¹ Rambuka, rambuka, turako unankondo, Zion; aturako marwakani ghendi ghamawa, Jerusalem, mbara yakupongoka; mbyeshi kapi nka vakudira kuruwana vyavamba ngavangena mo nka. ² Kunyunge naumoye ghutunde mumbundu; kushapuka na kushungira, Jerusalem kughupe ghuketanga muntingo yoye, nkwati, monakadona wa Zion. ³ Ovi mbyo anakughamba Karunga, ''Ove kwaghulitire maghoko-ghoko, ove ngavakakuyoghora pahana maliva.'' ⁴ Kwavi mbyo Hompa Karunga anakughamba, ''Pamuhovo vantu vendi kwayendire vaghurumuke vakatunge pakarugho ghona muEgipute; Assyria akavarenkiliremo vavo mukudira konda yayiwa. ⁵ Weno vinke nakara navyo pano- oghu ngo ghumbangi waKarunga- kukenga vantu vendi kwanavashimbire maghoko-ghoko? Vantu ovo vapangiliro kupitakana mbo vakushinda- oghu ngo ghumbangi waKarunga- ntani ghuye lidina lyendi mughambi kutwikilira mwayendo mayuva. ⁶ Mpo ngoli vantu vendi ngavayiva lidina lyendi; ngavaliyiva muliyuva linya shi ghuye ndje anakughambo, ''Ushiri, ndje vene!'' ⁷ Weni uwa wandundu ghagho maghuru gha vatapi mbudi vayitango mbudi yayiwa, ovo vayuvitango mpora, ovo vayimitango mbudi dadiwa, ovo vayuvitango lighoko, vakughamba kwa Zion, ''Karunga ghoye mupangeli!'' ⁸ Teghererenu, vanomeni voye kuyigha maywi ghavo, kuyighira kumwe vashamberere ruhafo, mbyevishi ngavamona, kehe lintjo lyaumwe, livyuko lyaHompa kuZion. ⁹ Vyayitire lishamberero kuyimba kumwe, ove wadjonaulire Jerusalem; mpo Karunga ashengawidire vantu vendi; ghuye ayogholire Jerusalem. ¹⁰ Karunga akudidimiki upongoki wendi mukukenga nadintje dimuhoko; ghuntungi naghuntje ngaukenga liyoghoko lya Karunga wavo. ¹¹ Tundapo, tundapo, yenda pandje panya; kwato kukwata shakudira kukena; tunda muvaruwani vendi; kukushure naumoye, ove wakushimba matjangwa gha Karunga. ¹² Kukoye ko kapi ngaurupuka pandje nakundundana, ndi ngautunde mo unatukuka; Karunga ngayenda kumeho yoye; naKarunga waIsraeli ndje ngakaro ghoye. ¹³ Kenga, vakareli vande ngavaruwana naukotoki; ngayeruka nakumutindika kuwiru, ntani ghuye mulyo unene. ¹⁴ Vangi vyaghupire mukumo kukoye- ghuye limoneko lyendi kwakalire kundereko kudimburura kapitakana kehe uno muntu, ghuye likutjindjo lyendi kapi lyamonikire yira kehe muntu. ¹⁵ Mpindi ngoli, vakareli vendi ngavakuhanena mudimuhoko dadingi na vahompa ngavapata tunwa twavo mukonda yendi. Kwavyo vakara navyo kapi vyakuvatantera, ngavavikenga, ntani ovyo vakara navyo kapi vaviyuva, ngavavikwata lighano.