¹ Evi mbyo aghambire Karunga kuvawaveka vendi, kwaCyrus, ogho nakwatelire kughoko lyarulyo, mukurenka ature mumpopa dimuhoko kueho yendi, mukughupa virwita vya vaHompa, nakugharura mavero kumeho yendi, mposhi livero likare linagharuka: ² ''Ame nganiyenda kumeho yendi nnakulyarakanita ndundu; ngani djonaghura maruha ghamavero ghangoporo nakutetaura maruha ghavikugho vyavo, ³ ntani ame nganimupa limona lya mumundema na ungagho wakuhorama, ntani ngamuyiva ashi ame, Karunga, namuyitiro pamadina ghenu, ame, Karunga waIsraeli. ⁴ Mukonda yamukareli wande Jakopo na Israeli ogho natoghorora, ame kumuyita pamadina ghenu, nganimupa lifumadeko lyalinene, nampiri ngoli ame kapi mwandjiva. ⁵ Ame me Hompa, ntani kwato nka ghumwe; kwato Karunga ngoli ame. Nganimuvatera mumaudito, nampiri ngoli kapi mwandjiva me; ⁶ vantu kapi ngavayiva oko ngalitundilira liyuva, nakughutokero, mpo ngoli shi kwato karunga ano ngoli ame: Ame me Hompa, ntani kwato nka ghumwe. ⁷ Ame naturopo ghukenu na kurughana mundema; ame nayitopo mpora nakurughana lidjonaghuko; ame me Hompa, narughano navintje vino. ⁸ Ove liwiru, rokera palivhu kutundilira kuliwiru! Renka liwiru lirokere palivhu ghuhungami. Renka livhu livighupe, olyo liyoghoko litemune naghuhungami vigwanekere nalyo. Ame, Hompa, narughano navintje vyo. ⁹ Lihudi lyalinene kwakehe uno anakukukanano nagho amushito, ogho anafano yira kehe kanyungu kalirova mukatji kavaunyako palivhu! Lirova kuvhura kupura mushongi walyo ashi, 'Vinke ovyo unakuruwana?' ndipo 'Ovyo waruwana kwato dimukore dakukwatera?' ¹⁰ Lihudi lyalinene kogho wakughamba kuvashe, 'Vinke vyo mwaturerera?' ndi kumukamali, 'Vinke ovyo wayita?' ¹¹ Evi mbyo aghamba Hompa, wakupongoka waIsraeli, ogho ashirughano: 'Vinke ovyo unakupulira mapuro kuhamena ovyo nganiruwana kwavana vande? Kuvhura ghuntantere ovyo nirughana kuhamena kuviruwana vyamaghoko ghande?' ¹² Ame nashito udjuni nakuhunga muntu akaremo maghoko ghande ngo ghahonyonino ghatunde muliwiru, ntani ame napangeliro ntungwedi nadintje dimoneke. ¹³ Ame me narenkitiro Cyrus akare muuhungami, ntani ame nganilyalyakanita ndjira dendi nadintje. Ghuye ngadika nkurumbara yande; ngani mangurura vantu vande vavyuke kumandi, ntani kapishi vyandando ndi vyakughura,''' Mo anakughamba Hompa Karunga waviturwapo. ¹⁴ Evi mbyo anakughamba Hompa Karunga ashi, ''Viyeramo vyaEgipute navighulitwa vya Ethopia navankwati, vakafumu vavare, ngavakavayita koye. Ngavayakare voye. Ngavakwama muruku roye, ngavaya mumauketanga. Ngavakutwera ngoro vakunyomangene, nakukukwambera kukoye nakughamba ashi, ''Vyaushiri Karunga mpwali papoye, ntani kundereko nka ghumwe kughupako ghuye.'' ¹⁵ Ushiri ove Karunga waIsraeli ogho akuhoreko naumwendi, karunga waIsraeli, muyogholi. ¹⁶ Navantje ngavakufa ntjoni nakushwauka kumwe; ovo vashongi vavintjwantjwe ngavayenda mulishwaghu. ¹⁷ Ngoli Israeli ngamuyoghora Hompa Karunga nalighoko lyakukarerera. Kapi ngaufa ntjoni ndi lishwaghu. ¹⁸ Evi mbyo anakughamba Hompa Karunga, ogho ashito liwiru, Karunga waushiri ogho ashito udjuni nakughuruwana, ogho aghuvarekiro. Ogho aghushito, kapishi ghukare wakuhepeka, nani kwaghuruwana ngavatungemo: ''Ame Hompa Karunga, ntani kundereko nka ghumwe. ¹⁹ Ame kapi naghambere kumpenge, kumavango ghamwe ghakuhorama; ame kapi naghamba kuruvaro rwa Jakopo, 'ntjana-ntjane tupu maghoko-ghoko!' ame Hompa Karunga, wakughamba naushiri; ame kuna kughamba vininke vyaghuhunga. ²⁰ Karenu pamwe ntani muya! Pongenu kumwe, anwe vatungimo vamudimuhoko! Kapi vakara naghuyivi, ovo vakushimba mafano ghakushonga nakuraperera kwa karunga wakudira kupopera. ²¹ Yiyenu pepi nakuvintantera me, yitenu ghumbangi! Vashuvenu varughane udona kumwe. Are aneghediro vino pashirugho shakapito? Are aviyuvhitiro? Kapishi ame, Hompa Karunga? Kundereko nka Karunga nkwandi me tupu, Karunga waghuhunga na muyogholi; kundereko nka ghumwe kughupako me. ²² Yiyenu kwande niyamupopere, nakuntje oko washayera udjuni, mbyevishi ame Hompa, kwato nka ghumwe. ²³ Kwaghana panaghumwande me, kughamba veta dande dakuvyukilira, ntani kapi ngadi vyuka nka: Kukwande me ngoro nadintje ngaditongamena, maraka naghantje ngaghakughana. ²⁴ Ngavakaghamba kuhamena ame, ''MwaHompa Karunga pentjamo mwakaro liyoghoko nankondo.''''' Navantje ngavakufa ntjoni ovo vamugarapero ghuye. ²⁵ MwaHompa Karunga ntekuru nadintje da Israeli ngavadipopera; ngava kakupandadekera mwendi.