¹ Kenga, mukareli wande, ogho nankondopeka, muhorowora wande, mwendi naghupa rufuro. Ame natura mpepo yande pendi; ghuye ngayita mpora mumuhoko. ² Ghuye kapi ngalira ndi kuyighira, ndi kurenka liywi lyendi valiyuvhe mundjira. ³ Mbu dakudjama kapi ngaditjora, ntani kashite karamba kapi ngakadimita: Ghuye ngatwara ghuhungami kukudipagha mpora. ⁴ Kapi ngakura kupwilira ndi kughupa mukumo dogoro ngaturepo mpora muudjuni; ntani mavango ghakuntere dalifuta ngaghataterera veta yendi. ⁵ Evi mbyo anakutanta Hompa Karunga- ogho ashito liwiru nakulinanununa, ogho aturopo udjuni na navintje evi lyayititangapo, ogho atapo munku kuvantu vakaropo ntani liparu kovo vatungo po: ⁶ ''Ame, Hompa Karunga, nakuyita mughuhungami ntani nganikukwata kulighoko lyoye. Ame nganikutura ntani nganikutura ghukuyuve navantu, yira shite shadimuhoko, ⁷ pamantjo ghavatwiku, kumangurura vanadorongo yamundema ntani mundjugho yakuyivilita ovo vashungiro mumundema. ⁸ Ame Hompa Karunga, olyo ndyo lidina lyande, ntani ghuyerere wande kapi nganighukugaunwina naghumwe ndi nganitange navintjwantjwe. ⁹ Kenga vininke vyakunyima vinayapiti, weno ame nashana kuyovita vilika vyavipe. Kemeho ngavitameke kushoroka ngani vimutantera.'' ¹⁰ Yimba Hompa Karunga rushumo rwarupe, ntani nakumutanga kutunda kughuhura waudjuni; anwe mwaghurumukango muyende kulifuta, ntani nakunavintje evi vyakaromo, kuliyenga, ntani ovo vakaroko. ¹¹ Renka mburundu na nkurumbara dilire, kovatunga dimukunda avashanga liparu, nakuyiyira murufuro! Shuva vatungimo vamusela vayimbe; vashuve vayighire kutundilira kundjumungu dandundu. ¹² Renka vatape ghuyerere kwa Hompa Karunga nakuyivita kumutanga paliyenga. ¹³ Hompa Karunga ngarukamo yira lipenda, yira mukafumu wamukavita ngakadora naghunankondo wendi. ngayighira, nhii, nganunga ndwa yendi mukulira; nganegheda vanankore vendi nkondo dendi. ¹⁴ Namwena shirugho shashire; nataterera nakukushenena naghumwande; weno nganilira yira mukamali wakushumita; nganidokora nakufuda. ¹⁵ Nganiyara ndundu dakupira mulyo navidurundundu ntani nganikukutita dimutamba; nadintje ntani nganipirura dimukuro dikare virudi ntani ngani kukutika mbu. ¹⁶ Ame nganiyita vitwiku mundjira eyivadira kuyiva; mundjira edi vadira kuyiva nganivapititira. Ngani pirura mundema ukare shite kughuto wavo, kutura mukorokotji palivango lyakuvyukilira. Evi vininke nganiviruwana, ntani kapi nganivishuvilira. ¹⁷ Ngavavavyuta kuruku, ngavavashwaukita kumanenena, kwavo ovo vapuro muvintjwantjwe, vakughamba rupe rwakutwedera shikuwo, ''Anwe vakarunga vetu.'' ¹⁸ Teghererenu, anwe vipurupuru; nakukenga, anwe vitwiku, anwe vakudira kukenga. ¹⁹ Are shitwiku mara mukareli wande? ndi shipurupuru yira mutapi mbudi wande natuma? Are ogho nakukwatakana naye ghukwagho washitwiku, ndi mukareli waHompa Karunga washitwiku? ²⁰ Anwe kumona vininke vyavingi, mara kapi mwavikwata lighano; matwi ghenu ghagharuka, ngoli kwato mpili ghumwe wakuyuvha. ²¹ Hompa Karunga kumuyenda mukupanda mpora yendi ntani kutura murawo wendi mughuyerere. ²² Mara vano vantu kuvaka nakuhomona, navantje kukwata murupedona, nakuvatulika mudorongo; vavo vanakara vanawidi walihomona kwato ghumwe wavo avapopero, ntani kwato ghumwe wakughamba, ''Vavyutenu!'' ²³ Are ghumwe wenu ngategherero vino? Are ngategherero nakuyuvha vyakughuto? ²⁴ Are apo Jakopo kuvanawidi, naIsraeli kuvanawidi vamashaka? Nani kapishi Hompa Karunga, kushwenena ovo twadjonena, mundjira odo vashwena kuyenda, ntani veta yare vashwena kukwama? ²⁵ Mpo ngoli yamusheghumukira nkoko yaghugara na nyanya yavita, mpo avawanena maraka ghamundiro, ngoli shimpe kapi vyavakenena; mbyo vyavadjonaghura, ngoli kapi vavitura kumutjima.