¹ Sheumuka nakushungira mumbundu, mona kadona waBaliloni; shungira palivhu wahana nkata, mona kadona wa Kalidiyani. Ove kapi ngautwikira kukara mudinkantu ndipo umuwa. ² Ghupa muntje utwe utura; ghupako liwiwili lyoye, shuturako vikoverero vyoye vyaviwa, tonya mburukeva yoye, vindakana dimukuro. ³ Shintjentja shoye kapi ngashihorama, moo, ntjoni doye ngavadimona: Ame nganigarapa ntani kundereko muntu ogho nganishuvako. ⁴ Mupongoli wetu, Karunga wavakavita ndyo lidina lyendi, mupongoki waIsraeli. ⁵ Shungira mulikumweneno nakuyenda mulindema, mukadona waKalidiyani; koye ve kapi ngavatwikira kukutwenya shi hompa kadi wamauntungi. ⁶ Ame kwagarapa navantu vande; ame kwadongonona upingwa wande nakuvatapa mulighoko lyoye, ngoli ove kapi wavanegheda ufenkenda; wakambeka djoko yayidito pavakurupe. ⁷ Ove kwaghamba, ''Ame nganipangera kunaruntjeya mukukarashi mupangeli kadi kunavantje.'' Ove kapi wavitura vininke vino kumutjima, kapi waghayadara ashi weni mo ngavirupuka vitundwamo. ⁸ Weno tegherera vino, ove kwahora mfumwa nakushingira mulipopero; ove kuna kughamba mumutjima ghoye, ''Ame nakarapo, nakundereko wakumfana; ame narumweshi ngani shungira shika mufitavya, kapi ngavintjorokera rumwe vyakukombanita vana.'' ⁹ Ngoli vininke viviri vino ngaviya kukoye ntantani muliyuva limwe tupu; likombanito vana na mapata ghavafitavya; muunankondo wakuyulilira ngaviya kukoye, ghupako maupure ghoye na matondowero ghoye navitutemba. ¹⁰ Ove kwahuguvara muviruwana dona vyoye; ove kwaghamba, ''Kwato ogho ankengo''; unongo ghoye naukonentu ghoye kwakupempura, ngoli ove kwaghamba mumutjima ghoye, ''Ame nakarapo ntani kwato ghumwe afano yira ame.''' ¹¹ Vimpangwa ngavikufunda; ove kapi ngauvhura kuukukandura. Lidjonauko kulikuwana pawangu-wangu, kuno ve wahana kuviyiva. ¹² Kondja litandwiro mpepo dona doye na maupure ghoye ghamangi ovyo wahuguvara tunda wanuke ghoye; kuvhura ngavikutompoka, kuvhura ngavikandanapo lihudi. ¹³ Ove unaroroka namakonakono ghoye ghamayingi; renka varwana ovo vashapuke vakupopere- ovo vakufaneka liwiru, nakukenga kuntungwedi, ovo vakungambipara tukwedi twatupe- renka vakupopere kovyo ngavikushorokero. ¹⁴ Kenga, vavo ngavafana yira rwenge vatjoraura. Mundiro ngauvaveveka. vavo kapi ngavakuparura vene mumaghoko ghamaraka ghamundiro. Kwato maraka ogho ngaghavapyapyareko ntani kwato mundiro ashi ngavakudurure! ¹⁵ Ovino mbyo vinakutambo- novo waruwananga navo, ntani ove kwaghura nakughulita kumwe navo kutunda udinkantu ghoye- ngavakuhana kehe uno nandjira yendi; kapi ngakukara mpiri ndi ghumwe wakukughamena.''