¹ Karunga mbyo anakughamba vino, ''Kuninko mbapira damashweneno ashi ame nashwena vanyokwenu? Kuvakamakongo munke namughulita? Kengenu, ame kwamughulita mukonda yandjo denu, namukonda yakumpiruka mundwanite, vanyokwenu kwavatuma vatundepo. ² Mokonda yanke vikarera ashi opo nayanga kwato ogho nayawanangapo? Mukonda yanke vikarera ashiopo nakuwanga kwato wakulimburura? Kengenu, kulikarukiro lyande napwililita lifuta; kutura dimukuro dikare mburundu; ntjwi damo kufa mukonda yakupira mema kumwe nakughora. ³ Ame kudwateka liwiru namundema; kufikako nalikeshe lyamalirankali.'' ⁴ Hompa Karunga kwampa ruraka yira ghumwe ogho anakushongo, mposhi nighambe nkango damukumo kovo vanaroroko; ghuye kundambwita kehe yino ngurangura; aradipeke matwi ghande mukuyuvha yira ovo vanakushongo. ⁵ Hompa Karunga kwamaghura matwi ghande, kumwe nidire kumuvyuka, kwato nampili nimutungwire mughongo. ⁶ Ame kutungwira mughongo kovo vanakuntoghono, nakuvapa matama ghande kovo vanakudjupuro ndjwedu dande; ame nakuvhurashi kuhoreka shipara shande kuviruwana vyakufita ntjoni nakuntipira. ⁷ Mukondashi Hompa Karunga ngambatera; ngoweno ame nakukarashi muruguvho; makura mbyo natura shipara shande yira liwe, mukondashi naviyiva ashi kapi ngavantura muntjoni. ⁸ Ogho ahungamekango pepi name akara. Are wakumpa ndjo? Tuyimanenu nakukukorangeda ghumwe naunyendi. Are mupeteki liraka kukwande? Mushuvenu aye pepi name. ⁹ Kengenu, Hompa Karunga kuvhura kumbatera. Are wakuvhura kughamba ashi ame nimunantjoni? Kengenu, navantje ngavavashutaura yira vyuma; vimbumburu ngavivalyapo nu. ¹⁰ Are ghumwe wenu atjiro Karunga? Are mulimburukwi kuliywi lyamukareli wendi? Are wakuyenda mumundema ahana ramba? Ghuye avhure kuhuguvara mulidina lya Karunga nakuyeyamena kwaKarunga wendi. ¹¹ Kengenu, anwe namuvantje mwahamekango mundiro, munakuwapayikiro naumwenu naramba: yendenu muukenu wamini denu nashite osho munahameke. Ovino mbyo muwana kukwande: Ngamurara mumavango ghatjutju.