¹ Ngoli vino mbyo anakughamba Hompa, ogho amushito, Jakopo, nakumughamba anwe, Israeli: ''Mwashakara naghoma, mbyevishi ame nganimuyoghora; ame kumutwenya pamadina, anwe vande. ² Pakupita mumema, ame nganikara nanwe; pakuvindakana dimukuro, kapi ngavimutjilita anwe. Mpiri amuyendi mumundiro anwe kapi ngamupya, namaraka ghamundiro kapi ngaghamushora. ³ Ame Hompa Karunga wenu, napongoka kumbunga yaIsraeli, muyovoli wenu. Namupa shirongo shaEgipute nimumangurure, Cush na Seba kuntjinto yaliyoghoro lyenu. ⁴ Anwe mwahungama namulyo unene mumantjo ghaKarunga, ame namuhora; mbyo ngoli nganimupera vantu vande kumwe, navantu vapeke mulikutjindjo lyaliparu lyenu. ⁵ Mwasha yomapa, ame nanwe nakara; ame nganiyita ruvaro rwenu kuupumeyuva, nakumupongeka kuutokeyuva. ⁶ Ame nganikara kuumboyera, 'Nganivatape;' nakuucuma, 'Mwashakenga kuruku rwenu;' yitenu vanarume venu kuure, ntani vanakadi venu pavirongo vyamaparambo, ⁷ kehe uno ngantjita palidina, ogho nashita kuuntungi wande, ogho naghumba, nhii, ame naviruwano. ⁸ Ntjitirenu vavitwiku, nampiri ngoli vakara namantjo, navantu vakudira kuyuva, nampiri ngoli vakara namatwi. ⁹ Virongo navintje vikukwatakane nakupongeka vantu vavo. Kwato nka Karunga peke wakuviruwana vino ndi navimutantera? Vatanterenu vaye navambangi vavo vayaneghede ushiri, nakuyategherera na kunkondopeka, 'Ushiri wavo.' ¹⁰ Ove vambangi vande- mo anakughamba Hompa- na vakareli vande ovo natoghorora, mposhi muviyive nakupura mwande, nakuyiva nawa-nawa shi ame are. Kwato Karunga akaroko, ntani kwato nka ngayo kuruku yande. ¹¹ Ame, ame Karunga, ntani kwato nka muyogholi wapeke ngoli ame tupu. ¹² Ame napumbire, muvateli nakumona kwato nka karunga ghumwe mukatji kenu. Anwe mbangi dande- mo anakughamba Hompa Karunga- ame Hompa. ¹³ Kutunda liyuva lyanamuntji ame Karunga wenu, kwato wakushenduka mpangero dande mulighoko. Ame nganiviruwana, ntani are wakuvipirura?'' ¹⁴ Vino mbyo anakughamba Karunga, mupopeli, apongoko mumbunga yaIsraeli: ''Mukonda yenu ame nganimutuma kuBabiloni nakavarwita navantje, vino ngavikarenkita maghano ghavatungimo vaBabiloni vapirure maghano ghavo naruhafo nantjomo. ¹⁵ Ame Karunga, ogho apongoko, mushiti wavaIsraeli, Hompa wetu.'' ¹⁶ Vino mbyo anakughamba Karunga (agharwiro ndjira mulifuta nakuturamo mpito mukatji kamema, ¹⁷ ogho adipaghiro matemba natukakambe, vakavita na vankurungu. Vafire navantje kumwe; vavo kapi ngavarambuka nka, vavo ngavakushera vifupa yira shishwa shakutwera. ¹⁸ Mwashaghayara kovyo vyakapito, ndipo mutegherere vyakare vyakapito. ¹⁹ Kenga; Ame kunakurughana vininke vyavipe; kunakuyenda vikashoroke; ngoli kapi unakuvikenga naghumoye? Ame nganitura vitaura mumburundu kumwe na mema ghamumburundu. ²⁰ Vikorama vyamuwiya ngavifumadeka me, vambwawa navampo, mukondashi ame nganitura mema mumburundu, nadimukuro mumburundu, vakareli vande ngava nwe. ²¹ Vantu ovo nashita naumwande, ngavampandayikiteko. ²² Anwe kapi munakundjita, Jakopo; kare kauroroka kwande, Israeli. ²³ Anwe nashindjwi shi munayita kushidjambero ndipo kumfumadeka kundjambo doye. Ame kapi nakukomberera ndipo ashi nikupangero ashi nahepa ndjambo doye. ²⁴ Ame kwato ovyo unampa namaliva shi, ndipo ghumpe maghadi gharupekwa kundjambo yoye: Ove unakughupu kwande nandjo doye, ove unangupuko nakuviruwana dona vyoye. ²⁵ Ame, nhii ame Karunga ghoye wakukuhupirapo ndjo doye nadintje; naghana kukenga kundjo doye wadjona muunene wado. ²⁶ Mvhurukite ovyo vyashoroko, toko tukukanane, yita maudito ghoye, ogho aneghedo ashi ove kapishi umundjoni. ²⁷ Vanyakulyoye vadjonine, vampititi venu vandjonine me. ²⁸ Mpo ngoli shi ame nganitantera vakareli vande; ame ngani tuma Jakopo ngavhure kutapa lidjonauro, nambunga yaIsraeli kumaraka dona.''