafo rwakuyimba nakulira unene, ove wadiro kukara rumwe mutjutju yakushampuruka. Mwanuke waruguvo unapitakana mwanuke wakukwara,'' anakughamba Hompa. ² Tomeka tende yayinene ghuture ko makeshe, washa negheda nkenda; repita marughodi ntani nenepita pale. ³ Mposhi ghuture lighoko lyoye lyarulyo ntani kurumontjo, ntani ghu ghurumuke kuuyita udjuni nka vitata kapi ngavihafa. ⁴ Washatjira mukondashi kapi ngaushwauka, ndipo ngavaghurumwitwa lihuguvaro lyoye ndipo ngavakuncenune; ngauvhurama lishwaghu lyoye lyaudinkantu ntani lincenuno lyavo vakushuvilira. ⁵ Mukonda mushiti ghoye ndje vyoye, Hompa mushiti ndyo lidina lyendi. Mpepo yakupongoka muIsraeli mupopeli ghoye; ghuye Hompa waudjuni mudima. ⁶ Hompa anakuyita ghukare mukamali wendi vashuvilira ntani akaro naruguvo mumpepo, yira mukadona vakwalire mwanuke mbyo vamushwena;'' mo anakughamba Karunga. ⁷ ''Pakarugho ghona nakushuvilire, weno nakuyakushimba nankenda. ⁸ Muruhandjo rwaugara nahoreka shipara shande kukwenu kukashirugho; ene ngoli nalipuliro lyakukarererapo nganikufera nkenda- aghamba Hompa, ogho okuyoghoro. ⁹ Pavino ne yira mema gha Nowa kukwande: moomo nahana shi mema gha Nowa kupi ngaghapita nka muudjuni, mo nka nakuhana shi kapi nganigarapa nove ndi nganikushwene. ¹⁰ Nampiri moomo ndundu na tundundu ghona ngavikunyunganga, ene ngoli shihoro shande shankondo kapi ngashitundapo, ndipo likukwatakano lyande lyampora ngalikunyunge- mo anakughamba Hompa, ogho akaro nankenda koye. ¹¹ Vamaghudi, lime namwe vadiranga kushengawida, kengenu, ame nganitura ndjira muviruwana vyenu, ntani nakuta nka litateko muvihemuna vyavikugho. ¹² Nganirenka viruwana vitemo ntani heka yenu yakuvembera kumawe, nalikuma lyapandje naufughuli wamawe. ¹³ Makura vana voye navantje ngavashonga Hompa; nka mpora yavana voye ngayiyingipa. ¹⁴ Mughuhungami ghoye ngaghuyitapa, nka ngaukara ghure naudona, kapi ngauntjira; ntani nampiri udona, mposhi kapi ngaviya papepi nove. ¹⁵ Kenga, nampiri kehe uno ngayite po maudito, kapi ngavitunda koye; kehe uno ngakuyitiro maudito kapi ngavivatompoka. ¹⁶ Kenga, naghunga murwana washongaura vitondo, afudango makara ghakutwera ntani kwaruwanitanga virwita pakuruwana viruwana vyendi, ntani nashita mudjonauli wakudjonaura. ¹⁷ Kwato virwita varuwana vyakukurwita ve ngavitompoko; ntani ngaghufunda kehe uno ngakurundiro. Vino vininke mulyo kuvakareli vaHompa, ntani ndjo ndjira yavo kukwande- uno ngo ghumbangi waHompa.''