¹ Teghererenu kwande, kurughana unene ghuhungami, ove wapumbo Hompa: Kenga kuliwe oko shakara sharolito shamawe oko vaghatetanga. ² Kenga kwa Abrahamu, vasho, noku kwaSara, ogho akuyito; opo akalire mpentjendi pamundinda, namuyitire. Animutungiki nakumutura mwamungi. ³ Nhii, Hompa ngatura shengawida Zion; ngakukara uwawa mumayuva ghamaliva; kulivango lyendi lyamuporongwa yira Edeni, mumburundu yendi yakulyalyakana kuntere yamukuro waJodan munda yira shikunino shaHompa; Rufuro nankenda ngavaviwana mwendi, kutapa mpandu, naliyiyuko lyakuyimba. ⁴ ''Teghererenu nawa kwande, vantu vande, ntani teghererenu kwande, vantu vande! Mumaudito, ntani nganitura mpora yande ngayikare ukenu wamuudjuni. ⁵ Ghuhungami wande pepi; maudito ngaghatundako, ntani maghoko ghande ngaghakenga udjuni; kulivango lyakulifuta ngalintaterera; maghoko ghande ngaghataterera kurughana. ⁶ Yerura mantjo muwiru, ntani ukukenga nka waro palivhu, liwiru ngalidongonoka yira muti, udjuni ngaudwata yira shuma shashididi, ntani vatungimo ngavafa yira ndi. Ngoli maudito ngaghatwikira naruntje, ntani ghuhungami wande kapi ngaushaya kuruwana. ⁷ Tegherera kwande, ove wayivo vyauhungami, anwe vantu mwakaro mudimutjima denu: Kapishi mutjire matuka gha varwana, ndi mutunde dimutjima mumahepeko ghavo. ⁸ Ntjwa ngadivalyapo yira vikeverero, ntani lighungu ngalivalya yira huki; ano ngoli uhungami wande ngaukara naruntje ntani maudito mudimuhoko nadintje.'' ⁹ Rambukenu, rambukenu, dwatenu namukumo, vakavita vaHompa. Rambukenu yira muliyuva lyakare, muhoko waruvede rwakare. Kapishi nwe mwadipaghire Rahab, anwe mwagarapitiro muhona? ¹⁰ Kapi unakukutita lifuta, mema ghaudami, nakuruwana udami walifuta mukudimita vapitepo? ¹¹ Maliva ghaHompa ngaghavyuka nakaya kwaZion na maruntjodi gharuhafo na nkenda naruntje mudimutwe davo; na nkenda naruhafo ngaupitakanena, ntani ruguvo nakulira ngaudongonokapo. ¹² ''Ame, ame namushengawidango. Vinke munakutjilira varwana, ovo ngavafo, vana vavakafumu vavarwana, ovo vashita yira ngwena? ¹³ Nke vyo muvuramena Hompa ogho amushito, ogho anenepito liwiru nakutura viyerapo vyapalivhu? Mwakara nalikudivikiro kehe liyuva mukonda yaupyu waugara walihepeko opo ngapamudjonaura. Kuni ugara walihepeko? ¹⁴ Ghumwe ogho anyongameno palivhu, Hompa ngakwangura mukurupwita; kapi ngafa ndi ngayende palivhu, ndi ngashane mboroto. ¹⁵ Kwande ame Hompa Karunga wenu, ogho atulitopo lifuta lipite kudamrka- Hompa mushiti lidina lyendi. ¹⁶ Natura nkango dande mutunwa twenu, ntani nafikuko mumundwire wamaghoko ghande, ashi nitapeke liwiru, kutura viyerapo vyapalivhu, nakughamba kwa Zion, ''Ove muntu wande.''' ¹⁷ Rambukenu, rambukenu, shapukenu, Jerusalem, anwe mwanwino mumaghoko ghaHompa kutunda kuugara wendi anwe mwanwino mushikundurukido, palivhu ko twatusheshu munkinda yashitetu. ¹⁸ Kwato ghumwe mukatji kavo navana vavakafumu ovo ayita vamuneghede; kwato ghumwe mukatji kavana na vavakafumu ovo arera amushimbe kulighoko. ¹⁹ Maudito mavili ngaghakushorokera- are ngavakuvumbika naye? -mpentjoye nakuwapeka, ntani munandima nalighonga. Ogho ngakushengawido? ²⁰ Vana voye ngavapwilira; vakonga kehe shitata shahuka, yira muhona mulishire; vaviyuda naugara waHompa, kushwena vya Hompa. ²¹ Ano ngoli weno yuvhenu vino, wadidipitirepo ghumwe nakukorwitapo ghumwe, mbyevishi kapi akorwire navhinyu: ²² Hompa Karunga wenu, Hompa wenu, ogho akandililiro nakuyititapo vantu, aghamba vino, ''Kenga, naghupu nkinda yashitetu mumaghoko ghenu- shikukundurukido, osho shakaro nkinda yande yaugara- mposhi kapishi ngamuyinwe nka. ²³ Nganiyitura mumaghoko ghoye ghatjutju, ovo vaghambiro kwenu, rarenu palivhu, tumuyendere: muture dimughongo denu palivhu ntani yira shitarata shavo shakuyendera.''