¹ Bel anyongama palivhu, Nebo aghurumuka; kuvinntjwantjo vyavo vavishimba vavikorama na vikashama vyamudigho. Ovyo vintjwantjo ne mudigho waudito kuvikorama vyaroroko. ² Navintje kuvambarandanga, nangoro; vyavyo nakuyoghorashi mafano, ntani navyonkashi naumwavyo vyapwa mumango. ³ Tegherera kwande, ndjugho yaJakopo, varuhupwa vamundjugho yaJakopo, are ogho kanishimba-shimbanga kumeho yamashampuruko ghenu, kavashimbiranga mulira. ⁴ Nampili vakurupe venu ame nakarako kare, nganikarako dogoro mughukurupe ghoye. Ame nakuturopo ame nganikuvika; ame nganikushimba-shimba ntani ngani kupopera. ⁵ Nare ngauntjetakanita ame? Are unakughayara nakufana naye, mposhi vatushetakanite? ⁶ Vantu kutura ngorodo mundjato nakuviha shiliveli pashiviha. Vavo kuyinaura vakuruwana vikugho, makura ghuye kuviruwana mushikarunga; makura kushitwera ngoro nakushipanda. ⁷ Vavo kuvitura pavipepe vyavo vavidamune; vavo kuvishintjika pamavango, kuvishintja pamavango ano vyavyo nakuyendashi vitundepo. Vavo kukuwa kukwavyo, ano ngoli vyavyo nakulimbururashi ndipo viyoghore kehe uno mumaudito. ⁸ Tedenu kuhamena vininke vino; narumweshi kuncenuna vino, anwe vanankore! ⁹ Tedenu kuhamena vininke vyakare, vyamumaruvede akapito, ame Karunga, kwato nka ghumwe, ame Karunga, kwato akufano name. ¹⁰ Ame nayuvhitire ghuhura kutundilira kukutanga, ashi vinke vyashorokiro pakare; ame nakughambo, ''Maghayadaro ghande ngaghashoroka, nganiviruwana yira moomo navishanene.'' ¹¹ Ame nayita shidira shakumumana shakuupumeyuva, murwana wakughure mumatokoro ghande; nhii, ame navighambo; nganivitikitamo; yira moomo navitambitira, ngani viruwana. ¹² Nteghererenu, anwe vantu vavarunde, anwe mwakaro ghure nakuruwana ushiri. ¹³ Ame kuna kumuyitira vahungami papepi; kapishi ure, mukondashi liyoghoro lyande kapi lyatatereranga; ame nganitapa liyoghoko kuZion na uwa wande kuIsraeli.