¹ Teghererenu kukwande, anwe virongo vyakulifuta! weno teghererenu ngoli nawa, anwe vantu mwakuporoko. Jehova kwandjitanga palidina kutunda kulishampuruko lyande, opo vandjitire vanane muudjuni uno. ² Ghuye arenke kanwa kande kakare yira rufuro rwarutwe; ghuye amvhandeke mumundulye wamaghoko ghendi; anduwana nikare yira likangu lyakurora; amvhandeke muugongo wendi. ³ Antantere ashi, ''Ove mukareli wande, Israeli, kupitira mwendi, ame kunegheda unankondo wande.'' ⁴ Ngoli ame anilimburura ashi, ''Mpiri ngoli naghayara ashi naruwanena maghoko-ghoko, nahepeka nkondo dande pahana mutompo, nani ngoli uhungami wande mpoghuli kwaYehova, ntani mfeto yande kwa Karunga wande yakara.'' ⁵ Paweno Yehova anaghamba- ghuye ogho aghungiro me kutunda kulishampuruko nikare mukareli wendi, mukuvyutirapo Jakopo shimpe nka kwanaumwendi, mposhi Israeli ngaponge kukwendi, mpo ngoli nawana lifumadeko lyalinene mumantjo ghaYehova, ntani Karunga wande anakara nkondo dande- ⁶ ntani aghamba ashi, ''Vididi unene kukoye kukara mukareli wande ogho ngavyutiropo muhoko wa Jakopo nakudikurura ovo vaparukiro mo mwavaIsraeli. Ame nganikutura ghukare ramba kuvantundavirongo, mposhi ngaghukare muyogholi wande kughuhura waudjuni.'' ⁷ Vino mbyo anakughamba Yehova, muyogholi wavaIsraeli, wakuhungama, ogho vapira kuhora, ogho vanyenga vanavirongo, ntani mupika wavapangeli; ''Vahompa ngavakukenga nakukunyongamena, mukonda Yehova muhuguvali, nampiri vapongoli vaIsraeli, ovo vakuhoroghoro.'' ⁸ Vino mbyo anakughamba Yehova, ''Pashirugho osho mukunegheda maghameno ghande ame ngani kulimburura ove; ame ngani kughamena ove, nakukupa likukwatakano lyavantu, mukuwapukurura livhu, mukuwapukurura marunda ghaghupingwa. ⁹ Ove ngaghuntantera vankwati ashi, 'Rupukenu mo;' kwavo vakara mudorongo da mundema, 'Kuneghede kwavo.' Ngavalyera kuntere yavitaghura, ntani mavango naghantje ogho ghapiro vintu ngaghakara malyero ghavo. ¹⁰ Vavo kapi ngavafa ndjara ndipo linota; nampiri ghupyu ndipo shite shaliyuva kapi ngashitoghona pavo, mbyovyoshi ogho avafero nkenda ngavapititira; ghuye ngavapititiro vayende kumarunone ghamema ghapamangenyena. ¹¹ Makura ame ngani renka ndundu dande nadintje nakulyalyakanita nkuru ndjira.'' ¹² Kenga, vino ngavitundilira ghure, vimwe kughurundu na kughutokero; navimweya kutundilira kushirongo shaSinim. ¹³ Yimba, mawiru, naruhafo, livhu; ngaliyashuka nakuyimba, ove ndundu! mukondashi Yehova kushengawida vantu vendi, nakufera nkenda ruhepo rwendi. ¹⁴ Ngoli Zion aghamba ashi, ''Yehova ankomberera ame, nakumvhurama.'' ¹⁵ ''Mukamali kuvhura avurame monendi, ogho anakuyamo kumashwe ghendi, mposhi apire kufera nkenda pamonendi wamumati ogho ashampuruka? Nhii, kuvhura vavurame, ngoli ame kapi nganikuvhurama. ¹⁶ Kenga, ame natjanga lidina lyoye mumake ghamaghoko ghande; matungo ghenu ghamawe kukara kehepano kumeho yande. ¹⁷ Vana venu kunakukwangura kuvyuka, kuno ovo vamudjonauliro kunakutundapo. ¹⁸ Kenga kudinguruka nakumona, vavo navantje kunakuponga nakuya kukoye. Nawa-nawa kuno ame shimpe nimuyumi- ghuno ngo ghumbangi waYehova- ove ngaghuvadwata yira shiranda, nakuvadwata dwata yira mufuko. ¹⁹ Mpiri ngoli mwakalire vakupira mulyo nakuhepa unene, livhu olyo lyadjonaukiro, weno kumukara ngoli vavadidi unene kuvatungimo, navo vamuturo kuntji yavo kuvamutjakunuka vamukare ghure. ²⁰ Vana ovo vashampuruka mushirugho sha likombanito lyenu lyalinene ngavaghamba anwe kuna kuviyuvha, ''Livango mutinda unene kukwetu, tupenuko livango, mposhi tutungepo pano.' ²¹ Makura ngaghukupura naumoye ashi, 'Are nani antjampurukiro vano vanuke? Ame nakombanitire unene ntani ningandje, vatjwayulire nakutjora nkwara dande. Are arero vano vanuke? Kenga, ame kwantjuvire pentjande; kuni vatundilira vano?'''' ²² Vino mbyo anakughamba Hompa Karunga, ''Kenga, ame nganiyerura lighoko lyande kudimuhoko; ame ngani yerura lirembe lyashiyivito kuvantu. Vavo ngavayita vana vavamati voye mumaghoko ghavo nakushimbira vana voye vavakadona pamapepe ghavo. ²³ Hompa ndje ngakaro vasho vakukurera, navahompa vavo vakamali ngavakara vatekuli-reli venu; vavo ngavamunyongamena navipara vyavo vinakengere mulivhu nakupesha mbundu dakumpadi denu; ntani ngamuyive ashi ame Yehova; ovo vahuguvarango mumwande kapi ngavavafita ntjoni.'' ²⁴ Kuvura kughupa vakombaniti vatunde kumufundi, ndi vankwati kuvapopera kuugara waunene ndi? ²⁵ Ngoli vino mbyo aghamba Karunga, ''Nhii, vankwati ngavavagaununako kwa mufundi wavo, ntani vakombaniti ngavavayoghora; mbyevishi ame ngani kuvyuka nauhepeki wenu nakupopera vana venu. ²⁶ Ame nganihavareka vahepeki venu marutu ghanaumwavo valye; vavo ngavakorwa honde yanaumwavo, ngayikare yira vinyu. Makura vantu navantje ngavayiva ashi ame, Yehova, ame muyogholi namupopeli wenu, wamunene unene waJakopo.''