¹ Are apuro ndi kukwatitako ovyo mwayuvha kukwetu atwe, ntani kware ndi mware lyarupukilire lighoko lyaHompa Karunga? ² Mpo akulire kumeho yaHompa Karunga yira shitondo shashididi, ntani nka yira shitondo osho shameno nakushokera mahako ghamape pashirugho shaupyu unene-nene; ghuye kapi akalire muntu vayiva unene vantu ndi muntu afumano unene ngudu; opo twamumonine, kapi amonikire yira muntu wamuwa ndi muntu ogho avhuro kudovaukita vantu. ³ Ghuye kwamunyengire nakumushwena vantu; mukafumu waruguvo natjutju yakumutjima. Ghuye muntu ghumwe akaliro shi vantu kuhoreka vipara vyavo kukwendi, vamunyengire unene ntani nka twamutulire yira muntu tupu wakupira mulyo. ⁴ Nani ngoli ghuye akalire namutondo wamauvera ghetu naghantje ntani nka ndje wakukandanapo maruguvo ghetu naghantje; ene ngoli atwe twaghayalire ashi ghuye muntu tupu anakufutita Hompa Karunga, kutoghona nakumutjutjupita. ⁵ Ene ngoli ghuye kwamutomawire mukonda yaviruwana dona vyetu, ghuye kwamuremaghikire unene-nene mukonda yamaundjoni ghetu. Matengekero gha mpora yetu ghakalire papendi, ntani muvironda vyendi atwe mo twaverukira. ⁶ Natuvantje tunakara ngoli yira vindjwi vyakukombana; kehe uno mundjira yendi, ntani nka Hompa Karunga atulire maundjoni ghetu naghantje papendi. ⁷ Ghuye kwamuhepikire; ene ngoli ghuye akudidipitire kapi ayashulire kanwa kendi, ghuye ndjwi ghona vatwalikidire kumfa ndi kumadipagho, ntani nka akalire yira ndjwi oyo yinakaro shi nakuyenda vakayikurure yakumwena teghete, ano waro kapi ayashwire kanwa kendi. ⁸ Mumashongauro namapangwiro ghuye kwamutwalidire kumfa; vadimuhoko dinya vaghayalire nka vyakuhamena kukwendi ndi, ano ghuye avaghupuko kushirongo shavanamwenyo, mukonda yandjo davantu vande namatengekero naghantje kwakalire papendi? ⁹ Vavo vatulire mbira yendi kumwe nambira da vakorokotji, namurume wamugova mumwendi mpiri ngoli kapi akalire mukorokotji, ndi mutunde vimpempa mukanwa kendi. ¹⁰ Ghuye kwahepire nakuvera muvipanga vyaHompa Karunga, mfa dendi kwakalire lidjambero mukuyititapo lighupiropo lyandjo. Ghuye ngawederera mayuva ghendi, ntani nka shitambo sha Hompa Karunga ngashitikiliramo kupitira mwendi. ¹¹ Kuruku rwalihepeko lyaliparu lyendi, ghuye ngakamona ghukenu na uyivi wendi ngaugwanekererapo. Mukareli wande wamuhungami ngakenita vyavingi; ghuye ngatambura maundjoni ghenu. ¹² Mpo ngoli nganimupa ruha rwendi mukatji kambunga, ntani ghuye ngagaununa mauwa navyavingi, mukondashi ghuye akuyitire mwene kumfa ntani nka vamutulire mumuvaro wavandjoni. Atambwire maundjoni ghavangi ntani nka arapilirepo vandjoni.